初雪（壹）

延吉係一個好唔中國嘅城市。對比起中國任何其他城市，甚至上海、北京、香港、澳門，延吉都係一個非常「另類」嘅城市。

因為延吉並唔係一個漢人（我哋對「中國人」嘅stereotype，其實泛指漢人）嘅城市。根據維基嘅資料，延吉嘅人口，有百分之五十八（當年係百分之六十以上），係朝鮮族人。亦即係話，呢個城市嘅majority唔係漢人。

所有路牌、廣告、告示，都係中韓二文並示。所有人喺冇preference之下，一開口就同你講韓文（一種好古怪嘅「韓文」，文化語同標準韓語並用）。電視台嘅選擇，當然有海量嘅中國電視台，但一般市民會收睇、甚至追劇嘅，係南韓嘅MBC、KBS之類嘅電視台，聽嘅係韓國新鮮熱辣嘅K-pop。年輕男女嘅衣著，完全係百分百嘅「韓風」；比香港尤甚。

唔講背景你聽的話，你會以為延吉係南韓殖民地。

只不過，處處「神出鬼沒」嘅簡體字同「黨八股」式嘅文宣，暗暗話你聽：呢個只不過係虛有其表嘅「假韓國」；骨子裏，呢度仍然係中國。

仍然喺某飯店嘅廂房。

其實，呢間嘢橫睇掂睇，都係夜總會，唔明點解係都要叫「飯店」。

大約五分鐘後，小英帶住一個著住傳統韓服嘅女仔返入嚟。

「馮先生，她叫美姬，在朝鮮長大，來了中國才沒多久。」然後，小英轉身同個女仔講：「美姬啊，好好侍候馮先生。」美姬聽到後點點頭。

我眼前嘅美姬好聽話咁坐咗喺我側邊，然後繑住我手臂。小英同女侍亦都識趣咁靜靜離開。

「馮先生，喝酒嗎？」美姬以生硬嘅國語問我。我定一定神，開始留意美姬嘅外表。

美姬有一張唔屬於呢個地方嘅臉孔。一臉稚氣嘅面孔話我聽，佢應該只不過係二十出頭。清純嘅外貌、一對大眼睛、襯托住精緻嘅輪廓；佢望住我嗰陣，有啲似《假如愛有天意》裏面、著住高中校服嘅孫藝真。唔知點解，喺清純嘅眼神背後，微微滲透住一種揮之不去嘅寒苦。

「其實，你可以同我講朝鮮語㗎；」我用韓文答佢。「雖然我只係學過南方嘅標準韓文，但我哋講慢啲的話，應該冇問題嘅。」

「你識韓文㗎？好呀！我仲以為今晚會好靜𠻹！我啲中文實在講唔到幾多句……」佢流露出一臉喜出望外。「你喺南方嘅朝鮮人？」

「我唔係朝鮮人，我係香港人；」我答佢。「我喺韓國公司工作。」

「香港？喺邊度㗎？」佢一臉問號。

「南方。」我係咁倚答；講真，解釋完都唔知佢明唔明。

「朝鮮嘅南方？」佢反而有興趣問落去。「近唔近濟州？」

「中國嘅南方。」我繼續答。

「哦……遠唔遠㗎？」佢有啲出神咁，嘗試去想像中國嘅南方即係喺邊。

「距離延吉大約三四個鐘飛機。」一時間，我唔知點樣去量化形容香港同中國東北嘅距離。

「飛機……咁如果搭火車去香港，要幾耐㗎？」美姬原來係個「問題少女」。

「唔……大約兩日啩……」我真係冇諗過呢個咁後現代嘅問題。

「嘩！好遠呀！」美姬驚嘆。「我從來未試過搭多過幾個鐘嘅火車㗎……」

喺對話嘅過程中，美姬一直都伏喺我膊頭上，我可以仔細咁睇清楚佢嘅面孔。同Chloe一樣，美姬都擁有朝鮮人嘅雪白肌膚。唔同嘅係，Chloe嘅眼神永遠都似夢迷離；美姬嘅眼神就好實在、帶少少天真。同夜店嘅風花雪月、紫醉金迷完全格格不入。

喺閒談嘅過程中，美姬點咗幾個小菜，我哋一邊食一邊飲酒傾偈。

「其實，如果你唔想的話，你唔使飲咁多㗎；」我望一望已經開始面紅紅嘅美姬；杯杯清嘅佢，四五杯之後，已經開始見底。「飲酒嘅嘢，隨量得㗎喇。」

「多謝你！」唔知係我眼花定點，佢對眼好似有少少水汪汪。「呢段日子，你係第一個咁樣同我講㗎……」

「你嚟咗中國幾耐？」我問佢。

「下個月中半年喇。」佢一邊夾緊餸一邊答我。

以前，我成日同Chloe開「韓國殘廢餐」嘅玩笑，佢每次都會用食物抹到我成口成面餸汁同油嚟回應；估唔到，今次真係有得食「殘廢餐」。成餐飯，從頭到尾都係美姬夾到我嘴邊餵我食，我連筷子都未掂過。佢技巧好好，唔好話面，我連嘴角都冇乜點沾油，因為每食完一啖，美姬都會幫我印乾淨個嘴。

如果我老咗要住老人院嗰陣，啲姑娘都係餵得咁叻就好喇。

飲飲食食咗好一段時間，我望一望表，差唔多九點。我示意美姬叫小英入嚟。叫咗小英入咗嚟之後，美姬好識趣咁自己出返去 — 方便如果我「彈鐘」唔帶佢「去街」的話，佢唔喺度大家都會冇咁尷尬。

