計畫永遠趕 buē 赴變化。安歇日前一暝交翁頓印仔講「來食鰮仔魚意大利麵」隔轉工目蚶猶瞌瞌隨反僥講「我 ê 胃 kā 我講伊今仔日愛食塗肉林檎。」
「你款 ê 早起頓齊好味素」翁講。
「我無確定我款 ê 糜飯敢攏好味素，總是我知機家己 ê 性地，無興成做獨裁者，像恁阿母」我講。「你 m̄ 是 Roma 羅姆人 mā m̄ 是𪜶魂舒邊 ê 熊➀ 。」
「無剉(錯)，規欉好好，落塗時八字命，臺灣有國際身份問題，恁兜有獨裁者問題，這兩項結做伙相比並，我比你好字運。」
「感謝我 ê 四掌基金會➁」翁那講那 kā 燒烙 ê 雙手疊 tī 因為𫝻手機仔沓沓仔變枝仔冰 ê 手。
「我 mā 感謝家己若石頭 ê 性地，特別是糜飯」我 kā 手徙去焐伊 ê 腹肚邊，聽伊大聲喈一聲，我笑甲 kiōng-bueh 斷氣講「我 ê 跤手冰甲若枝冰仔 m̄ 是欠鐵抑是糖尿病所致，是因為愛。」
正經，無愛呔願意 uī-tio̍h 一頓飯 tī 廚房舞 bueh 2 點鐘，敢 m̄ 是?
是講，逐項款外口 mā 有法度舞 bueh 1 點鐘，只要人坐 tī 廚房，等時間走到賰無 10 分鐘 kā 加工肉、加工麭、牛奶漿 ê 包裝拆開就 ē-tàng 貯入盤仔來享受，這 mā 是認真料理 1 點鐘 m̄ 是 6 分鐘。
德國媒體家己報導，德國人款一頓飯頓 6 分鐘。翁𪜶老母逐頓攏是加工食品 mā 有法度舞 1 點鐘，伊 m̄ 准別人踏伊 ê 廚房，我只好家己想像這 6 分鐘是按怎湠做 1 點鐘。
第一斗交伊相拄搪，我第一个想法是無攪寡 Khu-lì-mù ê 白銀魚敢 buē 傷過鹹篤篤？畢竟，我無彼个才調家己動手做鹹膎，準做有彼个才調橐袋仔 ê 龍銀 mā 無夠額。總是，人生永遠有對反(tuì-huán)，你掠做你永遠 buē 交伊相拄搪，伊就愈興交你挨拶，特別是 Google 年閣 m̄ 管𫝻過抑是䀐過齊是有食有行氣，有燒香有保庇 ê 提醒你猶有這逝路猶未行。
Tī 網路猶未窒倒街 ê 年代，一个養老乃瀧抑是 Ponderosa 龐德羅莎有法度 hōo 我一粒粿餾 365 工 mā buē 變心，這久愛我 tuì 𪜶維持「對你愛愛愛不完」彼是較早睏較有眠 ê 代誌。
年歲行到遮，我 tuì 工課 ê 齷齪是成住壞空交侘寂(Wabisabi) ê 一屑仔攏無要意，起因我 ê 目標 kan-ta buaih hōo 褲袋仔連磅子攏無地袋，像頂回去戲院看影戲，搪著三个刁意故揣麻煩 ê 毋成囡仔，我 kan-ta 這个態度，連鼻空吐一个氣 hōo 𪜶聽 mā 揣無一屑仔心適興，畢竟嫌家己銀兩飽滇愛大放水 tī 戲院烏白擲磅番麥交馬鈴薯片 ê 人 m̄ 是我，我 m̄ 免 uī-tio̍h 𪜶 ê m̄ 是款來替𪜶爸母教示。畢竟𪜶交我一屑仔底代攏無，像翁兜 ê 勥爸勥母𪜶 bueh 按怎看我無目地按怎講我尻川後話攏是𪜶 ê 自由，交我一屑仔底代攏無。除非𪜶 ê 行為造成我 ê 危險，像 gún 翁本底 ê 態度，愛我跟綴𪜶兜 ê 傳統聽爸母話食三頓過日子，這就愛出聲 buē-tàng 放伊烏白舞。
我愛食魚，有法度 hōo 我俗魚 buē bué 破家 ê 超市倚 gún 兜坐巴士至少愛一點鐘，這一點鐘 m̄ 是路途遠甲若火星，是車幫少甲可憐愛踅遠路，像台中 ê 158 Bá-suh 坐甲 hōo 我掠做家己去台北。所致，搪著交翁時間撨 buē 好勢，我就去超市款鯡魚、鱒魚這類鹹魚抑是魚罐頭轉來窒數念。
喔，肉鯽仔 I miss you so....
喔，小鯡魚 du bist so lecker....
喔，鯡魚你呔 ē 好味素甲若肉鯽仔....
這站仔翁仔姐時間撨 buē 峇，想 bueh 食白銀魚無地款只好款醬鹹。醬鹹款轉來隨向 Google 跋桮，請伊賜我生智慧。
Google 是媽祖婆是伯公總是 kā 我惜命命 hōo 我免 uī 喙白操煩，總是這斗媽祖婆交伯公敢若接受安妮亞 ê 報告「這个人好喙斗好育飼，不過近來滓著無料食譜少缺無興外甥仔點燈火，一切照舅(舊) kan-ta 愛迎新棄舊 ê 歹癖」，Google 決定無 bueh 要意我 ê buaih 直直餾這出 hōo 我 m̄ 知準過幾斗 ê 菜色。
我無遐爾仔 khiàu-thâu 抑是喙白，總是德國 ê 醬鹹食了無洗腰子 m̄ 是身體健康是運氣好。另外，我 mā 無討債，畢竟我寶惜家己落塗八字命比絲蜜塔➂好上幾仔萬倍...
有時間攑日本剾刀講人是牛牽到北京 mā 是牛，呔無時間講家己。
哭呻別人 ê 問題 buē 成做家己 ê 𤆬路雞，總是按別人 ê buaih 我 ē-tàng 見著家己有 ê buaih 是別人一世人攏逐 buē 著 ê 目標。
德國是一个資本社會，這間 buē 敆喙，猶有別間通試鹹汫，像 Lidl ê 醬鹹食了感覺愛食腰子 ē-tàng 換 Aldi。
是講目今上敆喙 ê 鹹汫是 Homann，總是咱人愛節家己 ê 斤兩，這味敆 Aldi 就夠額 ê 好味好素。
➀➁ 跳舞的熊 Tańczące niedźwiedzie
➂ 三股髮辮 La Tresse von Laetitia Colombani
