Hegel（黑格爾）講 Kreis von Kreisen「圓湠圓」我按一篇少女是讀字 m̄ 捌意 ê 紀德(André Paul Guillaume Gide)《一粒麥子》(紀德逝世六十五週年紀念．人生二部曲之一)翻草湠出《拍破臺語顛倒勇》交我生份 ê 作者洪明道醫師 ê 等路。人生正經愛 Geh deinen weg lass dich begleiten 陪伴家己行家己 ê 家路 tsiah 有彩卵通揣。不過 Meta 遮 ê 若 7-11 ê 角勢猶是無適合我就順其自然，順家己 ê 心揣家己 ê 彩卵。像 2023 上北波羅的海進前，專工去捷克越南市場剪頭鬃搪著 ê 露營區。
「你若 kā 伊鋪去社區抑是露營區地圖，飯頓家己攢。」我愛這个順大路無經過任何設定 ê 相借喙 ê 歇暝。
踮超市那巡架頂 ê 報紙佮雜誌那等翁來遮交我會合鬥款物件轉去厝，目那巡心那詬詬唸，田庄閱讀敢若較讀 mā 讀 buē 出名人閒事掠外 ê 世界，RTL➀ 實境秀明星又閣按怎生，跤球明星呔討 buiah 有後嗣，英國太子妃時行啥物穿插....臺灣人閱讀慣習愈來愈行向死海 ê 海拔，德國人 ê 閱讀慣習 mā 紅海愈分愈闊。遮 ê 閱讀本 tuì 我來講是閱讀死海 mā buē 撏錢 ê 紅海，buē 撏錢就莫手賤伸手 kā 摸一絲毛管空。 手機仔準備捎出來寫 Telegram 問驢仔伊人 tî 佗落，一聲 buē-su 發現新烏空閣驚人知 ê 聲音按我 ê 後擴生湠到耳空「我一透早就讀著這葩新聞，m̄-koh 無交你分張。」
聽著熟似閣清楚分別 bueh hōo 德國人知交 buaih hōo 德國人知 ê 語言慣勢，無想 bueh 因為伊 ê 認為 hőng 感覺外國人就是按呢頇顢 buaih 入人門，順人意有目的，越頭以肉跤 ê 德文回答「ich verstehe nichts 啥物意思？」
Buē-su hőng 摠著明明就是德國人閣遐爾仔假鬼假怪 ê 驢仔隨歹勢，喙覕牢牢手指架頂 ê 蘋果報目今 ê 鏡總(鏡週刊) Bild➁，我順伊 ê 手勢按英國皇室 ê 「流言」踅轉來德國 ê「耳風」。
我知影伊 ê 14 猶原刁意故手指一排問「佗一條生言造語 hōo 你遮爾仔 m̄ 甘大大典典交我討論？」
「你敢無看著」伊隨 kā 指頭仔指 tī 比伊緣投 ê 人面頭前講「你上心愛 ê 新聞。」
「你會使得直接 kā 點落去，按呢我就有機會收藏伊 ê 緣投」我峇微仔笑應。
「你收藏我 ê 緣投就好」翁笑應。
捒車仔交換手 hōo 伊斡頭行向收銀櫃檯，那行那講「準做𪜶牽手講 ê 是事實，我 ê 想法交𪜶牽手相𫝛，向望伊軁出彼个 hōo 伊戛無一絲火鬚 ê 磅光。」
「我掠做你 ê 心會碎甲鹽鹽」翁講。
「這个世界有太 tsuē 咱 m̄ 捌 ê 世界，tshan-tshiūnn 粉紅仔粉紅仔 ê 伊」我笑應。
Gún 翁仔姐是標準一男一女 ê 感情觀，總是面對多元戀愛，生活 tī 無顧教會反對堅心支持同性婚姻德國 ê 伊，tuì 這類非大眾化 ê 社會接受度猶無我遐爾仔闊莽莽，兩人就此停話，起因無一个人有法度保證，徛 tī 無仝立場 ê gún 有才調逐項，正題 - 反題 - 合題。
Jogi ê 私人感情屬伊個人選擇，總是牽手 ê 爆料 hōo 我認真斟這个問題，有一日交 gún 翁 mā 行到神歸龕，佛歸廟，我 ē 按怎處理 gún-ê 問題？放聲抑是激恬？軟晡 ê 超市，人群宛然大水蟻 mā 若見著光隨飛向櫃枱𤲍燒 ê 蛾仔(ia̍h-á)，gún 按大水蟻轉做蛾仔閣成做舞龍舞獅 ê 龍身一部份，我越頭 tuì 翁講「出名人放聲必有緣故，你佮我齊屬老百姓無𪜶 ê 困擾，所致放百个心免煩惱。」
認定牽手 kā 伊分張 ê 半領膨紗衫收針收好勢 ê 伊，步頻聽著這段話想 bueh 㨨紗卻㨨無一絲 ê 雙目若牛目靜靜 tuì 我相。
