Khó͘ Kéng-sûn（許景純） tī 月琴民謠節 ê 舞台唱中國話民歌『月琴』 kap Tâi-gí 歌「愛拚才會贏」ê 意思是 m̄ 是看咱 Tâi-oân 民謠文化 bô？
10月初 2, 初 3 是 Pat-tâu 月琴民謠節上尾 2 工, 上大尾 ê 演出者 lóng 安排 tī 這 2 工 ê 節目內底, 所以就算 sī 袂記得其他 ê 安排上無 mā 會記得 ài 來聽這 2 工暗時 ê 表演！
我想欲講 ê tō-sī 10 月初 2 這工發生 ê 代誌, m̄-koh 這是 góa 個人 ê 看法啦, 予大家參考看覓！其實咱 lóng 知明明, Tâi-gí tī 中華民國社會內當 leh 死亡 ê 過程, 序大人無 beh 講予少年人聽, mā 無意願為著家己母語文化徛起來拍拚對抗, 請注意, 我講 ê 反抗毋是以早彼款 chàm 街頭抗爭, 是去社會內底逐位所在 kā 囡仔用 Tâi-gí 講予 in 聽, 講予 in 了解, 重點 sī 愛用 Tâi-gí！
這 sī 需要 phēng chàm 街頭閣較拚勢 ê 力頭, 閣較長期 ê 意志堅持才有法度做會到 ê tāi-chì, 所以 góa 才講「拍拚反抗」！
Tī 網路咱開始看會著一寡「Ma-ma 團體」teh 辦母語共學活動, 揣無仝專業 ê siăn-sé-i（Teacher）來 kā 規个家庭成員上課, 全全講 Tâi-gí, 予爸母 kap 囡仔共齊學習用母語生活, 用母語講百百款世事！
因為 chia-ê 爸母已經有意識著, 若無按呢做, 真緊 in ê 囡仔 tō 袂曉講 Tâi-gí, 嘛袂閣有遐爾好 ê 機會 kap 爸母講咱 Tâi-oân-lâng ê 爸母話啊！
中華民國「國語教育」造成對 Tâi-oân 母語 ê 傷害彼咱 lóng 知影, 閣較嚴重 ê 凡勢 sī 這款文化殖民教育培養出來 ê 「文化斷根」 ê 公共人物 kap 藝人！
咱遮 tō 用 Khó͘ Kéng-sûn 做例來 káng！
10 初 2 彼工 ê 演出伊排 tī 朱閑至演出 ê 後壁, 朱先生 sī 客家藝術家, 會曉演奏月琴 koh tī 頂懸畫圖, 畫 kah 欲辦畫展, 毋閣我聽 i leh 表演時陣 ê 聲嗽真刁工 beh tián 工夫, 講阿媽 tō 唱 Tâi-gí, 客語, 若欲演奏流行--ê tō 彈原住民調 kap Jazz, 毋閣講話 tō 全中國話, 我是聽了 chok gāi-gio̍h, kan-na 伊手頭彼支家己畫 kah súi-súi ê 月琴 khah 予我有印象, 其他 ê 表演誠無伊本身 ê 特色！凡勢 sī 伊講 siuⁿ 濟中國話啊！
Soah 落來 tō-sī Khó͘--ê 上台, 朱 sàng 留 tiàm 台頂做伊 ê 伴奏, 橫直伊本底 tō-sī 歌手專業！ 頭前伊唱 siáⁿ 我竟然驚惶 kah 到 chín 完全袂記得, 咱 tō 知影我彼工 sī 偌爾仔無爽快...
伊講 tiō 咱來唱 Tâi-gí 歌 ê 時陣, 竟然頭一 ê 想著--ê sī 「愛拚才會贏」, 而且 tō 直接 ài 大家綴伊唱, 我規个人 chŏaⁿ gâng--去....到底這塊歌 kap Pat-tâu 民謠節有啥關係？毋管是文化意義 a̍h-sī 月琴藝術 ê 發展, lóng 袂去 kap 「愛拚才會贏」kap 鬥陣, 到底伊頭殼內底 sī kā 台灣話, Tâi-gí-koa 想做啥物款 ê 文化？
A̍h-sī 講伊無準備, 臨時臨曜 kan-na 想著這塊 koa niā-niā, 敢講伊對 Pat-tâu 月琴民謠 ê 認捌 tō-sī 「愛拚才會贏」 這種印象？ 咱敢知影伊以早 koh 捌出唱片, 內底有一條「毋通嫌台灣」？ 伊若真正想無歌, 上無唱這條 mā 較贏唱「愛拚才會贏」, 歌詞 ê 意境 mā kap 月琴民謠節活動 ê 「傳承 ti̍t」 khah ē ha̍h 敢毋是按呢生？自這點我 tō chok 看伊無點, thài 會有藝人遮爾仔失禮數, chok 無專業！
Soah--落來伊 koh 欲唱古早時中國話民歌『月琴』, 伊 tăⁿ 講出喙我 tō giông 欲吐血 ah, 毋但 sī 因為 he sī 中國話 ê koa……伊唱第一字 ê 時毋知是 Mic 聲音 a̍h-sī 耳機 ê 問題, 臨時要求 beh 重來一 kái, 彼毋但 Lah-pah 開 kah 欲盡磅, 伊 koh 刁工 giú 懸聲嗽, 袂輸欲唱 kah 規个溫泉公園四箍圍仔 lóng 聽著 ê 款, 我真正 sī 聽 kah 規 ê 人風火著, 是按怎你唱 Tâi-gí-koa ê 時陣無欲 kéng 這款會當展聲嗽, 展風神 ê koa, tō kan-na 欲唱「愛拚才會贏」這條 kap 月琴民謠無底代 ê koa？
我 teh 想這凡勢 tō-sī 伊本身 chih-chiap ê 人 kap 生活無要意 Tâi-oân ê 母語文化, 尤其 sī Tâi-gí 文化！ 看伊逐擺 teh 電視頂懸唱歌 koh khah 按怎 to 彼幾條, 極加 mā sī tián 伊本身 ê 聲嗽 niā-niā, 其他 ê 表現 kap 中華民國演藝界遐 ê 中華認同 ê 藝人無啥精差, 喙 kóng 「狗語」 若講著 Tâi-gí tō-sī 一寡古早選舉歌, 無欲唱 khah 有藝術性 ê 作品, 簡單講 tō-sī 看 Tâi-gí 無文化！你看伊 kap 林麗珍 ê 「無垢舞蹈團」合作演出 ê 表現 sī 偌爾仔「尊重」, 是按怎chham-ka Pat-tâu 月琴民謠節 ê 表現差遮濟？ 敢是彼款表演水準 khah 懸 nih？
