《大士爺厚火氣》第十六集：炸彈

哈囉聽無三仙佇咧問啥貨。

覕佇簾簷跤的眾神來偷聽。

學問蓋飽的城隍擋袂牢，喝出答案：「擲炸彈啦！」

「規欉好好！無錯（剉）！」福仙𢯾的囡仔雄雄哭出聲驚著祿仙手中的如意無張持去摃著壽仙的桃仔⋯⋯

壽桃輾落來，佇廟頂跳咧跳咧，袂輸帶𩚨性的塑膠球，閣輾落去廟的中埕，掔著石攄，若拍珠仔大力射出，搩著三川殿後步口的柱仔，頂面的畫彩是「鳳凰朝牡丹」，po̍k一聲，壽桃佇彼對柱仔之間彈來彈去，愈來愈緊、愈來愈緊，柱仔就原地轉踅，直直遨，遨甲畫彩看攏袂清，色水濫摻做伙⋯⋯忽然間，鳳凰雙雙按柱仔內底飛出去，叫聲蓋響蓋清，後尾閣拖一欉一欉的牡丹，連枝帶葉，大塊大塊的花蕊，紅艷青翠⋯⋯鳳凰𤆬領牡丹向天頂飛去，正正是五彩十色、華麗繽紛，毋但眾神明，連鬼王嘛看甲愣去。

「啊！比放煙火媠一百倍！」挩窗講。

「彼敢著講！莫講你，我土地公活到這个歲頭，嘛毋捌看過！」

鳳凰牡丹愈飛愈懸，若色料搵水聊聊仔𪐞開，水是愈濫愈濟，色是愈來愈薄，色水愈看愈無⋯⋯到一个坎站，雄雄成做烏白，規个打貓轉烏白⋯⋯暴其然，天頂出現大隻的烏鳥，飛來時是「sǹg-sǹg叫是有夠大聲」，四面八方霆水螺，彼是空襲警報！空襲警報！鬼踮街仔路亂亂傱、咻咻叫：「爆擊！爆擊！米國的飛機來擲炸彈啊！緊來覕防空壕！」