泰國上星期公佈派出 Ratchapoom Boonbunchachoke 揚威康城嘅首部長片作品 「A Useful Ghost (ผีใช้ได้ค่ะ)」 出戰第98屆(2026)奧斯卡最佳國際電影。
本片喺台灣將會由 ifilm/傳影互動 發行，由於只得暫稱片名 「有用的鬼」 ，下文會先用番英文片名，去介紹呢部玩味十足嘅靈異(?)喜劇。
空氣污染嚴重，少婦 Nat 就係咁死於肺塵埃疾病，留低老公 Match 同個仔。Match 終日以淚洗面，思念妻子；但Nat又何嘗唔係呢？因緣際會，佢附身喺吸塵機入面，繼續守護家人健康，並且成功同老公相認，一人一機歷過生死關係更勝從前，更希望可以長相癡守。可惜Match 嘅家人似乎唔允許，尤其係家族經營嘅吸塵機工廠最近有工人意外身亡之後成日鬧鬼，搞到工廠開唔到門，生意一落千丈。為證明自己還陽係一份心意而唔係負擔，Nat應承佢地做隻有用嘅鬼，幫手對付工廠其他冇用鬼……
Ratchapoom Boonbunchachoke 1987年生於曼谷，有潮汕華人血統(漢名「林金偉」)，於朱拉隆功大學傳播藝術系主修導演畢業，及後成為自由身創作人，主要從事電視劇編劇、影評、電影課程客席講師等工作。2020年執導短片作品「間諜之聲(Red Aninsri; Or, Tiptoeing on the Still Trembling Berlin Wall)」，講述身為國安特務嘅變性人流鶯，做番男人去色誘同性異見領袖；同時運用冷戰時代泰國片常見嘅聲畫不同步現象去表達對社會同邊緣人嘅睇法，贏得瑞士盧嘉諾影展最佳短片；作品亦入選2021年香港鮮浪潮國際短片節。
「A Useful Ghost」嘅故事啟發自傳統鬼故「Mae Nak」，尤其係2013年大熱電影「嚇鬼阿嫂」入面嘅團圓結局，想象人鬼共存下會遇到啲咩狀況。而相較於靈異嘅方向，Ratchapoom 希望透過嘻笑怒罵，充滿強烈反差嘅故事，表達佢對社會嘅睇法--社畜搵得雞碎咁多僅夠應付生活，點知做鬼都係要工作證明自己；工廠正係體現勞資權力不對等嘅最佳場景；冬天來自北方嘅空氣污染係泰國人切身處地面對緊嘅問題；而「吸塵機」要對付嘅，就係一班勢弱無聲嘅窄路微塵。
Ratchapoom一直被電視劇工作拖延劇本進度，要到逆晴先有時間完成，被順勢喺盧嘉諾影展「Open Doors」獲得約30萬港元嘅資助；其後亦得到參與過「十年泰國」、「充憶Memoria」同Netflix「飢渴遊戲 Hunger」嘅185 films支持，搵嚟一個創意十足嘅美術團隊；另外搵嚟新加坡Momo Films合作，搵嚟得獎人馬設計吸塵機。導演以西方靈異片中電器會無端啟動嘅情節做參考，製作一部可搖控走動嘅吸塵機；拍攝時就用人手進行擺動，再喺後期處理執走，令吸塵機嘅「動作」更像真。
由於導演一開始已經選擇以「冷幽默」嘅形式講故事，所以選角果陣都傾向搵資深演員以便配合；不過佢都擔心劇本太古怪，啲演員會唔願接--連演員受訪果陣都係咁講。不過佢都有啲意外，監製第一個推薦俾佢嘅，正是當年憑「嚇鬼阿嫂」成名嘅女主角Davika Hoorne。自2015年「戀愛病發 Heart Attack」後，Davika已經有闊別大銀幕差唔多10年，正好需要尋求突破，雙方一拍即合。而上年憑「白衣蒼狗 Mongrel」入圍金馬獎最佳男主角嘅 Wanlop Rungkumjud(萬洛．隆甘迦)，亦係片中飾演一名戲份頗重嘅廠房工人。
「A Useful Ghost」喺2023年11月開拍，再用咗約一年時間完成後期，然後報名康城影展，最終獲平行單元「影評人週」選中，成為第一部參加呢個鼓勵新導演頭兩部作品嘅單元嘅泰國電影，更獲得競賽大獎，繼 2010年 Apichatpong Weerasethakul「波米叔叔的前世今生 Uncle Boonmee Who Can Recall His Past Lives」後再次有泰國片揚威康城。
泰國至今派出過31部電影參賽。近年泰國流行文化開始進入國際視野，電影圈亦有以大廠「GDH」為中心嘅一班導演堀起；近5屆嘅泰國代表都係「GDH」出品，不單止叫好叫座，更令海外觀眾對泰國電影有更多面向嘅認識。佢地更值極培養後進，上年憑溫情片「(港)全職乖孫 / (台)金孫爆富攻略 How to Make Millions Before Grandma Dies」為泰國首度獲選 Shortlist嘅導演 Pat Boonnitipat，就係由為GDH拍電視劇做起。
「A Useful Ghost」由10部候選作品中脫穎而出；其他候選作品包括翻拍台灣大熱喜劇「關於我和鬼變成家人的那封利是/冥婚鬧泰大 The Red Envelope」、本年度香港同志影展閉幕片「難道喜歡妳/ 平行青春的我們 Flat Girls」、當地話題電影「佛牌爭奪戰 The Stone」(Netflix 有)、描繪低下階層青年嘅「青春之囚 In Youth We Trust」(Netflix 有)、入選金馬影展嘅獨立電影「黎明時道別傷感 Regretfully at Dawn」等。至於即將喺威尼斯影展首映，Nawapol Thamrongrattanarit 嘅新作「Human Resources」，相信會係下屆代表嘅大熱。
「GDH」同樣負責「A Useful Ghost」嘅國內發行，8月29日喺泰國公映，希望票房高開；相信台灣亦會好快公佈放映安排(唔知等唔等金馬)。最後，老問題﹕香港呢？
