Wer mit Ungeheuern kämpft, mag zusehn, dass er nicht dabei zum Ungeheuer wird. Und wenn du lange in einen Abgrund blickst, blickt der Abgrund auch in dich hinein. - "Jenseits von Gut und Böse"
Tsiâ 佮妖怪戰鬥，愛張持 tī-leh 戰鬥 m̄-thang 綴伊成做妖怪。
當你年久月深 tuì 萬丈深坑金金相，萬丈深坑 mā teh tuì 你貓貓相。Friedrich Nietzsche
雄雄想著這件代誌，我一直喋牛 m̄ 通𠢕走，人 m̄ 通出名，這久煞 tī 遮 m̄-nā 綿豉跟綴食譜冊出菜 mā kā 伊綿豉記錄踮愛料理，我按呢做敢 mā m̄ 是食菜食菜，食甲肚臍為界？
一想著有喙講別人，無喙講家己隨懍恂交 buē 離。
是講，我 mā 無遮爾仔人牽 m̄ 行，鬼牽溜溜行 ê 𠢕 tuì 家己點番仔火油燈 hōo 家己行入磺火效應 ê 人，所致這个問題 tshan-tshiūnn 狗仔泅水，一上陸隨 kā 魂舒 ê 水𫝺 hōo 焦，就 1234 恐嚇家己恐嚇家無代誌。
畢竟痞客邦 Pixnet 自本就是我 ê Julie & Julia，愛料理是因為捷克行跤花 hőng 捎去做副本 hōo 我想著久年前了時間交彼个假包德國人花 buē 了 ê 過了代 tsiah 生湠 ê 兔仔窟。我若按算成做出名人，遮無可能連一个社群號頭攏無。
樹頭徛 hōo 在，m̄ 驚樹尾做風颱。
網路是一个獨立閣公開 ê 世界，驚惶家己 ê 面肉 ē 成做別人 ê 面容就愛綁跤帛規日跍踮厝 m̄ 出門。
網路是現實環境無宛 2 體 ê 牽藤，伊交現實環境唯一無相𫝛 ê 所在精差 tī 像遊戲，你 tī 遊戲按怎 hőng 刴做肉醬，你猶原是活龍一尾，免驚九條命用煞無地通繼續。
所致，uī-tio̍h 這款無聊代齪死家己，正經是無枷夯交椅。
食譜是按 Leichter leben in Deutschland 德國輕兩想人生 Saisonsalat Februar 二月季節生菜盤來。
食譜紹介伊是一份適合 tī 春冬兩季款來顧胃腸兼敆脾土 ê 生菜盤。
這盤生菜盤上大 ê 特色是芹菜一屑仔攏 buē 愛進頭香，因為伊知機，伊交林檎、柳丁無宛 2 體，逐人攏是籠面。
伊是一份鮮沢交有厚厚纖維 ê 生菜盤，伊 mā 是一份真敆囡仔喙斗 ê 生菜盤。
Asterix Max 有一段表示𪜶 ê 文化佮羅馬無相𫝛 ê Die spinnen, die Römer 羅馬人，真痟。
我 tuì 生份 m̄-koh 願意成做我個人網路烏面賊 ê 代誌 mā 是 Die spinnen, die Römer ê Ich glaube, ich bin spinnen ê 痟甲食飽換枵。
總是，我是一个遛扦就哀爸叫母 ê 人，所致，這款 ē 沓沓仔無細膩成做斷腦筋 ê 夯枷是絕對 buē 放伊恬靜交我相放伴抑是 kā 伊育飼甲若牛來觸死家己。
不過，我有這个癖 Die spinnen, die Gerichte 食飽換枵飯頓熥 buē 離。
台語有這句俗語一粒田螺煮九碗湯，一粒田螺敢無法度煮九碗湯？
這我無研究 mā 無意見，畢竟德國人有法度仝一粒麭敆一塊煙腿食一甲子無嫌伊白汫無味，一粒田螺 tsiah 煮九碗湯呔有算白汫無素。總是我 m̄ 是這款性地卻有耐性 uī-tio̍h 連手面趁食攏無地有活水 ê 網路相片 tī Die spinnen, die Gerichte 熥食譜熥 buē 離。這正港是紅龜生蟲，龜怪交食飽換枵。總是這款食飽換枵 mā 是 buē 䆀款，伊 hōo 我理解有當時仔循舊逝 mā 是好代一件。因為伊 hōo 我按舊逝揣著無照規矩 ê 認定，像我本底認為這二月季節生菜盤無啥特殊，這斗 uī-tio̍h 無地成做外路仔 ê 相片餾食譜，我發現伊窮真無遐爾仔無鹹無纖 ê 好味素。
這斗 ê 食材除了 uī-tio̍h 厝內喙白老嬰交芹菜是死對頭，無興成做獨裁者交尊存個人喙斗 ê 我，就猶原 kā 芹菜換做瓜仔哖，彼喉韻猶原好甲 hōo 牛聲馬喉成做 Il Divo ê 褒嗦。
