從另一種方式認識毛姆：《Ashenden: Or the British Agent》

今日係世界閱讀日，為咗應節，要share下自己睇緊咩書；呢幾日我睇緊嘅係毛姆嘅《Ashenden: Or the British Agent》。

我係因為睇詹宏志先生嘅週三讀書會先至知道有呢本書。提起毛姆，佢最出名嘅就係《月亮與六便士》同《人性枷鎖》（尤其是前者，圖書館閒閒哋都有五六個唔同出版社嘅版本），但原來佢喺一戰時期係做過英國特務。詹先生發現，早年最優秀嘅間諜小說嘅作者，其實絕大部分都親身做過情報工作，原因可能因為間諜嘅工作方式隱密，無做過嘅人好難憑空想像；當然現代取得資訊嘅渠道不可同日而語，啲前情報員都紛紛出版回憶錄、心得，咁就唔使做過先識寫了。

本書仲未睇完，目前有一段我係特別深刻嘅，就係Ashenden嘅上司R要佢去對付一個喺印度帶領同胞對抗英政府嘅領袖Chandra Lal。R問Ashenden有無聽過呢個人？Ashenden答無，R瞬間黑面（毛姆寫：「佢覺得佢嘅下屬係應該要知晒佢想下屬知嘅嘢」，完全感覺到呢一刻佢身為打工仔嘅無奈）。Ashenden忍唔住講，其實Chandra有勇氣去對抗一整個大英帝國，令人印象深刻。R就講出一個上司通常會講嘅說話：「我係你就唔會擺咁多感情去睇呢件事。我哋嘅工作就係捉住佢之後殺咗佢。」國家嘅目標同個人嘅感覺往往未必一致，甚至其他間諜小說都有寫過，忠心為國效命嘅間諜因為形勢嘅轉變，可以一夜之間被國家視為敵人。詭譎多變嘅形勢同目標，人與人之間嘅衝突同互動，都係間諜小說好睇嘅地方。

剛啱見到網上有人提問，小說係杜撰嘅，會唔會將時間用嚟睇更有價值嘅書會好啲？小說誠然有虛構嘅情節，但仍然可以反映一個時代嘅面貌，同埋當時嘅人係點樣睇一件事，就好似上一段落提到嘅情節，可以反映出嗰個年代英國同印度之間嘅矛盾（以及可以超越時代嘅「下屬心聲」）。比起直接睇歷史書平舖直敘，以當時嘅小說作切入點，都不失為一個容易記憶同產生興趣嘅方法。

Ashenden唔同007，唔會有大量飛天、爆炸、左擁右抱嘅場面，如同另一位間諜小說大師勒卡雷所說，佢嘅名作《冷戰諜魂》（The Spy Who Came in from the Cold）係出緊job嗰時喺軚盤上面寫嘅，可見真實嘅間諜有時係可以幾咁無聊。但毛姆的確將啲人嘅對答反應寫得好睇（例如上面佢對R嘅形容）。呢本係我第一本毛姆，對於開拓咗新一個作家嘅領域覺得幾開心。

作者：William Somerset Maugham
出版社：Otbebook Publishing
初版出版日期：1927年
電子書：Kobo、Amazon