「Gún 翁若遮出名閣有金山銀山，我 tsiah-buē 據在你田無溝，水無流，隨人付米，隨人落鼎，我曷 m̄ 是悾--ê 講。」
一條腸仔迵尻川，一還一，二還二 ê 伊結甲若千里眼 ê 目色總算放 hōo 冗冗笑應「我無伊有錢 mā 無伊緣投，m̄-koh 我愛你 ê 心 buē 改變。 」
「你是父親母親，牽手拋車輪」我講，「Nein」伊緊紲喙講無。
「真無抑無，時間溪流伊 ē 替咱趖出答案，不而過我眼前 ê 爸母囝交向時比較起來較實好幾仔百倍」正經無講耍笑，虎面前捙畚斗，捙甲險 bueh uī-tio̍h 伊心愛--ê 爸母代交 gún-ê 姻緣成做花缽仔無種菜 --- 無緣 。
《等路》是收聽台文里長伯鄭順聰先生主持 ê 拍破台語顛倒勇節目 tsiah 認捌 ê 作品，tuì 洪醫師 ê 作品產生興趣無畏講(uì-kóng)是受著這个節目 ê 影響，洪醫師以台語講文學 hōo 我 tuì 伊 ê 作品產生好奇，隨上網揣等路台語文版。
冊按台灣寄到德國 tsiah 雄雄想著，這是台語文作品 m̄ 是華文作品，需要斟酌繩出版社以避免那讀那罵，這是啥物意思抑是揣無字。畢竟我 m̄ 是逐个倉頡攏有才調才調拆字揣讀音。
啊，杏林子 ê 九歌，大丈夫，我相信這本小說絕對 buē hōo 我讀甲憢疑家己 ê 台語程度。我若去考台語認證絕對連 A 卷攏考 buē 過 ê 著觸。台語文作品 ê 漢羅寫法無一致 tuì 我來講大丈夫，四角字無一致彼就大代誌 ê 頭疼。
華文𤆬讀跳過隨進入〈村長伯的奮鬥〉一路若人上德國高速公路無搪著交通事故管制抑是施工造成 ê 窒車遐爾仔順一路讀到〈路竹洪小姐〉，華文𤆬讀跳過隨進入〈村長伯的奮鬥〉一路若人上德國高速公路無搪著交通事故管制抑是施工造成 ê 窒車遐爾仔順一路讀到〈路竹洪小姐〉，我雄雄想著廖玉蕙老師《彼年春天》ê 台語散文集 mā 是相𫝛 ê 順，免 kā 台語文讀做德文來揣字典 ê 痛苦。
〈巖仔〉ê 故事 hōo 我想著 bueh 讀過 ê 新聞事件 mā hōo 我想著中台禪寺學生集體出家 ê 事件。，特別是「落山的路對遐去」，互相祝福十外冬後我交翁婿探訪中台禪寺，翁婿 ê 雙目注目宏偉 ê 建築，我 ê 雙目注視來來往往 ê 修行者向望再次見著彼位交我半暝做陣坐 tī 樓梯跤講天談地 ê 同學。
「你祝福我早日 kā 臭溝仔水濾 hōo 清，是按怎你原仔 kā 家己關 tī 密喌喌 ê 門扇內？」我那講目墘 mā 若滇流 ê 海沙埔 hōo 我看 buē 清伊是真心向「阿彌陀佛」抑是 uī-tio̍h 伊 mā 行入阿彌陀佛。
遮爾冬過去，我順靜修交代 ê 「落山的路對遐去，愛會記，落山的路對遐去」m̄ 知伊敢捌 tuì 家己講「落山的路對遐去。」
讀〈siat-tsuh(シャツ) 〉想著舊厝厝邊阿春姨 ê 屘查某囝，自我有印象伊一直是短短 ê 頭鬃敆 siat-tsuh hām 長褲，一聽著序大愛伊留長頭鬃穿裙隨冤家比查埔人閣較緣投 ê 阿姊兄。
阿姊兄自地牛翻肩搬離舊厝 m̄ 捌閣相見，m̄ 知目今 ê 伊過了好無，總是這久翻頭看彼久，囡仔時 ê m̄ 捌順年閣 ê 教育認捌著，伊 ê 勇敢 m̄ 是一般人有法度取代交自在，至少以 gún 認定合該 mā 是這款自來性 ê 屘姨來看阿姊兄，目今應當 60 外歲 ê 阿姊兄 tī 保守 ê 年閣一屑仔攏無妝娗伊 ê 自本，自在活出伊家己 ê 自來，真正使我欽佩。
讀 siat-tsuh mā 想著媽媽割香熟似 ê 朋友。
自本長長 ê 頭鬃，跟綴翁婿轉去蘇州賣鴨卵隨剪做短短 ê 頭鬃佮一軀合軀 ê 西裝交手牽一位溫柔 ê 女子，像黃惠偵 ê《日常對話》。
人生是一本冊，生活是一首詩。
一本冊 bueh 按怎讀，一首詩 bueh 按怎寫，看起來攏個人 mā 無個人。
➀ Radio Télévision Luxembourg 盧森堡電視放送台，屬私人訂閱電視台
➁ Bild 德國畫報
