初雪（肆）
有感情 就會一生一世嗎？又再惋惜有用嘛？
搞好手續，我哋行返出報案大堂。我見到Chloe企咗喺度，對眼有啲腫，好明顯喊咗唔少；佢見到我，衝過嚟攬住我。
「我好掛住你呀！」Chloe攬住我講，講完又眼紅紅想喊。
「我咪喺度囉，冇事喇傻妹。」我錫咗佢額頭一啖。
—
仍然係Day 3，西朝鮮人民共和國圖們市看守所。
我嘅bucket list上面又少一樣嘢。
一個境外記者喺大陸採訪被扣留，我隱約覺得，我好快就可以攞啲甚麼人權獎，甚至諾貝爾和平獎；出返嚟造定飲衫都差唔多喇。
如果仲有命出得返嚟的話。
「馮先生，你是韓國廣告公司的部長，也是他們的貿易代表；」喺我面前呢位我已經分唔到係邊個單位嘅阿sir，一邊反覆咁睇我啲身份證明文件一邊講。「那你為甚麼要拍我們這裏的照片？」
OMG，第九十八次。喺過去嘅幾個鐘，佢已經問咗我不下N次同一個問題。
「這位長官，我再說一遍，」我仍然保持禮貌同客氣；鬼咩，真係嫌命長、好想攞諾貝爾和平獎呀？！「我當時只是無意識隨手拍照，覺得建築物很特別，沒有其他意思。」
原本我想同佢講「你打一句問一句我都係咁答」，但係一諗到呢度係中國我就吞返呢句說話 — 我真係怕佢哋會「落實執行」。
「我是相信的；可是，你拍照的時間和地點，也著實太敏感了點……」阿sir好明顯唔係好識處理呢單嘢。「看來，你還得在這裏多待一點時間，我要跟領導報告。」
「那……那……要待多久？」睇嚟，我呢條都係「坐館」命，坐云世界各國差館。「我的朋友，他們有來嗎？」
「最快也得扣留到明天，」阿sir公佈呢個壞消息。「你的朋友還在門外，我會叫他們不用再等你。」
阿sir起身，指一指辦公室另一邊嘅梳化，然後同我講：「你就在這裏休息一吓吧，這裏有水你可以喝；晚一點再給你拿點吃的。」然後佢出咗去，反鎖咗我喺房裏面。
還好，佢冇掟我落臭格。呢度雖然係間辦公室，但係話晒都有梳化有暖氣有飲有食；佢哋對我都算客氣咯。
唔知初雪同東元而家點呢？
Day 4，早上七點。
門外，有幾個人行過嘅腳步聲將我嘈醒，我望一望手表：七點正。我諗，啲行人聲應該係佢哋換班。
我慢慢坐起身，飲咗啖水，然後食埋琴晚食剩嗰個菜肉飽當早餐。
過咗大約十五分鐘，琴日嗰個阿sir同另一個官階更高嘅阿sir入咗嚟。
「還好嗎？」佢問我，我點頭。「來這裏坐！」
我如言坐咗喺檯嘅另一邊、佢哋對面。比較高級嗰個一邊睇我嘅身份證明文件、一邊打量我。
「香港人……韓國廣告公司代表……」佢自言自語。然後，佢問阿sir：「他拍了多少？」
「我們很快就阻止了拍攝，應該不多吧。」阿sir答佢。
「唔……」高級阿sir仍然喺沉思中。幾分鐘後，佢對阿sir講：「把膠卷（即菲林）充公、叫他寫悔過書，然後放了他。」阿sir唯唯諾諾。
「我說香港人，」高級阿sir同我講。「這裏是中國，不是香港。在旅遊區，你怎拍照是你的自由；可是，離開了旅遊區，你就給我規矩點、老實的待著！」
「你命生得好，是香港人，我們可不想惹上麻煩，光是報告也得寫幾份；」佢繼續。「否則的話，我可以依法行政拘留你十五天，也不可能有這麼好的地方給你待著。現在你給我乖乖的寫悔過書，寫完就可以離開，以後可別再犯！否則，我會讓你嘗嘗真正的看守所！」
我講咗聲「謝謝」，然後佢就施施然出咗去。
「你走運了！」阿sir同我講。「快點寫吧！」
