《叔．叔》：生活之美與悲

《叔．叔》講述兩位男性的士司機柏（太保）同退左休嘅海（袁富華），隱藏自己嘅同志身份大半個世紀，甚至成家立室、生兒育女，到人生走入晚年，佢地先可以稍稍放低照顧家庭嘅責任，去尋找真正嘅愛情同幸福。雖說社會嘅風氣隨時代進步，對同志嘅歧視都慢慢減少左，但兩位老年同志又可唔可以係光明正大咁起埋一齊？面對不能坦誠相對嘅屋企人，又如何處理個人幸福同屋企人感受嘅兩難？

望穿秋水總算等到受武肺影響而要延期上映嘅《叔．叔》開畫，到觀影嘅時候呢份期待冇被背叛不特止，仲大大超出我嘅期待。一路睇一路驚嘆畫面拍得咁細膩、有美感，演員入型入格冇違和感，仲有拍攝選址係油麻地係幾咁有親切感。