翁愛食煎餅，馬鈴薯煎餅、菜蔬煎餅、馬鈴薯菜蔬煎餅遮 ê 需要礤簽 ê 物，我 mā 愛食遮 ê 物，總是我 ê 愛無夠額到願意骨力 uī 伊礤簽，所致見聽伊講煎餅好食，我 ê 耳空隨關門聽無伊講 ê 講話。
伊知影牽手有這款性地，所致他 mā 真蠻皮，一支喙若魚仔喙踮我面頭前開合，總是我比伊閣較蠻皮。
這斗翁仔姐做陣散步去 Marktkauf 款物件，照慣勢菜蔬區，準過，肉區，準過，啥物攏準過，第一个報到 ê 角勢就是敗價區看有啥物心適物通試鹹汫抑是抾著四常 bué buē 落手 ê 寶。「今仔日有馬鈴薯簽通做馬鈴薯煎餅」我那巡若花車大拍賣 ê 物那講。
「我佮意咱家己礤簽 ê 馬鈴薯煎餅」翁講。
「你礤簽我煎餅」我應。
清楚知影牽手 ê 愛 tsuē 過𪜶兜勥母，總是牽手 mā buē 因為這份愛舞死家己「你兜勥母規年迵天齊食加工食品，你 buē 哭呻伊毒害恁 ê 健康，我久久款一斗落價 ê 煙腸轉來煎，你隨講我無要意你 ê 健康，你正港是看我無目地 ê 大細心。」
「這價數誠媠閣是上押尾一盒，敢有興趣」伊隨紲話。
我 teh 學習莫 hōo 𪜶爸母絞入來我 ê 世界，看 gún-ê 龍鳳生活敢有才調較順序寡，頭殼踅 ê 句剪剪剪甲賰「好」加動作 kā 馬鈴薯簽囥入去捒車底 mā 那筅頭殼內 ê 糞埽並拍開腦海圖書館揣食譜。
「咱兜有林檎，咱會使得來做林檎馬鈴薯煎餅，這个食譜你敢有興趣試鹹汫」我問。
按伊 ê 表情我看出伊想 bueh hōo 爸母上童講「彼敢會使食得」，總是伊 mā teh 學習莫 hōo 爸母三不五時來上童，畢竟牽手講過我是交你牽手 m̄ 是交恁兜牽手「好」伊應。
轉來厝手䘼撆起來，熱量斟酌算，今仔日下昏飯合該然食 buē 飽脹，按呢水加啉寡來補枵饞 ê 後果。
2021.11.14
