Kā 家己呵咾，家庭煮婦看俗物，無買 ē 克虧。
眼睛金金相，心內算盤斟酌擉。
跤步踏 hōo 在，一 tâu 十八仔。十八、十八、十八...那買那唸，我絕對無俗物食破家。
我是俗物𠢕拑家。
踮德國 bué bueh 落手 ê 油湯碗這斗 tī 捷克 ê Tesco 拄著我個人認為眼前 ê 數字是敗價，m̄-koh 廠商趁甲飽滇 hōo 我機會 bué 著俗物較贏做工課，一塊 tī 德國上少愛撏紅柑色 10€ tsiah 有才調款轉來，踮德國𪜶取來做生菜碗我取來做油湯 ê 碗，目今一塊碗 kan-ta 愛我一張林菝仔色 5€ 閣有地找錢，無款轉來德國我 ē 著蛆，無 kā 錄做一篇風神褒嗦一下，心情 buē 得過。
前幾日踅新聞讀著營養師分張按怎做「夏威夷飯」hōo 按太平洋泅到大西洋閣泅到地中海、北海、印度洋押尾猶是泅 buē 離 ê 蟯蟯泅總算願意放魚尾歇睏靠岸，揣物來食。
低卡無負擔 ê「夏威夷飯」按呢做，順文字揣物食，原來德國講 ê Bowl，美國講 ê Poke Bowl mā tī 臺灣沓沓仔時行。伊是底時踮臺灣時行，順這个話題繼續泅，在美國爆紅，被健身族追著吃的「夏威夷飯」是什麼？商周成做我 ê 引路人，原來如貓，2023 頂上半就 tī 臺灣時行。無閣使用社群媒體時行 ê 資訊正港較 ē Lag，不過我愛這个 Lag，因為這符合有著來，無著汰，有著食，無著煞，隨緣 hōo 家己準做無愛十八港跤行透透，驚失禮 hőng 當做田庄倯下性命相趁相喊有樣看樣，有例趁例。
德國 ê Bowl tī 底時時行，罕得食外口 褲袋仔 ê 磅子換做仙 mā 無夠 bué Bowl ê 紙甌仔 ê 我 m̄ 知機，總是我 tuì 敢若 Mission : Impossible 無 Tom Cruise 就 m̄ 是 Mission : Impossible ê 枝豆好玄，臺灣 ê Bowl 敢有枝豆這味？順 Google 海泅幾篇文章罕得看著枝豆，換 Google 相片海泅勉強看著幾張圖有出現枝豆，這敢是文化差異造成？
Bowl 踮德國以我個人觀察伊較峇素食者 ê 需求，德國 ê 素食者多數是無食魚臊素，所致有厚厚卵白質 ê 枝豆是 Bowl ê 第一男女主角。因為 Bowl ê 時行 hōo 本底無受歡迎 ê 油湯碗按塗炭仔成做王妃 mā tshan-tshiūnn 阿富𪜶阿母敢若永遠剉 buē 了 ê 麻白筍仝款，四界發穎生湠 m̄-koh 框金，一塊碗愛 10€ 起跳 hōo 自本就按算 bué 塊油湯碗做外省仔麵 ê 碗，一直抉 buē 落手。咱番薯島一塊白瓷仔碗無要求品牌一張紅紙出去，閣揣 1 塊轉來，遮是 1 張紅柑仔色 10€ 出去閣無夠額 hōo 我煠外省仔麵愛規个湯鍋仔捾 leh 食...歹勢甲。
3 月底巡敗價區見著兩盒 400g ê 冷凍枝豆按 8.99€ 敗價到 3.99€ 隨款轉來厝敆越南米粉、糙米、秮仔做伙食。兩盒食煞 tsiah 雄雄想著這難得 ê 好字運呔無款來做 Bowl，總是一切過遲，枝豆齊食入腹無地揣。
德國 ê 枝豆以我個人 ê 觀察佮經驗，枝豆有兩款，一款是豉甲 hōo 我捷捷憢疑這个味素敢是按德國人 m̄ 放人煞 ê 彼支喙生湠 ê 罐頭枝豆。罐頭枝豆 tuì 我來講 tshan-tshiūnn gún 翁𪜶爸母有毒，m̄ 通綿豉成做神農氏。 一款是 400g ê 冷凍枝豆，伊 ê 價數 hōo 我準做 tuì 伊有意思 mā 甘願放伊自由，像《屁窒仔的謝師宴》〈牽手緣〉女主角一知影答案隨放男主角自由，無閣跟綴男主角 ê 堅持 hōo 𪜶 ê 愛情開花結果閣生湠新椏。
復活節後 ê 物價 m̄ 知是南歐又閣摔大雨所致一切又閣漲懸價，抑是美國反起反倒 ê 政策造成物價 mā 若股市反來反去 hōo 我按貧惰吞瀾成做骨力食栗(la̍t)逐日踅超市揣落價物儉菜錢。
