美麗謊言的糖衣ー《四月は君の嘘》

其實近年來講，會真係令人睇到胃痛嘅作品其實真係唔多，甚至乎真係買少見少。我相信如果近幾年最多人會覺得胃痛嘅應該係今次要介紹嘅《四月是你的謊言（四月は君の嘘）》同《Happy Sugar Life（ハッピーシュガーライフ）》。但係呢我要講一件事先，如果不幸他朝一日，有親朋好友推薦閣下觀看《Happy Sugar Life》，請記得記得記得不要墮入圈套。雖然標題《Happy Sugar Life》感覺是一套很歡樂的動畫，但實際上是一套極度黑暗和胃痛的作品，所以就算有人同你講幾好睇都好，可免則免，因為睇完12集之後，絕對有機會造成創傷或者陰影，而且加上作品體裁過分獵奇，我亦都唔會作任何介紹或者評論，只希望大家唔好接觸呢一套作品；如果大家真係想享受胃痛嘅過程，不如就睇我今日介紹嘅《四月是你的謊言》。

最近幾日，為了寫呢一篇評論，當然係再一次重溫呢一套作品。但係睇完23集之後，我完全唔知道應該如何開筆開始創作。雖然呢一套作品係2014年10月開始播放，距離現在已經超過七年，如果以今時今日大部份新番嘅畫風來講，絕對係完全唔一樣嘅畫風。不過當然唔係呢個原因啦，而係睇完成套作品之後，果一種遺憾嘅感覺仍然在腦海揮之不去。曾經有人講過，只要將呢套作品睇多幾次，就唔會再感到傷心，但係對於我每年四月都會重溫嘅人來講，都仲係會眼泛淚光，都係忍唔住喊出黎，所以我真係唔知道應該點樣開始創作。所以請俾少少時間我沉澱一下心情再開始（雖然對你地來講只係繼續睇落去，但係我足足沉澱了兩日先至可以開始繼續創作）

故事大綱係講述一個鋼琴天才有馬公生（下稱：公生）自細就被母親培育成鋼琴家，但係因為極其嚴苛嘅訓練，亦被人嘲諷為「媽媽的傀儡」、「人體節拍器」、「演奏機」、「鋼琴比賽機器」等等稱號。（如果以今天的角度出發，絕對是一名怪獸家長）但是11歲的時候母親因病離世，加上自細便接受嚴苛的鋼琴訓練，在他受到多重打擊的情況之下心理出現嚴重問題，陷入鋼琴迷惘當中。之後更加因為心理影響，而在鋼琴演奏途中聽不到鋼琴的樂聲而放棄所有演出。去到國中三年級嘅時候，經青梅竹馬好朋友澤部椿（下稱：椿）介紹之下認識了一個自由奔放演奏的小提琴手宮園薰（宮園 かをり（下稱：薰）），並且將公生重新帶回鋼琴的表演舞台上，但是最後薰因為手術失敗而離世，留下公生一人繼續在舞台上發光發亮表演。

首先講一個無咁傷心嘅題目先。如果大家對古典音樂有興趣，其實我相信或多或少都有人推介觀賞呢一套作品，因為佢當中大部份嘅樂曲都係貝多芬、蕭邦同莫札特等等經典樂曲。雖然好多人都一定唔會話點解唔聽原版，要係動畫入邊聽？但係我相信調返轉，要欣賞嘅絕對唔係樂曲演奏，而係製作組點樣將唔同嘅經典樂曲融入動畫之中。雖然當中嘅樂曲對大部份人可能都係耳熟能詳，但係加上精美嘅畫面之後，絕對係升華到另一個境界。

既然都講到製作，咁就講製作公司。製作呢一套作品嘅製作公司係株式會社A-1 Pictures，作品主要有坑錢大師系列、不起眼女主角培育法及今季大熱新番輝夜姬想讓人告白系列。雖然製作《着せ恋》同《明日同學的水手服》 嘅CloverWorks 係2018年便從A-1 Pictures獨立成為新公司，但係呢一套作品是在2014年播映，所以可以見到有好多CloverWorks同A-1 Pictures後來製作嘅動畫都有類似嘅風格。例如有定格畫風和雙人美輪美奐的演奏過程。

