《大士爺厚火氣》第十一集：柳枝

浮佇中殿的半空中，觀音是無法度形容的，伊是一種清涼的本體，佇南海普陀山的百寶嶺，形影美妙，規身軀的珠翠和瓔珞，玉體輕盈……觀世音菩薩，度眾生的艱難，解人世的苦厄，光明聖妙，照耀四方，南無觀世音菩薩，大慈大悲南無觀世音菩薩……。

「我的好姐妹啊！你到底是按怎？佗位無爽快？有心事敨袂開，就佮我講啊！予我替你鬥擔啊！」媽祖想欲行倚，去予妙光擋起來，觀音無應話，浮佇中殿的半空中，本底漚鬱燒熱的廟內底，反清涼的風出來。

「菩薩！菩薩！那是我阿媽拜的南無觀世音菩薩！菩薩！菩薩！來解救阮啦！」挩窗當咧呼，觀音的目睭皮沓沓仔擘開，喙唇輕輕仔振動：「救？我已經放棄矣！恁人類行入去現代化，建立法律文明，有足濟政府立案的慈善組織，敢若做真濟善事，閣一項一項報予我知，予我感覺穩心，想講共救苦救難的任務交予組織，毋免來操煩，準備退休規心來修行……。」觀音的聲音冰晶美妙。

「袂當退休啊！閣有鬼王愛掠！」挩窗插話，觀音無咧插，猶原講伊的：「想袂到啊！想袂到！彼日仔我易容去人世探查，完全毋是！完全毋是！恁人共我騙！表面講甲遐好聽，講是推廣佛法、賑災救人、幫助散凶人，實際上是欲來騙名聲、爭權奪利、偷用善款。你人啊人！騙神欺佛！罪不可赦！為組織為名聲為了欲起氣派的大樓，四界宣傳募款，煞來袂記得彼个『心』，起心動念的『心』，慈悲心才是上重要的，毋是遐个名聲金錢大樓，行善救世煞來變質，閣來掩崁欺騙，我心肝頭車跋反！車跋反！」傷心的觀音發出慼心的光，普陀巖的洞再次封起來，這改留賰的空縫比花矸仔閣較狹，狹甲賰一枝柳枝的形。

大士爺廟不再清涼，閣是熱拂拂、漚鬱鬱。