德國 ê 敗價區四常有家己 ê 位，不過自德國人較愛倚靠公民費過日子，移民人口又閣無夠額通疊𪜶 ê 勞動力，想 bueh 揣落價物目睭愛比別人閣較金閣𠢕繩，畢竟遮 m̄ 是臺灣 hōo 我有才調若揣資料按呢一項一項看。
我 tī 奧地利超市無見著無按算 bué 禁止伸手 ê 告示，見著美國茄價數誠媠隨款兩粒，押尾發見看 m̄ 著格，奧地利 ê 美國茄是意大利語 ê Melanzani m̄ 是法語 ê Auberignen 隨按麻紗袋仔捎出來囥轉去，隨 hōo 當地人降閣送我一句「Sie ist ein Mangel an öffentlicher Verantwortung」無水準，我感覺委屈 mā 接受這段話，畢竟是我家己 kā 入港隨灣，入鄉隨俗放外外。
鮮沢菜蔬目前框金，罕得支持 ê 冷凍菜蔬是將時 ê bué 著俗物較贏做工課，隨斡去冷凍菜蔬區，冷凍青花仔菜交白花仔菜無退冰落鼎炒味素足恐怖，m̄ 通選，敏豆遮爾仔幼穎款，價數 buē 敆心，換別項，這項看彼項嫌，當我決定翻頭轉去鮮沢菜蔬區，若花車大跳樓上意愛 ê 衫仔褲永遠 hőng 壓落底，彼包敢若枝豆 ê 款隨按人成做鴟鴞咻一聲 kā 目標物捎出來看，確實是枝豆，價數偌 tsuē？一公斤無到 4€，準做德國德文無 tshan-tshiūnn 奧地利德文按呢生疏猶是斟酌繩價數牌，Edamame 400g...無剉(錯)，規欉好好。
枝豆(Die Bohnen)款轉來厝，開始泅網海揣美人魚，泅規半晡無見半美人 m̄-koh 齊是德國 Bowl，我若款德國 Bowl gún 翁 ê 牛聲馬喉 ē 唱 buē 離，請教愛料理，愛料理罕得搪著倚歐洲喙斗 ê 食譜，至少 gún 翁。苦惱矣，我愛按怎款待這位貴賓？Bowl，我若成做茶鈷呻，海馬 mā 遮泅遐泅假無閒，聽著我 ê 疑問句隨攑告示牌「Bowl」。
Bowl, Bowl, Bowl, 網海泅規暝齊是 Bowl 這久你閣攑 Bowl ê 牌仔，你是...當我按算喝，來人矣，拖出去斬頭，向時交頭家做陣去越南餐廳食飯 ê 畫面浮在眼前。越南米粉鋪厚厚 ê 瓜仔哖、紅菜頭絲佮芫荽 ê 雞肉米粉生菜盤若圓仔總算烰好甘願浮出來。我知影按怎招待貴客光臨矣。
招待貴客 ê 菜單選好，我開始愖食菜，食肉，也著米敆，起早頓食麵大腸繼續告小腸，款糙米燒燙燙 ê 糙米無才調拍 7 折，枝豆鬥塗肉林檎敢若無啥峇，啊！北非小米，明仔載 ê 早起頓就勞煩你佮貴客。Never put off till tomorrow what you can do today，今仔日 ê 擘腹，今仔日完成，明仔日 ê 操煩，明仔日處理。
北非小米敆紅菜頭、瓜仔哖，完成。
雞肉挲鹽落煎鼎煎 hōo 赤赤，完成。
地中海生菜敆紅洋蔥、紅菜頭、Sòo-sù，完成。
早起頓攢好勢賰排盤...這陣子齊做 Bowl 生張，有淡薄仔厭𤺪，菜櫥認真巡一逝，猶是 Bowl 較適合，來做 Bowl 好矣。彼塊白瓷仔款出來，隨見著向時惜命命 ê 雙生仔，若閣做 Bowl 獨立做一份料理 ê 瓜仔哖北非小米就失去獨立性，gún 翁𠢕喙白 ê 舌就減一斗機會來探索新味素。
白瓷仔收轉去換這塊 tī 3 ~4 冬前 mā 是 hōo 我惜命命 ê 生菜碗，地中海生菜那鋪那哭呻伊䆀，gún 翁行倚講「女人心深似海，你 tuì 伊 ê 褒嗦我到今猶原記牢牢。」
離開䆀就是聰明，這个䆀是我家己招，世間事成住壞空，人生短短我愛學習侘寂，畢竟 Arthur Schopenhauer 講過 Vom Schlechten kann man nie zu wenig, und das Gute nie zu oft lesen. 咱永遠無法度讀著少少 ê 歹故事，mā 永遠無法度讀著過額 ê 好故事，逐日齊是成住壞空，我愛學習侘寂。
枝豆雞肉沙拉敆瓜仔哖北非小米，美味しい。