男主角有馬公生，佢由細到大鋼琴嘅天賦其實係絕對存在，甚至乎可以話係一個鋼琴天才。但係母親嘅過度培訓令到佢慢慢變得討厭鋼琴，甚至乎後期11歲時候母親離世更加令到自己失去方向。係動畫開頭佢有講話自己聽唔到鋼琴嘅音樂，呢個其實對於佢自己來講絕對係一個心理陰影大過聽覺受損，因為佢始終走唔出自己仍然生活係母親陰影影響之下。但係偏偏遇着剛剛，係佢煩惱升學選擇嘅時候啱啱俾佢遇到薰，令到佢唔單止可以克服心理障礙，更加願意為了薰重新踏上表演舞台。雖然結局帶着遺憾，但係畢竟呢一套作品嘅目的係想講成長。自從公生母親離開之後，佢嘅成長就停滯不前，直至到薰再一次帶佢上舞台，佢先至再一次開始成長。去到故事後期，即使佢知道薰病情已經十分嚴重，最後甚至乎離開人世，但係佢今次沒有選擇逃避，而係選擇直接面對痛苦，然後繼續成長。即使對於大家黎講，身高各方面應該都唔會有所增長，但係大家係唔同嘅事件經過之後所學到嘅成長，先至係呢一套想帶出嘅目的。

至於女主角宮園薰，雖然佢一早知道自己身體出現問題，但係仍然係有限時間入邊作出唔同嘅嘗試，甚至乎隨心所欲地演奏小提琴，可以睇得出即使一個14歲嘅少女面對死亡，仍然選擇豁達地面對。其實作者由頭到尾都沒有說明薰到底是患上了那一種疾病，但是經過多方猜測，大部份人都認為是Friedreich's Ataxia（福萊德瑞克氏運動失調症），如果有興趣就自己去維基看看是甚麼疾病。但係我地從佢嘅表現知道，使面對咁頑固嘅疾病，薰都仍然選擇做手術這一種高風險投注，而且最多只是延長一段短時間的生命，但是薰願意做手術的目的只是希望可以再一次係舞台上和公生一起表演，可以見到她絕對是喜歡公生。雖然由頭到尾他表面上只是當公生是朋友A，但是這一個美麗的謊言，先至可以令到佢兩個可以有相遇嘅機會。我唔知道應該話薰係樂觀定係將煩惱拋諸腦後，雖然佢由細到大嘅夢想就係希望公生可以為她小提琴提供伴奏，但係佢都明白旁邊嘅青梅竹馬椿才是公生嘅女朋友正選，所以先至用呢一種方法短暫踏入公生嘅世界。係最後寫比公生嘅信入邊佢都有提及，佢都知道自己無論如何都只係一個路人，但係都希望可以係鍾意嘅人入邊留低少少嘅一席位，咁樣對薰來講已經好完美咁終結。

以作品嘅時間黎講，去年四月，「宮園薰喜歡渡亮太」這一個謊言令到有馬公生去到自己面前，今年四月，宮園薰最後一封信戳破這個謊言，令到佢可以永遠留係有馬公生嘅心入邊。曾經有人講過，善意嘅謊言永遠都係美好。但其實我地每一個人，為了生活，總會對唔同人講好多唔同嘅謊言，雖然絕大部份嘅謊言都係無惡意，但係可能已經係唔經唔覺之間傷害了別人。我唔係想話一個謊言都唔好講，或者滿口謊言，但係只係希望係講下一句說話之前先諗一諗，究竟跟住講嘅謊言會唔會真係對別人有影響。係動畫入邊，薰雖然透過謊言可以拉近自從五歲開始便仰慕的男生（公生），但最後再一次令到公生需要做一次接受親朋好友離世的痛苦。雖然整套作品沒有交代他再一次失去朋友的痛苦，但係我地可以隱約透過零碎嘅畫面知道其實佢真係好痛苦。雖然無再一次失去母親時聽不到鋼琴聲的痛苦折磨，但畢竟薰對公生生命來說一個很重要的人，甚至乎可以係拯救佢出黎痛苦嘅人，遺憾嘅係最後卻要再推多一次去感受痛苦。其實睇到呢度真係好心痛，畢竟整套動畫都了陪伴大家22個星期（當年首播時候），彷彿都已經變成一家人或者親朋好友了，果一種痛苦我相信大家也能身同感受。

