Sonne kann nicht ohne Schein, Mensch nicht ohne Liebe sein.
金烏 buē 使得無金光，人 buē 使得無戀愛，
Mein Magen kann nicht ohne dein kochen sein.我 ê 脾土 buē 使得無你 ê 料理。
Können wir das Brot zuhause backen,bitte?
咱敢會使得家己烘來食？
柴頭翁改編自 Goethe ê 詩句。
我有這个症頭搪著無興趣抑是無佮意 ê 物件，𪜶隨愛離開我 ê 眼界 hōo 家己莫成做綴家己尾溜 ê 戇狗。
這款 m̄ 知為何趕緊緊 ê 症頭 tī 這幾冬沓沓仔變化，我沓沓學 ē 曉 tī 䆀內底揣著媠 kā 豬牢翻做厝宅，不而過我猶原佮意少少夠額 ê 人生。
「我 ê 人生興趣無包括摒厝內、洗衫、攄塗跤」德國有一个專門紹介徛家 ê 節目，見擺見人紹介𪜶按怎成格(tshiânn-kik)按怎揣家俱妝娗厝內，我 ê 頭殼開始踅，規日做遮 ê 代誌就夠額，免閣出外遶山花抑是社交。參加這个節目 ê 人 mā 承認 uī-tio̍h 𪜶 ê 厝，𪜶 m̄ 捌出門行跤花抑是罕得出門行跤花，起因愛整理維護「厝」。
德國人愛做倉鼠是通人知，𪜶 ê 倉鼠癖無限食食，所致當我 kā 家甲做 tī 遮，我 ê 魂舒無一日自在過，起因 gún 翁 kā 稅來 ê 厝當做賊仔市兼𪜶爸母 ê 資源回收場蹛，不而過這幾冬好誠 tsuē，畢竟牽手重過倉鼠 mā 重過爸母，我個人 mā tī 這場戰爭學習著按怎 kā 跤步放 hōo 慢。像這篇本底記錄塞爾維亞麭 Pogača ê 文章，照向時 ê 性地我 ē 因為無需要隨規篇刣掉，這久 ê 我跤步放慢等待時機 kā 伊翻新成格。
自翁仔姐做陣減肥，自免閣趕透早 8:30 ê 德語課，自免閣逐日下性命背德文，我 m̄ 捌閣撋過一粒麭，這篇自本是記錄 Pogača ê 文章就徙來做新食譜 ê 記錄，舊底 ê 心行尞 mā 徙來做接枝 ê 材料，一兼二顧，摸蜊仔兼洗褲，正港需要智慧 m̄ 是文字按呢想 ê 簡單。
這幾日 YouTube 紹介我看「內臟脂肪高和它有關1吃法狂減30公斤十年不復胖 ! ft. 陳君琳醫師譚敦慈 【 小宇宙大爆發 】」，影片有一段減肥 m̄ 免大腸告小腸 hōo 我翻頭看自開始到收冬 ê 這久，gún 翁仔姐 tī 減肥這條路確實 m̄ 捌揀食過，若硬 bueh 揣一項揀食就是 gún 翁 tī 這段時間因為我是扞鼎者，所致伊無啥機會食著伊自本就愛，我自本就無啥愛 ê 冰淇淋、雞卵糕、麭。
自翁仔姐做陣減肥 gún-ê 食食記錄 mā m̄ 捌斷過，特別是我要意 ê 早起頓，雖罔我無頓記錄踮遮，總是手頭 ê 白紙逐日猶是清清楚楚記錄一日 ê 食食熱量。這是 gún 翁仔姐 ê 早起頓：
番薯，Check!
林檎，Check!
燕麥片，Check!
𠕇果：核桃、笑果、杏仁...，Check!
茶：綠茶、甜茴香茶(Fenchel, Fennel)...，Check!
卵，Chceck!
鱷梨仔，Check!
苦味招閣禮篤，Check!
查埔一日需要 ê 70g 查某一日需要 ê 60g 卵白質 hām 我沓沓行入換年 ē 欠 ê 鐵 mā 齊有。寫部落格正港是一件好代誌，伊 hōo 我 m̄-nā 敨風火著閣 hōo 我揣著方法繩家己 ê 烏魯木齊順紲治 gún 翁承自𪜶爸母 ê 幻想，tuì gún 食保證恁食百二 ê 𠢕扞健康。
