當首爾仍是叫漢城的那些年（卅）
五日驚心動魄嘅秋夕長假期終於完結。
即係咁，「驚心動魄」呢四個字，其實只係適合形容我目前嘅處境；如果我唔係因為有個分咗手嘅女朋友的話，咁呢五日假期，就應該係一個值得開心嘅假期。
「係囉，你都識講分咗手咯，咁仲有咩好煩呢？」
乜你真係覺得我哋分咗手咩？
兩個女人，一個同我講：「我哋分咗手㗎喇，不過你係屬於我嘅。」
另外一個，我同佢講我有女朋友，佢身體力行咁答我：「係咩？碰！」（有冇睇黃子華嘅《秋前算賬》？）
家陣你兩位喺咪夾埋玩我呢吓？
星期六，纛島漢江公園籃球場。
其實今日都冇乜心機打波。過完個中秋，我成個腦就係得 Chloe、Chloe 同埋 Chloe。以前有感情問題，我會搵 Erika；但呢次情況特殊，身在紐約嘅 Erika 幫唔到我，因為佢唔係韓妹。好彩，我仲有「美恩夫人信箱」。
「美恩姐姐。」無事不登三寶殿，我呢句姐姐係唔會白叫嘅。
「點呀口甜舌滑弟弟。」美恩嬌笑，其實叫姐姐呢招真係好好用。
我覺得，美恩的確唔會幫到我解決我呢段「三角關係」，但起碼佢係韓國人，或多或少可能會知道 Chloe 諗緊乜。最壞打算，就算乜都幫唔到，起碼都有個人傾吓。
我將我同 Chloe 嘅故事講咗俾美恩聽，佢聽完之後笑咗一陣：「原來我呢個弟弟好有異性緣呢！」之後美恩收起笑容：「介唔介意我問你個問題？」
「當然唔介意啦！」有咩好介意喎。
「你覺唔覺得，Chloe 係想玩 one night stand?」佢好認真咁問。
「唔……應該唔會。」三晚喇，要 ONS 的話我諗仔都生埋啦。
「佢知你有女朋友？」美恩個樣好疑惑。
「知。」我點頭。
「唔……咁你就真係要好好考慮應該點做喇。」美恩煞有介事。
「你意思係……」我有少少不明所以。
「弟弟啊，韓國唔係美國啊，」美恩好認真咁講。「喺正常途徑之下，Chloe 係冇可能同你交往㗎，因為你哋互不相識，亦冇 common friend，一般嚟講，我哋係唔可以咁識朋友，就算識咗，父母都唔會同意。」
吓？唔撚係啩？咩年代呀？
「可能你唔知，我哋大部份都仲係靠相親識男女朋友，就算唔係相親識嘅，譬如同事或者朋友介紹之類，我哋都會問清楚對方嘅背景，例如家鄉喺邊等等，因為如果係同姓同鄉的話，又會有另外嘅麻煩。」美恩繼續解釋，我開始想抄筆記。
「Chloe 而家主動咁結識你，然後主動約會你，連秋夕咁大節日都唔陪屋企人返家鄉嚟陪你；坦白講，一萬對情侶都未必有一對會係咁。秋夕唔跟父母返家鄉，可以俾屋企人鬧好耐㗎。」從美恩嘅眼神，我覺得佢有啲欣賞 Chloe。
佢繼續解釋：「除非佢諗住玩一夜情，但呢啲人通常都會去梨泰院識外國人。否則的話，佢真係好有勇氣，同埋對你好有好感，因為佢身邊嘅人絕對唔會認同佢嘅做法，萬一有咩事，佢嘅朋友同埋屋企人，都冇人會支持佢；佢真係好勇啊！」
「弟弟，如果你真係當我係姐姐的話，」美恩神色凝重。「你真係要好認真咁處理呢件事呀！如果你決定選擇你美國嘅女朋友，你一定要盡早同 Chloe 講清楚；如果你決定同 Chloe 一齊的話，你一定要好小心咁處理你同佢嘅關係，否則分開事小，你可能會破壞佢一生幸福㗎！」
Love is too young to know what conscience is; Yet who knows not conscience is born of love? Then, gentle cheater, urge not my amiss, Lest guilty of my faults thy sweet self prove.
