當首爾仍是叫漢城的那些年（拾柒）

漢城係一個東京級數嘅大城市，喺呢種過千萬人口嘅城市生活，每日都有無數嘅陌生人同你擦肩而過、來去匆匆。久而久之，你會對身邊嘅陌路人麻木晒，除非佢有某種特質去吸引你嘅視線，否則你係唔會多投一個目光。

喺呢個大城市，想吸引別人嘅注意，其實都唔係冇方法。喺云云嘅方式當中，拖住條鬼妹招搖過市係萬試萬靈嘅不二法門。

地鐵3號線鍾路3街站。

「Va te faire enculer!」

每當 Colette 講法文嘅時候，我就要打醒十二分精神，因為除咗同阿媽傾計之外，佢只會喺兩個情況下轉台講法文：

講情話嘅時候：因為佢話如果我識聽的話佢會怕醜（其實我唔係未聽過佢講英文情話）。

屌鳩人嘅時候：因為佢話如果我識聽的話佢會怕醜（其實我唔係未聽過佢講英文粗口）。

眼下嘅情況相信係後者，因為佢應該唔會對一個迎面而來嘅韓國大嬸表示傾慕。

「你冇事吖嘛？」

「個肥婆撞到我個胸，好痛。」從佢嘅表情我可以估計到真係幾痛；迷你種鬼妹喺呢啲對碰嘅情況下通常都蝕章。

我明白 Colette 今朝嘅心情係唔會好得去邊嘅。成個朝早，佢唔係俾人撞就係俾人眼望望。韓國人另外一個好壞嘅習慣，就係當佢哋見到一個自己人（視覺上而言，我係）同一個外籍異性走埋一齊，佢哋會毫不客氣咁行注目禮；好聽嘅就注目禮，唔好聽嘅就係眼超超。如果係兩個相識嘅人，啤完通常仲會竊竊私語、細聲講大聲笑，非撚柒常之乞鳩人憎。

「望咩呀？仆街！」呢句我冇翻譯嘅，Colette 的確喺講緊廣東話；六年光陰，佢喺我身上學到唔少嘢，主要係衰嘢。但係唔好睇少呢條鬼妹，撇除粗口同咸濕嘢，佢落到唐人街，可以用廣東話點晒成餐茶嘅點心粉麵飯；毋須協助。

「J’en ai ras le cul……」佢雖然仲係發洩緊，但係明顯向我投以一個求助嘅眼神。

「過嚟抱抱啦。」我諗呢個時候係男朋友嘅都會咁講。

佢攬住我，個頭伏咗喺我心口，合埋眼。唔計冇鉗埋對腳上我身，佢呢個樣好似隻食飽尤加利樹葉準備瞓覺嘅樹熊，嗲得嚟幾可愛。Colette 唔係一個會隨便嗲人嘅女仔，呢啲時刻可遇不可求。

「漢城喺咪成日都係咁㗎？」Colette 回過神後問我。

「你意思係啲人粗魯，定係奇怪眼光？」見怪不怪啦。

「Both…..」佢邊講邊扁嘴。

「粗魯係經常性，冇得救；至於奇怪眼光，可能因為你係隻怪獸啩……」𠱁女仔有好多方法，玩吓佢係賣飛佛。

「你就怪獸！我係 Gwai-mui 之嘛。」Gwai-mui 者，鬼妹之謂也；我教咗佢呢個詞彙好多年。

「鬼妹就固然啦，鬼妹得你咁細粒，好似隻 toy poodle 咁，你又好難怪佢哋好奇嘅；你喺街見到隻咁 cute 嘅 toy poodle，你都埋去𢭃吓佢啦。」我認，我係調戲緊佢。

