這站仔翁某做陣減肥，海馬青磅白磅泅去彼區舊漚舊臭 ê 倉庫 hōo 我成做貓 tuì 海馬 Miau buē 離「這斗減肥，我敢捌 hōo 你大腸告小腸過？」
相罵無好言，相打無好拳，心適 ê 人出門𤆬三隻獅，看東看西，食東食西，bué 東買西。無味 ê 人出門 mā 𤆬三隻獅，嫌東嫌西，怨東怨西，罵東罵西，buē 曉泅水 ê 人 m̄ 管 mā kan-ta 莫管(mog-gonˋ) 年歲按怎疊猶原外甥仔點燈火，一切照舅(舊) ê 膠多毋黏，話多毋甜，門關起來伊 ē-tàng 繼續 Seinen Senf dazu geben 繼續發表伊 ê 意見，我 buē 閣 uī-tio̍h 伊 ê 含血霧天來艱苦罪過。
海馬吐一支番仔火，我 kā 牢 tī 身軀外口 ê 臭殕褪 hōo 清氣交門疊做糞埽山，汽油淋落去，番仔火一戛向三下咬，無見餡 ê 家庭說免來食飽換枵，你交我 ê 緣份單淨(danˊgiang)彼九冬。人講夢是 buē 記持整理 ê 屜仔，按呢透中晝 ê 陷眠是搪著 Mǹg-sǹg？
我 m̄ 知影，總是我清楚知影這久 ê 我搪著 Mn̂g-sng 就敢若《鯤島計畫》ê 肚綰腸duˋgonˋcongˇ alias 盲腸仝款，是𪜶愛驚我 m̄ 是我愛驚𪜶。
總是感謝這段九年 ê 青春，伊 hōo 我閣一斗因為愛情目珠盲兼耳公較毋好知影按怎莫 hōo 家己人牽 m̄ 行，鬼牽溜溜行，舞死家己。
敢是 gún 翁這站仔又閣翻頭食爸母 ê 喙瀾成做未來 ê 好心人，食紅肉無健康，啉牛奶無健康，愛啉燕麥奶 hōo 伊有機會又閣泅入來我 ê 夢？Uī-tio̍h 解決這个無四序，我決定 kā 話開拆清楚。
「你 ê 跟綴 gún 兜過生活包領你食百二 ê 好心點揬 hōo 伊又閣來纓纏，我敢會使得請你莫閣跟綴恁爸母 ê 跤步過日子，我知影你 m̄ 是伊，總是你 ê 行為 hōo 我想著伊，一想著伊伊就有機會來我 ê 夢中米糕𣻸」我講。
「我無 hōo gún 爸母上童」gún 翁氣攏無換隨紲喙講。
「交你來往十外冬，我一直甘食甘分，有通食閣有通賰 ê 尊存你 ê 德國文化，總是雞是討食焦，鴨是討食澹，這款成做一个人上基本 ê 人權敢有遮爾仔 hōo 你僫理解兼接受，呔討你遮爾仔愛哭愛綴路，纏綴恁爸母做先生閣愛我食你煎 ê 毒藥？」因為伊我睏無入眠，這久 ê 頭疼若有人 kā 我 ê 頭做嘓魚硞 hōo 我愈講心火愈著。
伊猶原是伊，死鴨硬喙桮講講含血霧天「我 tsiah 無 hōo gún 爸母上童 mā 無講遮 ê 話。」
田嬰若結規堆，戴笠仔穿棕簑，Mn̂g-sng 若做陣行，我 ê 腹火就愈猛「你知影我食飯 ê 食飯慣勢從來 m̄ 捌碗頭箸尾，像恁爸母，這个性地 mā 反應 tī 人生態度，無風無搖十外冬伊又閣來纓纏，一定有人刁意故挓火，特別是清楚知影我慼這款代誌慼甲記持隨空一塊白」我講。
「B12 按動物來，你 m̄ 食魚，m̄ 食海菜，m̄ 食豬肝，m̄ 食阿菇，m̄ 食蚶仔，嫌牛奶無健康，你若出現遮 ê 問題 tshan-tshiūnn 恁爸母掠做家己是泰山 ê 體格，窮真是阿婆阿公仔 ê 身體，你免向望我 ē 成做你無料 ê 看護婦。」
我 m̄ 是清彩烏白講，看我 buē 上目 ê 𪜶爸母自藥仔愈食愈重 mā 愈食愈無應效就向望 gún 搬去北德交𪜶做伴，我就清清楚楚品明講「你家己去交𪜶做伴，我 bueh 搬轉來台灣。」個人健康個人擔，特別是蠻皮 ê 人。
青盲食圓仔，心內有數，知知知機人生 tshan-tshiūnn 大舞台，苦齣笑料齊公開，特別是伊這款田螺循舊逝，較行 mā 仝逝 ê 阿善師 m̄ 出勤，牽手 mā 有才調揣著伊趖過 ê 痕跡。
「咱兜無大妗婆𠢕炊粿，炊甲臭火焦兼著火 ê 人，有你交我牽手，我 ê 健康免操煩」伊知影啥物號做放酒 ē 芳，放酒 ē 重，較戇 mā 愛放酒 hōo 芳。
「我知影家己 ê 問題，所致我 m̄ 捌 kā 家己選擇 ê 情路捒去你魂舒，總是恁兜 ê 漚戲敢會使得換來咱兜拖朋 hōo 伊有機會成做恁爸母 ê 碗頭箸碗」我手指伊交𪜶爸母相𫝛 ê 歹習慣，雞摸食無幾喙隨擲盤講有骨頭 buaih 食，然後剾洗 kā 手做攕仔 ê 人是無智識 ê 人。
伊知影我 ê 意思，一粒米，百粒汗，伊目今 ê 自然 m̄ 是天賦人權，是伊出世 tī 好 ê 年閣 hōo 伊 m̄ 免 uī-tio̍h 一片薄麭走傱。
「這好味好素，咱敢會使得不三時做來食」伊知影家己 ê 問題 mā 聽著牽手塞鼻 ê 聲音，伊知機 m̄ 通繼續 hōo 𪜶爸母青龍盤柱，死豬鎮砧，不過愛十二月屎桶盡摒隨換話題。
我 mā 確實 hōo 伊承爸母 ê 癖舞甲若散鬼 buê 受得骨力，開始行出我另外一个驚惶，四邊無一倚平靜回應「只要厝內有框金閣包銀 ê 鱷梨仔，無問題。」Gún 兜寒人 ê 鱷梨仔無厝邊阿羅交阿珊 ê 鬥相伨真僫上桌做飯頓。
感謝阿羅交阿珊，無恁 ê 分張，gún 翁仔僫得 tī 寒人得著超級食物 ê 營養。
