網路安妮亞凡勢 mā 有厚甲若蠓 ê 時間，抑無 YouTube 呔 ē 推薦我看交我八字無一撇 ê 范琪裴的美國時間 --- 離婚了...然後呢？
別人兜 ê 離婚代交我無底代，跳過。總是 YouTube 敢若驚我想 buē 開又閣捒這支影短片 --- 愛上一個人是天災 ....#關於離婚這件事，片頭縛毛尾仔 ê 女士「時間不會療癒人，就是你的覺醒才會療癒自己」kā 我按別人兜 ê 離婚代交我一屑仔攏無底代轉做 Meow 斡頭揣離婚了...然後呢？這支影片。
拉丁語有一句話 In Vino Veritas 酒內有真相，德文有一句 Wir machen kein Käse，字面意思是 gún 無做 Tshì-sù，實際 ê 14 是 gún 無做 m̄ 著代誌，感情這件代是一个唱曲，一个挨絃。愛猶存，翁生某旦，食飽相看，目睭安電線 ê 翁仔某，褲帶結相黏。愛收水，只是花缽仔種菜faˊbadˋeˋzung coi --- 無緣moˇienˇ，免閣 kā 無味 ê 事項箍踮身邊 hōo 家己嫌東嫌西、怨東怨西、罵東罵西。 人自水帕(Phè)離開目𥍉仔又閣成做大自然 ê 營養之一，無適合 ê 放伊走 m̄ 免綿豉睏破三領草蓆，掠君心肝 buē 著。這是我個人 tuì 這支影片 ê 想法 mā 是家己 tuì 感情 ê 態度。
交 gún 翁來往無偌久我就知影外表獨立 ê 伊窮實是爸母囝，m̄ 通閣蹽落去，總是感情永遠有糊著蛤仔肉 ê 時，地理 ê 距離 hōo 我致著無頭神 buē 記得種田就愛好田底，交男朋友就愛看爸母這項教訓到成做龍鳳。
我交 gún 翁準做成做龍鳳猶是無范琪裴講 ê 陽光、空氣、水、范琪裴 ê 翁仔某，褲帶結相黏，gún 翁繼續蹛德國，我繼續蹛臺灣，番薯一收水隨人成做渡鳥飛德國抑是臺灣。因為渡鳥人生 hōo 我有法度 kā 𪜶爸母硬 bueh 湠來 gún 遮 ê 愛一耳空入，一耳空出交按近視轉做青盲，特別是𪜶爸母專工按北德來南德交新婦面會。
自阿母 mā 去塗州賣鴨卵，我 ê 心肝有一窟看 buē 著光 ê 烏空 hōo 我開始愖敢 bueh 徙岫到德國，畢竟交我牽手 ê 人 m̄ 捌問過這件代誌。
「我想 bueh 徙岫到德國。」
「按呢你 bueh 踮德國揣啥物工課？」
「揣恁兜 ê 工課。」
「啥物意思？」
「目前 ê 我想 bueh 揣工課，m̄-koh 我 ē-tàng 成做恁兜無料 ê 摒盪婦人人。」
「按呢 gún 爸母 ē 無歡喜。」
自我開喙無一句歡迎 kan-ta 工課(經濟)已經 hōo 我規腹肚火，這久閣添一句按呢 gún 爸母 ē 無歡喜，我較閣有量 mā 無彼个福氣通閃避心狂火著。兩人 tī Yahoo Messenger 你一句我一句互相盤喙錦，看 tsiâ 較𠢕籐攑上手，m̄ 管皇親國族。按呢 ê 討論 m̄ 知維持偌久，我心一橫無顧面底皮單逝(tuann-tsuā)機票一訂好勢鞄楔幾本仔冊隨飛來德國交伊做伴。Gún 翁 mā 守空房守甲慣勢 buē 孤單，一見著我隨問「你當時 bueh 轉去臺灣，我慣勢一个人 tī 遮」成做這溪無魚別溪釣 m̄ 免綿爛行到透底 ê 點拄。
今年是我按臺灣徙岫來德國 ê 第 7 冬 mā 是我寫部落格 ê 第 5 冬，tī 部落格 ê 5 冬，我按 m̄ 知愛寫啥 ê 除了文字，啥物攏無行到想 bueh 迵過書寫，揣著德國佮臺灣 ê 四序，紲落來按 Vox et praeterea nihil(除了聲音，啥物攏無) ê 我 kan-ta 想 bueh 聽家 ê 聲音交家己讀萬物，看萬物，愖屬於我家己白汫無味 ê heißt Luft 喃來喃去 kā 社群連結提掉，kā 逐人攏通留話轉做唯有 Pixnet 登入者 tsiah 通挨拶，遮 ê 變化我 m̄ 捌愖過伊𤆬 hōo 我啥物改變，我只是順家己 ê 感受沓沓仔調整㧎 tī 心肝穎 ê 無四序。
這久聽著 FIFI 分張 kā 無四序轉做文字佮家己對話交范琪裴分張我需要談一下我 tsiah 想著，目今 ê 我是按怎 buē 閣 tshan-tshiūnn 往過按呢喀喀嗽，無食中畫認真 tuì 翁分拆 gún-ê 問題 mā buē 閣翻頭 tuì 家己情緒叨撚，人是龍交龍，鳳交鳳，我是隱痀 ê 交侗戇，兩擺感情線攏縛著爸母囝 ê 因端。我 ê 気持ち tī 這 5 冬 hōo 我熥甲連家己 mā 感覺臭香(hiunn)，自然 buē 礤簽 hōo 翁食，畢竟我是有道德 ê 人，我做 buē 出捎虛情假愛妝娗自私甕肚。所致這久 ê gún 是做戲 ê bueh 煞，看戲 ê m̄ 煞。這久 ê 我猶原 tī 遮 m̄ 是我接受伊喙講 ê 保證是我猶揣無通收現金 ê 旅行社。
生活電子化是利便 mā m̄ 是利便，像人 tī 瑞典想 bueh 上便所方便一下，無電子信用卡抑是當地 APP，歹勢請你繼續無方便。
我 m̄ 知影這敢是離婚了...然後呢？ê 心得文字，總是 FIFI 彼段分張 kā 無法度補 ê 烏空轉做文字交家己對談深深擉著我 ê 心，因為小面神無法度規張紙晝一尊觀音 --- 大面神，sóo-tí 我無慣勢 kā 遮 ê 代誌講 hōo 別人聽，不過文字是力量這我一直攏相信，所致我願意 kā 遮 ê 若《拯救莎曼珊》ê「弄舌盒仔」 寫踮部落格。因為遮 ê 「弄舌盒仔」是我四常數簿 ê 一部份 Meine Übungen. Mis ejercicios 佮喃來喃去。
