我 tuì 煮洗摸磨(buâ)款飯頓無熱情，m̄-koh 我 tuì 試鹹汫誠有熱情。
這个 m̄ 驚試鹹汫 ê 熱情 tuì gún 翁來講是一件好代，因為逐日過甲若神 tī 法國➀，tuì 我來講這就...愛按怎形容這个感受 tsiah 敆喙？簡單來講就是，Muse 來相揣一切大丈夫，Muse m̄ 來相揣是烏空是刺疫，因為 gún 翁 ê 腹肚 buē 得通空。
無啦，我 ê 腹肚 mā buē 得通空，特別是家甲徛 tī 煙腸窒倒街 ê 德國。凡事有結束，只有煙腸兩條➁，煙腸 tuì 德國偌爾仔重要，看俗諺就知。
這是一个煙腸交肉少缺 ê 國家。
頂禮拜五順祖先人 ê 智慧 bué 著俗貨較贏 leh 做工課，美國茄一斗款六支轉來囤，囤甲 hōo 伊險 bueh 對應咱祖先 ê 智慧，痟貪軁雞籠，俗物 bué 破家。四常飽水若少女 ê 茄子這斗囤無四暝日，轉性做番薯收水，總是番薯收水食著較甜，茄仔收水食著脯脯歹味 hōo 我起驚惶。
茄仔無緊食就愛擲潘桶， m̄ 通、m̄ 通，十八層地獄有一層專門 teh 處罰無惜一粒米，百粒汗 ê 人，我 buaih 去地獄，buaih 實踐痟貪軁雞籠。
Buaih、buaih、buaih，我 buaih 去地獄，準做我無確定人入土 ê 世界像阿媽講 ê 世界，我 mā buaih 討債，起因我比 uī-tio̍h 一喙飯下性命 ê 人閣較好字運。
部落格 ê 茄仔料理巡一遍，無興熥，暗仔，明仔載 tsiah 來處理。
時間是概念，概念按人起，金烏交月娘從來 m̄ 捌 uī-tio̍h 春分改變𪜶 ê 跤步，我 ê 拜六交禮拜卻因為人類 ê 感受按透早 6 點成做 7 點，斟一杯茶交膨鼠隔一層玻璃互相無閒𩑾𩑾。
膨鼠按這樹跳過彼樹，我按這味換過彼味。
茄仔敆麵？
Buaih 閣敆柑仔蜜醬。
茄仔敆塗肉林檎？
塗肉林檎賰無夠一公斤。
茄仔敆挽肉？
我無德國 DNA 無才調頓頓愛食肉。
Buaih、buaih、buaih，tsiah 喙白做仙好。
我無 gún 翁𪜶兜 ê DNA 欶空氣 mā 活甲若一尾龍。
除了麵，除了肉，猶有啥物通交茄仔相敆？
糙米，tsa̋ng 昏 tsiah 食。
秮仔，tsa̋ng 早 tsiah 食。
豆仔，閣敆豆仔 gún 翁 ē phōng-kong 踏斗到盡步鈃仔喨 buē 離。
我 ê 修養猶未行到𪜶兜樂聖 ê 坎站，再見，豆仔，咱後回再相見。
厝內猶閣有啥物？
啊，時到時擔當，無米煮番薯湯...啊，著，番薯，親愛 ê Google 大神，請你賜我智慧：美國茄敆番薯。
得矣，得矣，就是這味，不過這素食料理 ê 菜蔬 mā 少甲傷過頭，齊齊是含水碳素。
番薯、北非黍仔交切甲一條一條做肉 ê 麭齊是含水碳素 ê 纖維無夠額閣兼無卵白質，m̄ 好，m̄ 好，愛調整。不過愛按怎調整？時到時擔當，無米煮番薯湯，先備辦。
番薯那削皮， 海馬 mā 一屜挩一屜，卵包？貧惰洗鼎。鰮仔魚，罐頭鰮仔魚交這味是門房枋鬥 buē 峇 ê buē 合。
豆仔是肉，厝內有傑克 ê 豆仔，就是你。
翁仔姐做陣食早起頓，翁猶未落攕仔進前我先開喙「我代先會失禮，今仔日無肉閣食豆。」
「豆仔是素食肉。」
聽伊按呢講，我隨 kā 手搭 tī 伊 ê 頭額，無烘無燒，紅龜生蟲，龜怪矣。
「我無暗頭仔食西瓜，半暝反症」伊笑應。
德國人這十冬痟素食，gún 翁 mā 攑香綴拜，相喊相趁講我 bueh 做素食者，總是伊 ê 素食交𪜶小妹仝款，家己講準算。
「我無啉牛奶，m̄-koh 我食 Tshì-sù、優格...」𪜶講了準算。
我無反對伊成做無食肉 ê 人，總是喙講 buaih 食肉又閣食一堆假肉像素雞、素鴨、素魚 Like Meat➂，像伊小妹，這 m̄ 是巴禮講道，家己攏著 ê 另外一个見本。
伊喝 bueh 成做素食者十外冬 m̄ 捌實踐，今仔日 hōo 伊澈底實踐，我正港是好牽手。
➀ Das Leben wie Gott in Frankreich 德國俗諺，日子過甲足奢華
➁ Alles hat ein Ende, nur die Wurst hat zwei 德語俗諺，無要意，清彩，隨在人
➂ 素雞，素魚，素鴨 ê 素食口號
