翁講食林檎蓋健康，所以愛 bué 一袋2公斤半。
看伊又閣受著價數 ê 影響，我講「你想 bueh 閣耍一斗俗物食破家 ê 活動？」
「我是𠢕扞數 m̄ 是食破家」伊應。「曷無咱閣來做一改試驗，看 tsiâ tsiah 是彼隻雞」我講。
「好，彼隻雞決定 m̄ 是我」伊拍胸坎掛保證。
「我 kā 你掛保證，這注絕對又閣是我贏」我 uì 伊 ê 胸坎仔輕輕仔頓一个印仔。
一月日後彼袋 2 公斤半 ê 林檎原仔規袋好好 mā 沓沓轉型成做我囡仔時上愛食 ê「蘋果麵包」，不過伊是自然發酵 ê 酸芳味 m̄ 是 uī-tio̍h「蘋果」2字特別加林檎芳素 ê 化工物。
四常我 buē 遮爾仔討債 kā 物件囥甲生菇，總是 uī-tio̍h 這斗迒 buē 過 ê 驚 hōo 雷公摃落舂臼地獄 mā 是愛迒過，抑無我就入 gún 翁設 ê 囮，成做伊人生上愛 ê 女子𪜶兜勥母 ê 烏面賊。
林檎祀佛公祀一日月兼四常是好鼻獅 ê 牽手呔討步頻鼻 buē 著林檎沓沓仔 teh 發酵 ê 氣味，伊問「你敢鼻無咱兜有一種果子 teh 發酵 ê 味？」
「咱兜 ê 果子這禮拜 tsiah 款，遮 ê 果子猶茈需要隱，呔有可能發酵」我在水清楚伊 teh 講啥，總是硩好離手，無見答案 buē 使得撏錢賠注。伊知影牽手佯戇戇，uī-tio̍h 喙脣一粒珠，講話 m̄ 認輸，我上內行，準做鴨母食水龜，進退兩難 mā 愛跟綴牽手搬戲，畢竟牽手 tuì 𪜶兜愛搬 ê 戲齣像 buē 泅嫌溪狹交四界講死人欠伊偌 tsuē 債是鼻無鳥鼠無洗身軀，有鼠(趣)味，像𪜶勥爸按呢，愛甲若六月天 ê 火燒埔。
翁某互相比氣長，我心中無邪 m̄ 驚鬼據在林檎按青春少女行入杖朝(tiōng-tiâu)之歲，伊開始感覺交官窮交鬼死，交牛販食了米，交爸母愛榻本(thap-pún)，總是落軟開喙「我痟貪軁雞籠，鐵齒銅牙槽，愛激派頭張身勢像 gún 爸母凡事認為家己𠢕 ê 假𠢕，這林檎閣繼續囥落去連漚梨仔攏比伊好味素，我敢會使得請媠某你 kā 我鬥相共處理這个問題？」
當著伊變款，我第一个動作就是 kā 手伸去焐伊 ê 頭殼額，這个若貫捾(kǹg-kuann)求平安 ê 動作 mā 是六月蚶，開喙臭前 ê 保庇，無伊我真僫換好喙。
「我無發燒，無變款」翁知影這是牽手答應 ê 動作，我微微仔笑應「愛著較慘死。」
「啥物意思？」翁問。
「意思是我非常願意 kā 你鬥相共」我輕輕仔搭伊 ê 胸坎，後一秒隨泅入網路請眾神鬥相共，核桃林檎醬、煎餅....