佢講到咁，我真係有啲驚。就算係一個陌生人，我都唔希望破壞人哋嘅幸福；更何況呢個係我對佢有好感嘅女仔。
可能美恩都覺得佢自己語氣重咗，驚嚇嚫我，佢笑住話：「咁你又唔使咁驚嘅，拍拖又唔係叫你即刻結婚。咁啦，如果第時佢屋企人有問題的話，你話係我介紹你哋認識㗎啦！」
「多謝美恩姐姐！」有個咁嘅朋友/姐姐，我除咗多謝之外，仲可以講乜。
「咁你快啲帶佢出嚟，介紹俾我識啦！」
呢個時候，電話響，係 Chloe。我同美恩揚一揚個電話：「就講就到。」
「蠢蛋早晨！」電話傳來 Chloe 一貫 hyper 嘅聲音。「Morning call! 夠鐘起身喇！」
「波都打完一場喇，你啲 morning call 服務唔得喎。」
「你喺邊打波呀？」佢好奇。
「纛島漢江公園。」
「我喺附近喎！不如我過嚟搵你吖！」Surprise surprise! 又嚟喇。
「好，你知籃球場喺邊？」
「知，十五分鐘後見。」十五分鐘，佢真係喺附近喎。
「唔使約喇，」我回頭同美恩講。「佢喺附近，過緊嚟。」
「好呀，等我睇吓呢個 Chloe 有幾靚女，連我呢個有女朋友嘅弟弟都迷倒。」美恩笑得有啲古惑。
十五分鐘後，Chloe 嚟到。
「佢好靚女呀！」美恩細聲講。「我開始戥你個美國女朋友擔心；哈！」
「吓？係咩？」唔識點答佢，唯有行上前接 Chloe。
「蠢蛋早晨！」Chloe 喺我耳邊細細聲講；都好，起碼喺我啲 friend 面前仲識俾返啲面我。
我介紹 Chloe 俾美恩識，佢哋開始用韓文傾偈。唔知點解，Chloe 成個斯文晒，態度都好似有啲恭敬。或者 Sophie 之前講得啱，呢度真係乜都講階級。Chloe 喺美恩面前，只不過係個小妹妹。
然後我介紹 Chloe 俾 Ricky 同 George 識。從佢哋 O 晒嘴嘅表情，我可以想像到佢哋嘅詫異。咁又係，傳說中嘅「法國妹女朋友」突然變咗韓妹，係我的話都 O 嘴。
介紹完畢，我哋三個男仔出返去打波，留返兩個女仔喺場邊傾計；當然，我咁做係估計到，美恩會乘機起 Chloe 底。
我哋大約打咗大半個鐘波，然後大家坐喺場邊休息。
「不如我去買啲凍水俾你哋飲吖！」Chloe 提出。
「咁好吖，我陪埋你去。」佢去買嘢，我冇可能坐喺度啫。
「唔使，你休息吓，我好快返。」Chloe 自己一個行咗去。
「弟弟過嚟，」美恩同我講。「有啲嘢同你傾。」
「我聽唔聽得？」Ricky 想八卦。
「唔得，你坐好！」美恩命令，Ricky 即刻乖乖坐低；我終於知道喺美恩同 Ricky 嘅關係中，邊個係揸 fit 人。
「唔得，你坐好！」我扮美恩嘅發號施令。「姐姐好有威勢呀！」
「你放心，好快 Chloe 對你都會咁有威勢。」美恩笑住講，但隨即收起笑容。「我同 Chloe 傾咗一陣，呢個應該係家底清白嘅女仔嚟㗎！弟弟，你要好好考慮一吓我頭先同你講嘅嘢呀！」
「明白！」我係明喎，唔知點做之嘛……
「仲有，」美恩回復笑容。「頭先 Chloe 都叫咗我做姐姐，咁我就係你兩個嘅媒人喇！嘻嘻，你哋結婚一定要謝媒㗎！」
女人諗嘢通常都係遠到你睇唔到嘅。
同日晚上，狎鷗亭洞。
「蠢蛋叻咗喎，」Chloe 笑得好燦爛。「識得叫姐姐嚟收集情報。」
「邊係呢，」梗係死撐啦，邊得你咁醒，咁都識穿。「美恩八卦啫。」
「唔使驚喎，我都冇嘢；」佢笑住講。「美恩姐姐咁好人，多個朋友幾好吖。」
「你仲記唔記得，」到我收起笑容。「我喺仁川同你講過，我有女朋友㗎？」
「記得，Colette 小姐吖嘛！」Chloe 若無其事咁講。「我知喎，你唔使提我；我都冇話過鍾意你，亦冇要你為我做啲乜。」
「咁即係點？」佢同 Colette 最大嘅共通點，就係言行不一致。
「咁即係……唔知㗎！慢慢你咪知囉，蠢蛋！」佢邊講邊笑。「放心啦，我唔會搵冰插插你㗎喎！嘻嘻！好喇，goodnight!」
佢今次個 goodbye kiss 錫晒我兩邊面。
是你去喚醒我 努力才能被愛慕 但回頭目睹你 為我好自己不好 我這幸運兒合著眼睛 只得你沉重身影 如果這記憶非愛情 連天都不會太高興
（待續）
分享至
成為作者繼續創作的動力吧！
作者的相關文章
IF的沙龍 的其他內容
你可能也想看
- 美股定期定額從國泰世華 CUBE App 輕鬆開始
- 🔔 叮咚～時代的眼淚：投稿懷舊主題，vocus 送你經典「偉士牌樂高」！
- 【電影首映】假殺手愛上真兇手 #當殺手戀愛時，《捍衛戰士：獨行俠》格蘭鮑威爾和《水行俠》女友卓亞霍娜的黑色喜劇！電影推薦
- 2024韓國明洞住宿精選｜5間首爾明洞飯店推薦，多人房型、單人旅行必看的超值旅館，24小時服務櫃台超貼心！
- 《可憐的東西》由雙腿到雙耳之間、由肉體到心智——經驗主義式的地球人操作守則
- 我眼中的首爾 | 當地人帶著跑的首爾 Hot Place 龍山區 (1) 梨泰院解放村 이태원 해방촌
- 首爾🇰🇷有超夯人氣的三清洞摩西年糕鍋
- 【0905米勒財經早報】歐股收黑 德出口、歐投資人信心不振；記憶體族群 外資按讚；戴爾捎春訊 2檔台鏈急單
發表回應
成為會員 後即可發表留言
© 2024 vocus All rights reserved.