「妖！你仲要玩我喎！」Colette 嬌嗔。

「你呢幾日用一種時光倒流百幾年嘅心態，去睇呢個城市，我諗你會好過啲嘅。」我所能夠提議嘅就係咁。

的確，喺我心目中，韓國係一個擁有現代化科技同建設，但民心仲係停留喺康雍乾年代嘅國家；廿年前係咁，廿年後嘅今日都仲係咁；現代化但思想封閉。

「咁你可唔可以俾返兩支西部牛仔槍我先？」嚟自西部嘅女仔，自然有嚟自西部嘅諗法。

搭咗十九幾個站車之後，我哋終於入到高陽市。係 Colette 主動提出要入嚟睇吓我嘅工作同居住環境嘅，其實我覺得佢係嚟踢竇，睇吓我宿舍有冇其他女人嘅蛛絲馬跡。

「睇吓張床有冇長頭髮先……有冇帶過女人返嚟瞓？講！」佢坐咗喺我大脾上面，用把開信刀作狀降住我；你條仔我咪其中一個長頭髮囉。坦白講，我唔係好相信佢個心真係會咁諗，起碼唔會太認真去咁諗；不過佢好鍾意講呢啲亦都係事實。用句而家嘅說話去形容，佢呢個行為係喺我哋呢段關係中「擦存在感」。

「有，你嚟之前嗰晚先搞咗件韓妹。」既然係咁，我冇理由唔成全佢啫。

「慳啲啦！」佢又講廣東話，鬼妹講廣東話係有種特別嘅韻味。

「不如帶我去學校睇下吖！」佢提議，其實佢唔講我都諗住帶佢去睇。

放暑假嘅學校當然係空無一人，其實我都唔想撞到熟人，唔係我唔想 Colette 曝光，其實呢間學校冇乜人唔知我有個「法國妹女朋友」；只不過如果喺街上面撞到的話，大驚小怪嘅佢哋恐怕又惹來一場小騷動。

「波波池呀！」我未及制止，Colette 已經飛撲咗落去。我將波波池嘅恐怖傳說講俾佢聽，佢嚇到次音速彈返出嚟，去咗洗手間洗手。

行完學校（其實冇咩好行），同佢落咗樓下我個飯堂食嘢。我叫咗個石頭鍋飯同煎餃子兩份食。點完餐之際，突然背後傳來一聲尖叫：

「Alan!」一把我最唔想聽見嘅聲音，係 Jenny。我一時醒唔起佢住喺附近，放唔放暑假佢都會喺呢頭出沒。

「你女朋友嚟探你呀？Hello 女朋友你好！你哋幾時結婚呀？」Jenny 機關槍咁唔知係發問定發癲，Colette 仍然係一貫親切嘅笑容，嘗試緊同呢件 hyperactive 嘅𡃁妹溝通。

好不容易打發咗 Jenny，回復平靜嘅餐廳得返我哋兩個，食緊石頭鍋飯。

「個飯好辣！係喎，你個學生幾靚女喎，有冇興趣？」見到未？佢真係好鍾意講呢啲。

「未夠秤㗎。」我冇咁好氣同佢糾纏。

「我叫你同人做朋友之嘛，你諗咗去邊？」同 Colette 傾偈，轉數慢啲都會俾佢陰到。

食完飯，同佢行公園；睇嚟佢幾鍾意呢度附近嘅環境。我哋沿住公園向車站方向行去，喺天橋嘅轉角，突然又撞到熟人；今次係惠晶。

可能係冇諗過會撞到我哋，惠晶嘅表情有啲錯愕，但係好快就回復佢愛笑嘅本色。佢同 Colette 打咗個招呼，寒暄咗兩句；可能有外人嘅關係，惠晶冇平時咁百厭。

同惠晶道別之後，我同 Colette 繼續行向車站。途中佢眼尾厲住我，古古惑惑咁笑。

「咩事呢你？」我俾佢厲到有啲唔自然。

「頭先個妹妹仔，好似對你有啲嘢喎。」佢笑住講，笑得好奸。

「惠晶？唔會啦，成個男仔咁。」事實我真係乜都唔覺。

「成個男仔咁同對你有意係兩件事嚟喎馮先生，」佢仍然奸笑緊。「你啲男仔對呢啲嘢好遲鈍，但佢同我都係女仔，呢啲嘢走唔出我對眼。」

我同呢個女人一齊咁耐，從來唔知道，原來佢都係戀愛專家。

惠晶？唔會啩……

（待續）