我阿媽都入左醫院，但係佢唔係d咩重要野，佢只係中左d唔知咩超級病菌搞到佢又痾又嘔。
我阿媽入醫院，我老豆只係send左一張相黎，係我阿媽訓喺醫院張床既相。我睇完，問老豆“佢唔係胃痛咩？又做咩？”
老豆幾個鐘都無回覆。我都無理。而我細佬就已經即刻打左電話問候我老母。我見到佢張相，我覺得呢個人一定唔會死，我地全部人死晒都未輪到佢，佢每個月都話自己心跳得快，還是胃痛，還是頭暈，跟住又要即刻入急症室，要個醫生同佢做full body check，如果醫生話佢無野，佢就話個醫生唔識野，如果個醫生建議佢食藥，佢就話“梗係唔食藥啦！”
哇大佬。。。我日日聽佢咁講你知唔知我自己好想死呀！！！
我同肥仔講，我希望佢快d死啦，趁佢依家仲有我老豆公司個醫療保險，佢如果依家死，至少佢喺私家醫院死，我唔駛聽佢喺度講話自己好可憐要去政府醫院，媽媽叉叉。你知唔知呀，我一個禮拜至少打兩三次電話比佢，佢每次都同我講佢自己唔會去政府醫院，政府醫院係人間地獄，d人好可憐，又話政府醫院唔知比d咩藥佢食。
哇頂佢個肺，你自己又唔係李嘉誠個老婆，你只係一個平民，全香港90%既人都係去政府醫院架啦，點解你會覺得自己係個上等人，一定要去私家醫院呢？痴孖筋，真係痴孖筋。。。
事實證明我係啱架。
我尋日打電話比佢，我問佢出院未，佢話我唔關心佢，我即刻話，睇你張相就知你無野啦，跟住佢喺度笑。
佢話佢好慘，本來胃痛，點知就狂痾，又頭暈，老豆本來同佢去天水圍醫院，跟住佢話“天水圍無留醫架，如果我要留醫佢一定send我去屯門醫院，我梗係唔去啦”
哇大佬！！！咁你咪係無野囉。。。。
跟住佢話自己去左港安，入到去醫生以為佢係心臟病因為佢同醫生講個心跳得好快，我心諗，你痾嘔你唔同醫生講但係你居然同醫生講你心跳快，你話你呢d人係咪唔值得同情吖？？？
跟住佢話喎，自己可以住一人房，訓得好舒服，醫生照晒咩CT話佢無野，過兩日可以出院，醫生比左d probiotic佢食，佢話食完個胃即刻好左喎。。。
我聽完之後覺得好期待有狼來了既一日。
我唔覺得你衰。我自己仲衰。
我明白你，又明白你老豆有幾慘。
