台語文學
「一、二、三、四、五，這是我五个阿兄，尊稱『五虎將』，是大士爺廟的衝組，我是上細漢、無人知的屘虎爺。下街的頭一日看鬼王囂俳甲，阮六隻虎代先衝出去拚。無疑悟，鬼王傷過奢颺，能量太強，阮實在袂擋得，紲抽退覕神轎內底。這个鬼王夭壽奸詭，踮轎跤囤規堆的炮仔，就欲來點火，大兄知影伊欲出步數是『食炮』，隨共我踢出去，好佳哉，我干焦尾溜臭火焦爾爾……毋過，我可憐的阿兄啊！煞去予薰甲昏昏死死去啦！」哈囉目屎㴙㴙滴。
「唉！講來話頭長，我請眾神尊來分拆……。」哈囉的尾溜比對廟內底去，神光白茫茫，挩窗眼前的大士爺廟煞來徛起來，成做按空中看落去的圖稿，憑頭是三川殿、中埕、大殿、後殿，猶有配殿掛雙爿。
上起頭，後殿閃閃爍，媽祖按正中央的香房行出來，講：「是我保庇眾善信平安過烏水溝，恁人才有法度踮台灣安居樂業。予恁水、予恁火，予恁風佮日頭來發電，恁猶嫌無夠，去國外引核能入來，講啥物清氣啊！衛生啊！安全啊！這聲害啊！鬼王共核能的原理剪過手，拚勢來發電，失去了控制，四界亂亂傱，連阮神明嘛無伊法！僥倖啊！了然啊！」媽祖婆話拄講完，千里眼順風耳隨揤倚挩窗，講話神經質啊神經質：「恁人無照天理，天毋但無照甲子，閣亂甲無一塊啦！」
這時，倒手爿配祀的龕仔，土地公頭戴員外帽，頭毛喙鬚白，柺仔揬咧揬咧勻聊仔行出來：
「恁人去抾彼个啥物上細粒珠仔，去挵別位的細粒珠仔，一粒挵一粒閣一粒一粒，挵甲無臭無潲，講啥物茶鈷篤篤仔滾，水煙熗出來就有電矣啥物潲！騙痟的！當做雞僆仔生卵，有遐輕可好空的代誌！雞屎垃儳臭毛毛，無人愛嘛毋知欲摒去佗位！」
仝款是媽祖倒手爿的配殿，換烏面烏鬚的城隍來講話：「土地公你莫講遐的土話，咱神明就該讀冊，才有法度徹理。核能發電，是共燃料棒縛規束，囊入去壓力槽，浸佇水底予溫度升懸，透過熱能帶動車葉仔，使其轉動產生電能，這才是正確的原理。」城隍爺那講那捋喙鬚。
「哼！哼！哼！城隍你冊讀較懸，學問真飽，你巧！你一流的！我嘛共你呵咾！毋過，這馬代誌遮大條，彼鈷水硞硞燒、燒袂停強欲焦去啊！無定著會爆炸⋯⋯你遐𠢕講！敢有法度敨？」土地公唱聲矣。
