Buē 記持紮卷冊出門，等車 ê 車頭拄好有網路通消敨等車幫 ê 閬縫，隨𫝻 hōo 我摒甲空空 ê YouTube 𪜶 tī 無關鍵字 ê 幫贊之下出啥物 Überraschung。
凡勢 Google Search 見我 ê lòo-kher 是田螺循舊逝，較行 mā 彼逝齊揣飯頓圖，所致交 YouTube 綁做伙 ê 伊順我 ê 麭幼仔推薦 DAY DAY 台語台「#陳隨意 #家常菜 #公視台語台 ê 泰式涼拌荷包蛋超級開胃又消暑！荷包蛋原來還可以這樣煎！｜隨意好料理｜幸福好厝邊｜陳隨意 營養師余朱青｜食譜 料理教室｜公視台語台。」
四月天 ê 德國天氣猶無夠燒熱，不過這是一份敆 gún 翁仔姐簽定飯頓和平協議 ê 菜色：早起頓做陣成做歐洲人，下昏飯做陣成做亞洲人。 出菜前又閣成做貓想 bueh 知影歐洲敢有相𫝛 ê 味素隨請網路大神賜我智慧生。Spiegelei Salat 拍落下，隨現一捾交卵有相關 ê Salat，像 Sommersalat Bunter Mix mit Spiegelei, Rustikaler Salat mit Kartoffeln und Spiegelei 這類以關鍵字做拋魚交以原意做拋網 ê 結果是無宛 2 體 ê 交幸福好厝邊一屑仔攏無相仝，繼續拋網繼續罟魚，總算 hōo 我揣著店設 tī 荷蘭 m̄-koh 生理做甲德國 ê 網頁 Thai-Salat mit Spiegelei 順這个網頁 ê 泰文寫法 YAM KAI DAO 拋網，掠著 ê 魚 tsuē 甲 hōo 我笑咍咍。
我討厭 Google 厚甲若蠓 ê 廣告，總是 Google 猶是比 CCleaner 交 gún 翁近來痴迷 ê Mullvad Leta 閣較好罟魚。
陳隨意總舖師 ê 醬料 tī gún 兜銷無路，我愛 ê 芫荽是龍鳳生活 ê 核子彈，所致我以 gún 兜 ê 喙斗順各路手路出一份無魚露 m̄-koh Sòo-sù 飽滇，菜蔬豐沛，卵包赤赤芳芳 ê YAM KAI DAO。
早起頓食飯飽照慣勢那窮碗盤那問喙白老嬰「咱 kā 美食家請教一下，這無魚露 ê 泰國料理敢有敆米其林 ê 喙斗？」
「當然 mā 是缺喙食蛤仔肉，峇峇」翁那挲腹肚那笑甲裂獅獅。
「按呢你 ê 露營食食又閣湠一味，特別是卵包料理按卵包羅馬萵仔菜湠甲 YAM KAI DAO」我講。
近來又閣爸母上童 ê 伊隨剾洗家己「我真正無法度理解，我呔愛遮爾仔得失土地公，飼無雞，我明明就愛灶空炰田蛤交你相佮....」
「灶空炰鱔魚，愛燒鰻(相瞞)交綿死綿爛欠錢怨債主，不孝怨父母，十五枝枴仔攑雙手，七拐八拐一直騙是恁兜 ê 傳統」我峇微笑應。
「我交𪜶明明是門扇鬥 buē 峇卻一直做寡隱痀拋車輪，頭較大身...歹勢，我真正足歹勢。」
德文有一句話形容 Ich habe die Nase Voll, die macht mich fertig 來表示火車行到蘇澳，盡磅了，翁承𪜶爸母 ê 外甥仔點燈火，一切照舅(舊) ê 歹癖我 mā 無彼个興頭繼續講落去，總是這斗 ê 草人幔棕蓑，假鬼假怪兼搪著問題 kan-ta 想 bueh 捎胡蠅窒虎喙確實 hōo 伊舞甲頭較大身 ê 厝內險 bueh 飼無好雞 m̄-koh 兩隻老雞公交雞母交伊相扯規世人。