有一個小細節好多人都忽略，就係整套作品入邊，黑貓會出現好多次。雖然作者由始至終都無講隻黑貓係代表甚麼，但係我地可以隱約中公生成長中知道佢曾經養過一隻黑貓，但最後就被母親丟棄。雖然呢個細節只係好普通，但係彷彿就同我地講其實嗰隻黑貓就令到佢回想起母親。每當出現黑貓嘅時候，故事總係會回想起往事或者同母親嘅回憶。雖然係佢細個，母親經常厭惡嘅訓練令到佢好唔滿意，但最後公生終於明白母親留俾佢嘅係美妙嘅鋼琴演奏，雖然係好痛苦，但係可以睇得出佢能夠放低陰影其實已經係成長嘅一大步。調返轉咁睇，雖然呢一隻黑貓好似只係一個路人甲嘅角色，但係其實諗深一層，每個人成長嘅階段，都總會發生令自己畢生難忘嘅經歷，但係經過時間嘅洗禮，又有幾多人會記得。

其實我同好多人一樣，正常無端端都唔會特別接觸呢一套作品，因為真係好催淚。正如一開頭我咁講，其實我真係唔知道應該點樣係邊一個方向評論呢一套作品，雖然只係一個好普通嘅成長故事，但整個故事嘅編排，絕對唔係依家任何一套作品可以媲美。我自己睇嘅時候，都覺得每一個角色都有好鮮明嘅態度，令到大家好快就了解唔同角色嘅特性同人物關係。講到呢度，其實我都唔知自己係評論定係推薦緊比大家。如果淨係話評論，絕對好多地方可以吐槽，但係一個咁悲慘嘅故事，我已經唔想再作出評論；但係如果話推薦，其實我內心都好掙扎。雖然想推介俾大家睇，但係畢竟呢一個故事唔係日常輕鬆搞笑類型嘅作品，而真係會睇到喊嘅作品，所以真係好矛盾。不過又咁講，我相信未來都唔會有一套可以超越呢一套作品嘅新作出現，所以其實又值得大家欣賞屬於大家四月嘅共同回憶。

即使已經相隔咁多年，原作漫畫都一早完結。但係改編電影、音樂劇同舞台劇仍然有演出，甚至乎人氣仍然不減反增。雖然受到疫情影響，原本2020年5月舉行的音樂劇延期到今年的五月（如果順利的話），但係門票仍然一早完售，可見這套作品魅力依然存在。雖然舞台劇我就未能親身光臨觀看，音樂劇就應該無緣可以親臨現場觀看，但係電影版我就有睇過。雖然成日都有人話如果將一套動畫真人電影化，會令到成品變成原作粉碎機，呢一套真人電影版雖然都有少少原作粉碎機成份，但係相比起近年真人電影版，絕對係一套唔錯嘅作品。而且視覺上嘅衝擊雖然無動畫或者原作漫畫咁強烈，但係我睇完都係有少少眼濕濕，其實我都有諗過叫大家花時間去欣賞呢一套真人電影版，但係我相信就算要購買DVD或者BD都唔係咁容易嘅事，咁所以如果有機會就花多少少時間睇埋真人電影版，當然首推嘅都係動畫版先。

大約我今日要講嘅就係咁多，其實我平時睇好多唔同類型作品，基本上99.9％都係好輕鬆好開心嘅作品，完全可以放空個腦欣賞，甚至乎寫評論嘅時候都係懷着一個開心嘅心情創作；但係唯獨是呢一套作品，我完全唔知道應該點樣評論，因為我其實一路創作嘅時候，我都唔知喊咗幾多次。雖然大家都明白呢套只係一套動畫，但係佢帶俾大家嘅迴響絕對已經唔係一套動畫，甚至乎只係一套跨媒體作品咁簡單，而係大家觀賞嘅時候會唔經唔覺代入去作品入邊，成為悲傷的一人。所以即使過了許多年，每年四月大家都總是會自動回想起這一套令大家落淚的作品。如果有時間，大家不妨欣賞一下呢一套被稱為近年史上最成功嘅催淚作品。走之前希望大家可以慷慨解囊係下面拍五吓手，作為支持我創作嘅原動力，お願いします。