近來綿著甜番薑仔就不三時款伊做沙拉 hōo 食頓愛先交伊相借喙 ê 夜間部同學暗時食西瓜，半暝仔反症講 tuì 我傳世佛經，世世(踅踅)唸我自本就愛食番薑仔，只要你 kā 伊切甲若肉豉仔我就 buē 做 Mǹg-sǹg tuì 你傳世佛經，世世(踅踅)唸。」
「雜唸大家出蠻皮新婦，捷見官 buē 畏，捷食酒 buē 醉，你會使得繼續承恁爸母 ê 喙斗做 Mǹg-sǹg 大丈夫，起因 Das ist mir Wurst wie Hülle」我講。
「我姓恁兜 ê 姓」聽牽手一屑仔攏無要意伊 ê 情緒叨撚隨轉喙。「咱孤人姓孤姓，你 ê 串驚串著情緒叨撚是我目今 ê jiàn-bà 若褲，一屑仔攏無差別➀」我微微仔笑應。
我是社區唯一一个無疊翁姓抑是某姓 ê 人，這个孤人徛孤名 hōo tsuē-tsuē 新搬來 ê 人掠做 gún 是男女朋友。
斟一杯茶，廣告單做茶跙仔，紲落來大力 kā 抽出微微仔笑講「歹勢，我正港無這个美德認為翁某著愛透流。」
見牽手遮爾仔文雅點揬伊 ê 狗咬鐵釘，伊知影伊 ê 帶身命無好好仔治療，有一日伊 ē 枵飢失頓兼頭較大身，像𪜶爸母好好仔鱟刣甲屎那流，現代醫學 m̄ 管按怎發達，人 m̄ 願培養 ê 生活習慣 mā 是無較縒。
德國愈來愈沈重 ê 醫療負擔，順𪜶 ê 專家分張「錯誤 ê 生活慣勢交歹鳥 m̄ 知飛，歹柴破 buē 開 ê 食食慣勢，是造成咱醫療負擔上大 ê 問題。」
Gún 翁家己講過，無我 tī 德國做家甲，伊 ê 血壓無可能降到目今 ê 標準，半頭風 mā 無可能走甲無看人。根據統計德國有 5 千萬人有半頭風問題，大部份 ê 半頭風是個人生活習慣飼出來，像 m̄ 啉水 kā 甜粅粅 ê 飲料做滾水灌。
「你 m̄ 免 kā 歹話當做好話聽，我 ē 改你牽 m̄ 行，gún 爸母牽溜溜行 ê 歹癖」伊講。
凡勢五錢豬仔，掛一支喙，五斤番薯，臭八十一兩，番薯敢有臭香 tuì 我來講齊是草花食 buē 大箍，免要意 ê 代誌➁，m̄ 免交伊繼續大麵炒圓仔，膏膏纏討論遮 ê 白汫無味，畢竟你交離經 ê 屁窒仔 Oskar➂講道理 tshan-tshiūnn 青盲 ê 看告示，無彩工。
天不生無祿之人，每一个形體 ê 存在有伊家己 ê 意義，番薑仔是伊 ê 天公 ê 數簿：大冊(慼)抑是興做歹扭搦 ê 人像𪜶爸母 kan-ta 伊家己上理解，我 m̄ 免纏綴伊 ê 六月天，講變就變來擘腹操煩，抑是鬚聳目降。
人生是成壞住空，姻緣 mā 是，換一个角度看 gún-ê 問題是一種侘寂 mā 是色不異空(ī-khong)，空不異色，色即(tsik)是空，空即是色，無這段人生故事，我呔有機會好好仔翻頭思考遮 ê 喙講心 m̄ 捌翻草 ê 智慧，閣順遮 ê 智慧生湠台語按怎講。所致，這是跋一倒，抾著一隻金雞母，Schwein gehabt，m̄ 是沐著打馬膠➃。
人生有落塗時八字命，姻緣 mā 是，總是遮 ê 註定 tuì 我來講無才調成做落衰運途行 tī 卯字 ê 註好好 ê 認份，不而過養飼我 ê 肥料。
換一个角度看世界，我按這段姻緣得著 ê 哲學實證 tsuē 過理論，像 Was mich nicht umbringt, macht mich Stärker 凡刣我 buē 死--ê hōo 我愈健欉，虼蚻敢 m̄ 是按呢生？恐龍無去，伊猶閣活跳跳，據在人類想空想縫 kā 伊剿甲無半隻。Schopenhauer 講 bueh 讀出好 ê 代誌，一个條件就是莫讀出歹 ê 物件，我認為愛讀出歹 ê 物件 m̄-tsiah 有才調得真正接受圓人 ē 扁，扁人 ē 圓 ê 自自然然 hōo 家己得著平靜並 kā 寶貴 ê 時間留 hōo 家己。