別人兜 ê 狗肉數，相咬代寫到遮，我 kan-ta 向望 m̄ 驚少年苦，只驚老來窮 ê 豬八戒拜天公莫閣挨挨陣陣來相揣 hōo 我會使得沓沓仔翻頭繼續翁講 ê 我愛食老出癖，翁親某親，老公婆仔拋車輪，按呢你 tuì 我 ê 愛 tsiah 有法度踅轉來到向時六月天 ê 火燒埔。
我 tuì gún 翁 ê 愛情一直是愛情 ê 熱度，tshan-tshiūnn 六月天 ê 火燒埔，總是伊慣勢 ê 大狗盤牆，細狗看樣 hōo 我 ê 愛情宛然火車沓沓仔行到蘇澳，盡磅了真僫日時搬布袋戲，暗時唱歌仔戲。
不過人生宛然黃錦田分張 ê 這段話「20 歲進前像猴，30 歲進前像貓，60 歲進前做牛做馬，70 歲 tshan-tshiūnn 狗顧門，80 歲 tshan-tshiūnn 豬」每一个階段有無仝 ê 感受，往過 ê 火車行到蘇澳就盡磅，這久 ê 火車有法度落南上北閣南迴。
一段牽甲比 gún 爸母閣較遠 ê 姻緣，無向時 ê 第三者問題，無相罵無揀喙，相拍無揀位磕 buē 著 ê 發輦，唯獨自帕水就慣勢 ê 家教 hōo 伊僫有同理心 kā 孔子媽教的龜叨鱉趖當做是人生四常，準做按呢伊猶看有家己 ê 耳仔生兩葉，反省家己敢 bueh 綿豉承爸母性地 hōo 家己 ê 姻緣行向小妹 ê 離緣兩斗，伊離緣一斗。
Gún-ê 龍鳳情經過這斗 ê 大風颱敢有才調恢復到大風颱進前 ê 生張，我無確定總是我見著伊 ê 退嚾 hōo 我有信心 tī 今年 ê 車日子露營養 kā 北非小米沙拉交生冷卵包沙拉兌現 tī 西班牙。
寫著西班牙目䀐 uī-tio̍h 心行尞畫面 buē 焦燥開始反燒 tī CD ê 行跤花錄相片 tsiah 發見掠做 buē phàng-kìnn ê 記持經過 10 外冬 mā 成做需要挕捒 ê 舊漚舊臭，特別是十冬前 ê 時行到今猶原相𫝛，卻因為 Windows 不斷更新 hōo 設備 tsiâu-tsn̂g 唯獨軟體無法度更新 ê FUJITSU 活活成做瘸跤，猶原健欉 ê 電腦交活跳跳 ê 語言因為遮 ê 小變化成做歹銅舊錫需要擲挕捒 hōo 我微稀矣，不過我猶原愛我 ê 稀微，起因無遐 ê CD 大腦 ê 搜揣 ia̋n-jin 猶是搜揣行跤花錄粒積上讚 ê 工具，像交翁做陣 tī 居民協力以家己 ê 力量維護當地古蹟 ê Medinaceli, 唐吉訶德大龐風車 ê La Mancha, 歐洲南尾角 ê Tarifa, 記錄 1936 西班牙內戰光景 ê Jerez...齊是科技軟體無法度阻擋 ê 美麗。
龍鳳生活宛然無法度運作 ê CD 交健欉 m̄-koh 軟體交硬體無法度相敆 ê 電腦，食食 mā 相𫝛，別人 ê 手路咱食 buē 慣勢，咱就家己調整味素 hōo 家己田螺循舊路，巡出新 ê 路。
生冷卵包沙拉，簡單料理閣美味しい。
2025.04.27