走運嘅我如言喺張印有「圖門市看守所」抬頭嘅信紙上面寫咗封「悔過書」，然後連同相機入面嘅菲林交俾阿sir；還好，卷菲林啱啱換，冇乜幾多張相。
阿sir帶我返出門口，臨閂門前佢同我講：「別再回來了！」
我出冊喇！
當我定一定神、望緊周圍嘅環境嗰陣，我見到初雪同東元。
「哥哥！」初雪撲埋嚟攬住我。「你冇事吖嘛？」
我唔知係shell shock定太攰，攬住佢之後，喺佢耳邊講咗句：「小美，我冇事。」
「小美？」初雪個樣好疑惑。我唔想答佢，於是擰頭。
「初雪知道佢哋七點會換班、於是六點鐘就話要嚟等你；」東元笑一笑。「佢擔心咗你一晚呀！」
我望住懷中嘅初雪，有啲感動，有啲心疼；我喺佢額頭上錫咗一啖。
「我哋喺附近嘅酒店落咗腳，不如返去先傾啦！」東元提議，我點頭。
大約五分鐘嘅車程，我哋返到酒店。
「由於事出突然，我昨天晚上通知了老總。」東元轉台講國語。「他叫你回來以後，不論是甚麼時間，先給他打個電話報平安。」
「老總，我出咗嚟喇。」電話接通，我同老總講。「唔好意思要你擔心。」
「一切安好嘛？」老總問我。「有冇受傷？」
「冇事，一切安好，佢哋對我好規矩。」我答佢。「只係寫咗封悔過書同沒收咗一筒菲林。」
「相嘅嘢可以搵機會再影過，最緊要人冇事。」老總答我。「辛苦咗一晚，今日休息吓啦！叫東元帶你去長白山行吓、輕鬆吓。天池嘅風景真係唔錯㗎！」
「初雪妹妹，」我收線後同初雪講。「我哋上白頭山浸溫泉咯！」佢大力點頭。
幾個鐘後，長白山北坡某溫泉旅館。
我冇溫度計，但係體感話我聽，呢度可能有零下十幾度。落車之後，我哋都飛奔入室內。
東元幫我辦好入住手續後，同我講：「你們好好休息吧，明天早上，我再來接你們。」然後就走咗。
我同初雪去餐廳食咗個豐富嘅韓式brunch；可能踎完一晚監零舍肚餓，我今日都食咗唔少。飯後，我哋返咗上房休息。東元喺旅遊業方面，的確有啲計；房間嘅質素非常高，仲有可以容納兩三個人嘅私家風呂；睇嚟真係可以好好休息一吓。
我趁初雪睇緊電視，入咗沖涼房剃鬚。然後，我將頭先趁櫃台唔留意、順手牽羊拎返嚟嘅𠝹刀攞出嚟、啪斷其中三格、將佢收喺牛仔褲嘅火機袋入面。跟住，我喺鏡前面，用手仔細檢查頸上面大動脈嘅位置，定好位後，我用指甲喺上面一搣、留低咗一個大約1cm嘅記號。
我絕無自殺嘅意思，但係經過一晚看守所嘅經歷之後，我有所領悟：我可以落喺中國公安手上，同樣亦都可以落喺北韓執法部門嘅手上。落喺中國手上，我深信我老總會想辦法救我；總之，錢可以解決嘅問題就唔係問題。但如果落喺北韓人民保安部手上，我諗，呢個會係我最後解脫嘅方法。
因為，如果我俾佢哋知道我有美國護照的話，北韓嘅集中營、漫長嘅政治籌碼生涯，並唔係我所願意面對嘅事情，亦唔係我所能承受嘅事情。
搞掂咗呢啲「善終服務」之後，我心情豁然開朗。於是，我決定嚟個溫泉浴，洗滌一吓心靈。
浸咗一陣，有人拍門，係初雪。
「我可以入嚟嘛？」佢問我。
「可以。」你入嚟做乜鬼？
然後，我見到全身赤裸嘅佢，慢慢行咗入嚟，然後坐咗落嚟風呂入面。
「我想陪你浸溫泉。」佢有少少面紅；我點頭。你都坐咗落嚟咯，唔通我叫你起身出返去咩。
「呢度比澡堂舒服得多喇！」佢適應緊啲水溫，不斷將水往自己身上潑。
望住佢美好嘅身軀，我嘅男性反應越嚟越強烈。喺水裏面無遮無掩，我有啲尷尬，只好懶不經意咁用手遮住。我覺得自己好似啲AV男優扮緊草食男咁，明明扯晒旗，都仲要搵手遮住扮晒含乜答答欲拒還迎咁……
