勞健保費

最近看著立法院ê新聞，內面講著有關罷免、勞健保等等代誌。佇注意著健保有關ê消息了後，佇遮我想欲分享家己對勞健保ê看法：

「勞健保ê本質是稅收，毋是保險。」我百分之二百同意這句話。

細漢時陣攏無咧管健保這件代誌，出社會了後才知影較濟保險、水電錢、稅收有關ê代誌（心酸），尤其是佇知影勞健保ê收錢制度了後，就愈來愈感覺健保根本毋是「保險」，顛倒是「稅收」。

是按怎按呢講？因為「保險」是照「風險程度」來規定收錢ê標準，稅收ê標準是照「偌濟月給」來規定。若是健保真正是「保險」，就會按呢收錢：定定破病ê人就繳較濟錢，身體健康ê人就照家己ê意思選擇敢欲繳錢。事實就是健保和稅收仝款，攏是照月給來收錢，而且閣是提家己趁來ê辛苦錢來鬥破病人出錢。

若照這馬二代健保ê規定，我本底就無啥滿意這款制度設計。最近抑閣有健保有關ê消息，予我開始佇繳勞健保這件代誌躊躇，而且閣有足濟想法。

無人知影未來ê發展，對有學一寡歷史ê我來講，其實是無啥樂觀。大家會當參考1820-1840佮1920-1940這兩段時代ê大事紀。

歷史ê本質，毋是一條線，其實是咧踅玲瑯（循環）。

希望讀著這篇文章ê有緣人，嘛會當開始思考這件代誌。