越南...是按底時 tuì 越南興趣趣？
我想應當是準備按臺灣徙岫到德國 ê 2017年閬縫，tī leh 等待出發到 tuì 我來講並 buē 生份 ê 德國 ê 彼段期間，我 ê 心情一直浮浮 buē 定致到本底掠做 ē 讀 ê 冊成做冊桌 ê 妝娗。心浮浮 buē 定又閣捎無浮 ê 寮仔門，上網踅旅行社是我上佮意 ê 事項。就按呢自從到今 m̄ 捌想過行踏越南 ê 我就綴「跳樓大拍賣」起行。
出發前清楚知影家己是參加佗一類型 ê 旅行團，所致我 m̄ 捌 uī-tio̍h 這逝 ê 行踏特別上冊店或是網路搜揣資料補腦。起因，我清楚知影家己參加 ê 因端佮需求。越南有啥特別？無啥特別。
旅行社有遐爾仔 tsuē 行程 uī-hô 選擇這團？因為俗甲 hōo 我感覺準做開錢出國踅土產店，我 ê 旅行記錄原仔是加一个國家 -- 越南，tshan-tshiūnn 往過捌聽人 kā 盤機國家(kan-ta tī 機場) mā 算做一个家己捌行踏過 ê 國家。清楚家己 ê 想法佮虛華，我 tuì 開錢請𪜶𤆬我出門 ê 旅行社無任何主意或是哭呻，tshan-tshiūnn 朋友參加8000塊 ê 泰國團轉來，伊 ê 茶鈷原仔 m̄ 願禁火 teh 呻 buē 離。 雖罔，我 tuì 這逝 ê 越南行踏無啥主意，不過我 tuì 越南原仔紮我按 Good Morning, Vietnam、Heaven & Earth、Platoon、Indochine 等等 ê 印象外加好食 ê 越南米粉。
二十外歲綴按加拿大來臺灣讀冊最後踮咱台灣娶某生囡 ê 主管食伊 ê 紹介 ê 越南米粉就愛著越南米粉 ê 我成做這逝猶未行踏越南上大 ê 期待佮驚惶...我足驚 ē 食歹腹肚。我 m̄ 是驚伊無衛生，是驚家己食傷 tsuē tshan-tshiūnn 第一斗行踏 Italia m̄ 噤喙拚勢食 Gelato ê 短短快樂就是愛 kā 伊換做捷捷走便所 ê 痛苦。
寫著越南料理 hōo 我想著于美人捌分張 ê 故事「巴黎的越南米粉是我吃過最好吃的一次」，猶未行踏越南 ê 我 mā 有仝款 ê 想法，只不過我 ê 角勢佮伊無相𫝛，我食著上好食 ê 越南料理是 tī Dijon ê 菜市仔。猶未出門就 teh 驚惶 mā 是無聊，另外我是綴團 bueh 自在揣物件食 ê 機會決定無遐爾仔簡單，sóo-tí 這是閒甲掠蝨母來煩惱 ê 無聊代。
出發前 mā 因為清楚知影家己是綴啥物價數 ê 團，sóo-tí 我 tuì 領隊佮當地 ê HiHi導覽先生 buē 有任何 ê 向望。因為按呢 ê 態度 mā 成做我按越南一轉來到臺灣紲落來徙岫到德國，見到因為簽證問題 hōo 伊無興行踏越南 ê 翁講 ê 第一句話是「有機會，我想 bueh 繼續行踏越南，準做我放火燒厝你原仔鼻無厝(趣)味 mā 無要緊。」
我一直掠做綴團特別是這款跳樓大落價 ê 團，當地導遊決定 buē 遐爾仔頂真紹介家己 ê 文化歷史 m̄-koh 認真賣土產。我有朋友綴團去 Italia 一路 kan-ta 聽著佗位 ē-tàng bué 名牌 hōo 伊氣甲講「早知就綴恁家己拖鞄去 Italia。」
咱無一个人有法度早若知，咱 kan-ta 有法度親身體驗咱好玄佮想捌理解 ê m̄ 知。Tī 越南短短 ê 5工，那聽𠢕講華語 mā 𠢕講臺語 ê 導遊那賣土產那分張越南歷史 hōo 我思考這件代誌，咱 tuì 越南 ê 印象是按怎來？
我 m̄ 捌越南，我認捌 ê 越南是按電影來，紲落來就是隔壁厝邊開始有越南太太相做伴，雖罔我佮遮 ê 越南太太無啥話通講，總是𪜶是我消敨枵饞 ê 好所在。這回綴團行踏越南，那聽導遊分張越南歷史，那想看過 ê 電影，我 tuì 越南 ê 理解正經是少甲 tsham 咱臺灣𫝛款 ê 冇。
離開越南，轉來臺灣踅 Books 看著「越南脫離中國追求自由與認同的原動力」我想著𫝛款真𠢕賣土產 mā 真𠢕講故事 ê 柬埔寨導遊佮捌 tī 公視【誰來晚餐11-3】台語甘毋我愛你 這集聽蔣為文教授分張 ê 越南史隨決定 bué 冊，只不過冊按臺灣飛來到德國 tsuē 冬 m̄ 捌摸過。
這回因為電視播出 Vịnh Hạ Long ê 畫面 hōo 我想著這本《半島之龍》隨反出來讀，我想著越南 ê 五工。Tī 彼五工進前，我 tuì 咱厝邊佮家己 ê 歷史就若潘佩珠〈獄中記〉「在法國入侵之前，我們國家的人民只知道中華；在法國佔領越南後，只知道有法國。世界的變遷和風潮，似乎完全沒有得到國民的關心。」ê 悲哀。Tī 彼五工了後，我 tuì 咱厝邊佮家己 ê 人文歷史猶原是認捌甲悲哀 ê 少，總是會使得迵過別人 ê 經驗楦閣我 ê m̄ 捌。
2023.06.12