2025.05.21 翻頭看 2021.12.05 彼陣 ê 骨力，林檎煎餅成做歷史，彼陣 ê 核桃林檎醬成做白汫無味 buē 閣翻頭相借問，彼久 ê 黃蓮(n̂g-nî)水洗頭，苦惱 mā 跟綴心境轉變成做狗拍咳啾，免掛意 ê 隨人付米，隨人落鼎。寫部落格正經是一件好代誌，伊引𤆬我行出做木 ê 戴枷：情緒烏空交自我叨撚。
感謝部落格 hōo 我揣著綁青掛豬肉 ê 方法 mā 感謝家己 buē 閣十五枝枴仔攑雙手，七拐八拐，一直騙家己 Alles kann besser werden 一切 ē 愈來愈好。規魂舒齊毒 ê 人，伊 tshan-tshiūnn 海沙仔厝，伊 buē 因為你骨力翻厝，遐 ê kā 你齷齪甲心狂火著兼財庫愈來愈空 ê 問題就 ē 走甲無看影，解決海沙仔厝唯一 ê 辦法就是規間敲掉重起。
海沙仔厝消失幾仔冬，厝內 ê 林檎自 2021.12.05 mā m̄ 捌閣痟貪軁雞籠 ê 掠做家己是𠢕儉起樓堂，m̄ 是 buē 儉賣田園 kā 家己舞甲若隱疱拋捙輪，食力閣歹看，gún 兜 ê 林檎猶原跟綴市場變化成做序大 ê 番薯，食甲 ē 驚。
阿羅來德國做穡，gún 翁仔姐看伊按 buē 娶某到娶某生囝 ê 因為稅厝 ê 空間無夠晟養第二个囡仔搬離 gún 社區，伊猶是不三時交 gún 分張伊 ê 工作福利 hōo 頇顢 tī 臺灣交人盤撋到德國閣較飯桶交人成做厝邊 ê 我感受囡仔時厚厚 ê 人情味 mā 有機會享受四常較 buē 投資 ê 果子，像算粒賣 ê 時計果、大細若拳頭拇一粒就愛 5€ ê 王梨抑是木瓜。
阿羅交 gún 分張福利品進前，我 tī Netto mā 捾一袋 2 公斤半，一公斤價數無到 1€ ê 林檎轉來做敆優格 ê 果子料。Tī 這捾林檎敢若《屁窒仔的謝師宴》〈望後冬〉ê 菜頭，阿羅 mā 捾一袋𫝛公斤數，只不過包裝袋仔換做紙袋仔 ê 林檎 hôo gún，我喜歡甲直講多謝，斡頭隨上家己 ê 部落格揣記錄過 ê 食譜，畢竟這久是立夏，青蘢蘢林檎 mā buē 堪得夏天 ê 甜言蜜言，一暝睏醒按囡仔轉骨做少女閣成做婦人人。
林檎敆生菜做生菜盤，林檎敆鱷梨仔絞做林檎鱷梨仔醬，林檎敆挽肉做林檎肉豉仔，遮爾仔骨友食林檎，林檎猶原若玉山懸度 m̄ 捌減少過...放家己自由莫閣叨然點璜火燈。
「食物遮討債，揣佛祖進前，先揣閰王」囡仔時搪著無愛食 ê 物，想 bueh kā 伊偷偷仔提去倒潘桶 hōo 輪火鬮 ê 阿媽摠著，阿媽齊講這段話 hōo 我到今 m̄ 敢留半屑仔肉幼仔 tī 碗盤，抑是像德國厝邊按呢物件 bué 一大堆，紲落來規隨个仔隨个保持完整出現 tī 糞埽桶。大狗盤牆，細狗看樣，gún 翁 mā 捌按呢生。
部落格記錄 ê 核桃林檎醬拆白講白汫無素無敆喙 m̄-koh 攝影 buē 䆀看...莫 kā 走徙。按家己 ê 部落格搬徙到 Google，按 Google Apfelaufstrich 請示到 Apple Spread 敢是林檎 ê 特性，德文交英文齊是甜粅粅？不過林檎就有才調交紅菜頭 hām 薑成做果子醬，當我想著這味有淡薄仔薑薟 ê 果子醬，Google 齒盤 mā 生出 Apfel mit Möhren Aufstrich，目標設定好勢隨請 Google 鬥相共，一切就著頭甲一帆駛甲到。
Google 請教來 ê 食譜是罐頭鴟鴞喙豆敆林檎絞做醬，第一斗試鹹汫我順 Google 食譜手路出菜，伊誠好味素，總是伊 tuì 我來講較成果子醬抑是 Apfelmus 林檎泥，較無抹醬 ê 範。
厝內猶有 2 月專工去捷克越南人市場絞頭鬃順紲踅超市款轉來 ê 鴟鴞喙豆焦料，隨攢 150g 兩人份浸水透暝，隔轉日𤉙點外鐘翕半點鐘，水湢 hōo 焦交林檎絞做若粕，嫌伊傷過焦 Khu-lì-mù Tshì-sù 濫落去閣絞一斗，這斗有 Hummus 鴟鴞喙豆醬 ê 形矣。
頂回出菜，凡勢是鴟鴞喙豆食水所致斤兩較無焦料實櫼 mā 凡勢無透 175g ê Khu-lì-mù Tshì-sù 所致這斗 ê gún 無才調田螺巡舊逝，較行 mā 仝逝 kā 鴟鴞喙豆醬食甲清氣啖啖，是講前幾日 ê 鱷梨仔 Quark 醬 mā 透濫 400g ê 德國 Khu-lì-mù Tshì-sù，而且是這斗 ê 雙倍，gún mā 食甲清氣啖啖....數字正港是參考 m̄ 是唯一 ê 答案。
240g 2 人份 ê 鴟鴞喙豆罐頭，食甲清氣啖啖。
150g 2 人份 ê 鴟鴞喙豆焦料，愛食兩頓。
𫝛款 ê 鴟鴞喙豆無𫝛款 ê 料理手法 tuì 大腦感受飽滇哽胿敢有影響，這屬專業問題，weiter 跳過閬過，總是按這斗經驗我總算理解，鴟鴞喙豆呔討算做卵白質 ê 因端。
2025.05.21