心適 ê 人出門𤆬三隻獅，看東看西、食東食西、bué 東 bué 西。無味 ê 人，出門 mā 𤆬三隻獅，嫌東嫌西、怨東怨西、罵東罵西。相罵無好言，相打無好拳，情緒無四序選擇陣打陣(ciin daˋ ciin)交人鬥鬧熱抑是 kā 遮 ê 情緒當做未來 ê 劇本來記錄， 齊是個人選擇，自做家甲到頂年 2024 tī 瑞典露營區 hōo gún 翁氣甲半路偷走厝，一个人徛踮湖岸邊看大甲若鹹卵仁 ê 金烏若踅玲瑯馬，原來我 ê 感情選擇 mā 是踅玲瑯馬，這是我選擇 ê 功課，像金烏選擇 tī 瑞典遐爾仔近 hōo 我掠做手一伸出去就有才調摸著伊仝款 mā 像瑞典人接受環境就是按呢，m̄ 免 uī-tio̍h 天氣無照家己意願隨跳童。
2024 上北瑞典露營車日子，我 m̄ 捌聽過瑞典人哭呻天氣 m̄-koh 德國人，𪜶 ê 哭呻一路按捷克、波蘭聽到挪威，閣按挪威聽轉來到德國。這个德國人 m̄ 是孤講 gún 翁，是九分九 ê 德國人齊有這个問題。
「瑞典 ê 天氣就是按呢生，𪜶連摔大雨攏有才調扒龍船、耍水、烘肉、露營」熱人 tī 瑞典經營露營區，寒人轉來德國開餐廳 ê 德國翁仔姐主人家微微仔笑答，門一開猶未登記露營就先做茶鈷呻瑞典 ê 雨是沓沓滴滴 m̄ 願停過，溫度又閣若秋清 hōo 人気持ち ê 德國翁仔姐。
我佮意瑞典，瑞典 mā 有番薑仔交塗肉林檎，總是褲袋仔袋磅子，認份甲 buē kā 家己 ê 設定徙來敆瑞典 ê 自然或是譬相 buē 離。
我認捌 ê 番薑仔按炒生湠到烘，目今閣接枝到生菜盤，我好奇敢有人按呢食 kā 番薑仔生菜盤敆烘箱馬鈴薯橛？這个想法一浮出來隨上網請教 Google 賜我智慧。按德文巡到英文，英文閣巡轉來到德文就是巡無一張相片，當我準備放棄一張看起來若 Printerest 系統 ê 相片吸引我 ê 目睭仁，Ofenkartoffelsalat mit Tomate und Mozzarella，著謼我呔無想著這點，德國人敢若較慣勢 kā 塗肉林檎做主角，畢竟塗肉林檎生菜盤是𪜶 ê 滷肉飯。
換一个角度看世界 Ofenkartoffelnsalat mit Paprika 一送 hōo Google，本底是萬年主角 ê 番薑仔炒馬鈴薯隨泅人海底，跟綴大海成做各種面肉 hōo 我心頭亂慒慒 m̄ 知影愛跟綴佗一張圖 hōo 家己目睭綴 leh 食➄。水雞愖來久，跳來遠，啉一杯仔茶，納一下仔水錢 tsiah 來巡明仔早 ê 早起頓。
我重食無重做，這類厚手路 ê 菜色跳過， 這類食重油閣食 Tshì-sù ê 菜色閬過，這四兩豬肉切兩盤，好看閣省工 ê 塗肉林檎削皮濫寡油落烘箱烘，番薑仔切做塊濫寡橄欖油就敆做一出菜 ê 手路敆我喙敆我心，就是伊。
我佮意檀島碗 ê 五彩十色就 tī 盤底舖一層羅馬萵仔菜 hōo 伊紅透青湠影戲 ê 手路，青有雅緻、華貴 ê 感覺，紅有吸人目睭仁 ê 魔法，兩色鬥做伙生湠色彩學 ê 純度無夠 ê 黃金色，抑是人講 ê 紅配青，狗臭屁 ê 風神黃金色：塗肉林檎。
我愛這个組合，伊 hōo 我 tī 青色 mā 表示是林投姐交陳守娘影戲色緻 ê 早起頓得著心涼脾土開。
➀ Jack wie Hose sein，攏會使得，攏無精差
➁ Das macht den Kohl nicht fett
➂ Frech wie Oskar，德文俗諺，當一个人離經(unverschämt/outrageous)閣做寡屁窒仔 ê 代誌，會使得 kā Oskar 請出來。
➃ Schwein gehabt，得著一隻豬：好字運，Peach g