「小英，我想帶美姬出街；」我索性轉台講韓文。「不過，唔係一晚，係兩三個星期。」

「兩三星期？」小英詫異。「馮先生你諗住要美姬陪你兩三個星期？」

「無錯；」我點起支煙，施施然答佢。「我呢兩三個星期，都要係東三省四圍去視察業務；有個女仔陪住我，會冇咁悶。」

「唔……我哋未試過有客人提出咁嘅要求喎……」小英面有難色。「我唔知老闆同美姬肯唔肯……」

「你可以去問你老闆同美姬，」我答佢。「錢銀方面，我今晚會俾晒。唔夠的話，我送佢返嚟嗰日會找埋啲尾數。」

「好，你等我一陣，我去問佢哋。」小英講完後出咗去。

大約五分鐘，小英同美姬一齊返入嚟。

「馮先生，我問過老闆同美姬，佢哋都冇問題；」小英滿面笑容。「但係美姬就想返屋企執兩件衫，唔知方唔方便呢？」

「方便，當然方便啦！」我答佢。

美姬坐低喺佢坐開嘅位置，繼續繑住我，同我講：「我就住喺呢度附近，你陪我返去一次？」我點頭。

喺美姬屋企樓下等佢執咗啲衫（由於佢同同事共住宿舍，所以我唔方便上去），我哋就一齊行返去同樣喺附近嘅酒店。

路上面一路落住小雪，當我正想話行快啲唔好𣺉到成身雪之際，美姬放慢腳步、喺雪地上面慢慢起舞。唔係剛才喺夜店睇表演嗰類舞，比較似Gene Kelly喺《Singing in the rain》嗰啲好隨意嘅舞步。

「你好鍾意落雪㗎？」我俾佢嘅舞步感染到，笑住問佢。

「唔！」佢大力點頭。「我好鍾意雪㗎！由細到大，我一見雪就好開心㗎喇！」

我一邊行、一邊睇住佢唱唱跳跳，個感覺就好似一對啱啱拍拖嘅戀人、喺街上卿卿我我咁漫步……；但係，我心裏非常明白，美姬只不過係我呢次秘密採訪行程嘅其中一個cover up。

返到酒店，我招呼美姬坐低，攞咗支水俾佢。佢坐咗一陣，然後同我講：「我想沖涼。」我點頭。

我趁佢行開咗，就開notebook check email。還好，喺呢個咁偏遠嘅地區，酒店都仍然有得上網；雖然，呢個只不過係喺great firewall之內嘅「內聯網」。

睇咗一陣email（我當然有個「牆內email」啦），美姬出返嚟；赤裸嘅身軀上就只剩內褲。佢行埋嚟、拎開我部laptop、然後坐咗喺我大脾上面、開始輕輕咁錫我……

可能人都係傾向服從別人嘅引導，我同佢開始熱吻，我隻手亦都開始從佢嘅背部、慢慢移到佢身前。當我撫摸緊佢柔軟嘅胸部嗰陣，我突然醒一醒！

「美姬……」我停止咗我哋個kiss。「其實我只係想你陪我，冇諗過要佔有你嘅肉體……」

我並唔係嗰啲好有道德底線嘅「聖人」。我當時擔心嘅，係當我同佢「假戲真做」之後，我就唔可以再專心咁完成呢兩個星期嘅assignment；我怕我會對呢個我唔討厭嘅女仔投入感情。更何況，我雖然同好多女人發生過關係，但當中從來都冇牽涉過金錢交易；呢一點，我一定要向自己交代。

「係唔係我做得唔好？」美姬面上略帶惶恐。

「唔係，唔係咁樣；」我認真咁答佢。「只不過……總之，我覺得未係時候……」原來，要好認真咁同個女仔講「我唔想搞你住」，係一件好困難嘅事。

美姬知道唔係因為佢「服侍不周」之後，面上有返笑容。然後，佢同我講：「呢段日子，你係第一個咁樣同我講㗎……」佢行去佢個旅行袋度，拎咗件tee、著返之後，再坐返喺我大脾上面。

雖然佢著返衫，但仍然係「真空凸點」；面對一個咁誘人嘅情境，我嘅生理反應，其實一直都未能平復。如果美姬嘅觸感唔係太過麻木的話，佢應該感覺到，有人搵「鎗」隊住佢……

「多謝你，馮先生。」講完，佢又好似喺飯店咁，伏咗喺我膊頭上。

「唔好再叫我馮先生喇，」我笑住同佢講。「好似好『見外』咁……」但係一時間，我又諗唔到，應該話個咩名俾佢聽。

「咁不如……不如我叫你哥哥吖！」美姬靈機一觸。「我睇南方嘅電視劇，佢哋都係咁樣叫……男朋友㗎……」講到「男朋友」三個字，美姬有啲面紅。

「都好，」我答佢；其實「哥哥」（ Oppa/오빠 ）呢個稱呼對我嚟講，好有親切感。「咁你介唔介意話我聽，你真名叫咩呀？」我知道，喺煙花之地，斷估佢都冇可能用真名待客。

「當然可以啦！」佢好甜咁笑一笑。「我叫 햇눈 （Haet-Nun），南方嘅說法，即係 첫눈 （Cheot-Nun/初雪）。」

初雪；唔怪得之佢咁鍾意雪。

（待續）

本故事人物及情節如有雷同，實屬巧合。