佢適應咗水溫之後，坐咗喺我身邊。然後，佢輕輕用手按摩我頸背同膊頭。
「辛苦咗一晚，我幫你按摩一吓吖！」佢同我講。
過咗一陣，佢轉到我身前，慢慢將溫泉水輕輕潑上我心口。由於我正面咁對住佢嘅胸部，我嘅反應已經完全「進入狀態」。好明顯，佢都發覺到；因為佢嘅身體已經接觸到我嘅「硬物」。
「你真係唔想同我親熱？」佢喺我耳邊好曖昧咁講、仲輕輕錫咗一啖。
「我唔想喺一個買賣嘅前題之下，同你親熱……」我答佢。但我自己知自己事，只要佢再堅持落去，我係完全冇辦法抗拒 — 我食肉唔食草㗎。
「你係第一個咁樣同我講㗎……」佢停咗手，然後笑得好燦爛。「明白喇。」然後，佢坐咗喺我身邊、伏喺我膊頭。
浸完溫泉，初雪繼續睇電視，我就落咗去樓下幫佢買零食、擺低返把𠝹刀，順便冷靜一吓頭腦。
返上去之後，佢食住零食、繼續睇佢嘅電視；我就欣賞佢食零食個樣。唔知點解，我好鍾意睇住佢食嘢，特別係當佢講咗俾我聽，佢飢荒嘅經歷之後。佢食嘢嗰陣，流露住一種「幸福」嘅表情同感覺，我好鍾意呢種感覺。
「你好鍾意睇電視劇㗎？」我問佢。
「係呀！我好鍾意南方嘅電視劇㗎！」佢滿面笑容咁答我。「我好鍾意學佢哋嘅對話。佢哋嘅生活好幸福呀！啲愛情故事又好感人，好好睇呀！」
既然係咁，我都無謂踢爆，韓劇其實吹水唔抹嘴；佢哋拍親都係啲唔可能發生嘅事情。佢睇得開心就得，做人無謂事事都咁清醒。
「你之前冇睇過南韓嘅電視劇？」我明知故問。
「嘻嘻，講個秘密你聽吖！」佢古古惑惑咁笑。「其實兩年前，我試過喺同村嘅朋友屋企，睇咗兩三分鐘嘅南方電視劇錄影帶。」
「淨係兩三分鐘？」我再問。
「哦；」佢點頭。「爸爸叫我唔好睇㗎，話好危險，俾人告發要坐監㗎……但係我又忍唔住好奇喎！嘻嘻！」
「哥哥呀，」佢停咗食嘢，望住我。「你剛才叫嗰個……小美……小美係邊個呀？你嘅戀人？」
「唔……」我點頭。「以前嘅戀人，最近分開咗。」
「你可唔可以講你哋嘅故事俾我聽呀？」佢問我。
其實當我叫錯佢嗰陣，我已經預咗佢會咁問；女人嘅嘢，有時候又唔係真係咁難估。於是我將我同Chloe嘅故事，慢慢咁講俾佢聽。其實，呢幾年我一直都唔鍾意同朋友講我哋嘅事；除咗知情或者見過Chloe嘅朋友之外，我甚少提及我哋嘅事。
我都唔知點解我會同初雪講；可能，因為大家萍水相逢，兩三個星期後大家都唔會再見面。所以，我對佢冇乜誡心？我都唔知。
初雪對我哋嘅故事好有興趣，聽得好入神；聽到最後，佢眼濕濕咁望住我。
「如果你同小美姐姐可以繼續喺埋一齊、白頭到老就好喇……」佢好感慨。
「世事豈能盡如人意……」我答佢。「或者，我哋嘅緣份，就只能夠行到呢一步啩……」
「如果我嘅初戀，都可以咁感人就好喇……」佢一邊諗一邊講咗呢句。
「慢慢嚟啦，你總會遇到你心愛嘅人，」我答佢。「總有一日，你會遇到你獨一無二嘅初戀，帶俾你美麗嘅回憶。」佢點頭。
我心裏面嗰句係：點都好，我希望你將來遇到嘅，係平淡但細水長流嘅戀愛；我希望你嘅愛人，可以同你長相廝守。
我希望，我自己都可以。
忘掉愛過的她 當初的喜帖金箔印著那位她 裱起婚紗照那道牆及一切美麗舊年華 明日同步拆下 忘掉有過的家 小餐枱沙發雪櫃及兩份紅茶 溫馨的光境不過借出 到期拿回嗎 終須會時辰到 別怕
請放下手裏那鎖匙 好嘛
（待續）
本故事人物及情節如有雷同，實屬巧合。分享至
成為作者繼續創作的動力吧！
© 2024 vocus All rights reserved.