［性別講看覓］—姓

一、「為王家生孩子」

我的同事，嘛是學妹，有一工佇面冊寫講，伊的新婦愛上班，嘛咧讀研究所，閣有身，是第３个囡仔：「謝謝ＸＸ為王家生孩子。」

我看伊按呢寫，實在誠礙虐，「為王家生孩子」是啥物意思？王家的囡仔，你欲按怎治？你家己嘛毋是王家的囡仔，你生的，佮你新婦生的攏是王家的囡仔？

恁新婦生的是伊家己的囡仔，強調王家的囡仔是欲創啥？傳王家的種，有人接王家的名聲佮資源？你有王位，抑是事業欲予人繼承無？

伊袂記得，這馬囡仔嘛會使姓老母的姓，伊的新婦不只替伊的王家生囡仔爾爾。

二、姓老爸，抑是老母的姓？

我的後生結婚進前問我，伊若生２个囡仔，一个姓伊太太的姓，我有啥物意見？我講遐是恁家己的代誌，我無意見。

有一工我揣in來開講，問伊的想法，伊講，若攏姓老爸的姓，伊干焦是生囡仔的機器爾爾……

我講，一家兄弟姊妹無仝姓，可能愛了一寡時間佮氣力共人解說，「毋過，到時，將來，這款兄弟姊妹無仝姓的情形應該會較濟。」

囡仔出世了後，報戶口，欲姓老爸抑是老母的姓攏會使，已經實施幾若年矣！生查埔查某無相精差，毋免閣咧遐講查埔查某會使創啥，袂使做啥的古早話囉！問題是誠濟人無結婚；抑是結婚了後無生囡仔；有生的，誠濟人干焦生一个，這馬有生就誠寶貝，閣咧遐講查埔查某應該無啥物意思，干焦賰家己心內慣習的想法爾爾。

後生講的，我心內想的是，當年，我為了in老爸講愛有一个查埔的，有伊的時，去驗性別，拍算若是查某的就無愛。這件代誌事後想起來，感覺足受傷，我無應該去做驗性別的代誌。

後生in，若是頭一个生查埔，姓後生的姓，第２个不管生查埔查某，姓新婦的姓就較無問題。若是頭一个查某姓後生的姓，第２个查埔姓新婦的姓呢？若按呢，後生的老爸有啥物感覺？遐是in的代誌，佮我無關係。

（頭一个囡仔已經出世，是查某，我問是姓啥人的姓，後生講姓伊的，「無一定會閣生。」）