初雪（貳）

自從我「拒絕」同初雪發生關係之後，我同佢嘅相處，就變咗場足球賽。

唔係互有攻守個隻足球賽，係全場佈滿越位陷阱嘅「足球賽」。

我以為，喺一段買賣嘅關係裏面，金主俾咗錢但拒絕收貨，金主同貨主嘅關係，就會回復疏離。但係整個晚上，初雪就係T恤底褲咁攬住我瞓。喺我懷中嘅佢、同埋佢真空凸點嘅胸同長腿，整個晚上都同我有「肌膚之親」。

面對住一個雙十年華嘅美女、一副咁誘人嘅身軀，我成張床都係「越位陷阱」；稍一不慎，我對手、甚至其他身體部位，就會「越位」、或者「手球」。俗啲講：我基本上成晚都扯住旗瞓。

我非常絕對地唔敢肯定，我真係可以對住佢兩個星期都規規矩矩……

Day 2。

我感覺到有人騎咗喺我身上，我擘開眼一睇，當然係初雪啦。

「哥哥，起身喇！」素顏嘅佢，一臉純真。「我想食早餐呀。」

我望一望表，八點，差唔多都要準備出發。於是我起身梳洗，然後同初雪落咗去餐廳食早餐。

韓式嘅早餐，係名副其實嘅「早飯」：有湯有餸有飯；以前每逢週末同週日，Chloe都會喺朝早煮傳統嘅早飯。我面前嘅早餐亦都係咁；好明顯，呢個唔只係南韓嘅習慣，就連整個朝鮮族都係咁。

然後，我發現初雪好為食。基本上，成個早飯我冇食落肚嘅嘢，最後佢都掃晒！原來韓妹（朝鮮妹）為食，又係民族特性。

食完早餐，我哋出咗延吉機場，搵我嘅接頭人「閔東元」；佢喺機場開紀念品店。其實，喺前日到步嗰陣，我已經觀察過佢間鋪幾分鐘；不過，我冇即時同佢「相認」。

無論對延吉呢個城市、定係閔東元呢個人，我都毫無認識，但係我差唔多要將自己條命交托喺佢手上；講真，我唔實地視察一吓個實際環境之前，我好難就咁講個「信」字。畢竟，佢係唯一知道我真正身份嘅人，都係小心啲好。

去到機場，我行埋去佢個鋪位度，準備同佢打招呼之際，佢開聲先：

「馮先生，歡迎光臨！我是閔東元，叫我東元就好。」佢用國語同我打招呼。

「閔先生你好！」我都用國語同佢打招呼。「可以找個地方談一談嗎？」

「我們去喝咖啡吧！我請客！」東元指一指冇幾遠嘅咖啡室。

於是我哋三個去咗飲咖啡。

「這位是……」啱啱坐低，東元望一望我身邊嘅初雪，然後問我。

「佢叫初雪，係我嘅朋友；」我轉台用韓文介紹初雪。「佢由韓國嚟嘅。」

初雪同東元握手、打咗個招呼。

「那麼，我們用國語交談吧！」東元提議；好明顯，佢唔想初雪知得太多。「我在部隊的弟弟告訴我，先頭部隊後天就會開始進駐圖們。後天以後在公路上，可能拍到運兵車的照片。」

「他有沒有告訴你，駐軍的規模？」我問佢。

東元將放喺檯面嘅手微微伸開，豎起十隻手指。

十萬，即係十個師嘅兵力。

「能調動那麼多人嗎？」我再問。

「勉強；」東元答我。「有的從北京軍區過來。」

「『大少爺』那邊，要出大事嗎？」大少爺，即係金正日。

「說不準，」東元有啲猶豫。「部隊那邊說，是為了防範難民湧入。」

難民湧入？睇嚟，北京覺得北韓將會有劇變；否則，又點會有「難民湧入」。

「明天吧，明天我帶你去圖們看看，也許能從當地人口中，聽到一些風聲也說不定。」東元一邊呷咖啡一邊講。「今天你可以跟你女朋友在延吉逛逛，要我載你們嗎？」

「不用了，謝謝！」我答佢。我拖住條女，仲擺你個電燈膽喺度咩。「我們會照顧自己；明天見。」

東元送我哋去搭車離開機場；臨走前，佢拍一拍我膊頭，然後同我講：「放心吧，我跟張老總合作了二十年，不會令你失望的！」原來，佢同老總已經係廿年朋友，咁我都放心啲。以我老總呢種「老江湖」，一個人能夠同佢合作到二十年，應該冇問題嘅。

同東元分手後，我同初雪搭車返咗入市區。

「初雪妹妹，你今日諗住帶我去邊玩呢？」我問佢。

「哥哥呀，其實呢……」初雪個樣有少少唔好意思。「我雖然嚟咗半年，但係我冇乜點去玩㗎……好多地方我都冇去過……」

「咁……我哋今日去邊呢？」呢個問題，其實又唔係咁難諗；反正兩個邊度都未去過，即係話，去邊都可以玩一餐。

「唔……呀！」初雪突然靈機一觸。「不如我帶你去，我經常會去嘅地方吖！」

「好呀！」都好，反正今日冇正經嘢做，花少少時間了解吓你都唔錯。

三十分鐘後，延邊大學某飯堂。

「你話帶我去你經常去嘅地方，就係呢度？」我問初雪，佢好開心咁用力點頭。

我對呢個地方冇任何嘅歧視；不過，點解初雪會咁鍾意呢個地方呢？呢一點令我有啲好奇。

「哥哥呀，」初雪傻笑。「我肚餓呀……」呢條女真係好鬼擦得。

「咁我去買嘢俾你食啦。」我講完就起身出去買嘢食。

我買咗兩個김치찌개 （泡菜鍋），然後同初雪坐喺窗邊嘅位置食。坦白講，食物質素一般；一個專事生產「頹飯」同「抵屌飯」嘅地方，你可以有幾大期望？但係眼前嘅初雪應該唔係咁諗，佢一邊食、一邊仲面露笑容，睇嚟佢真係食得好開心；見到佢呢個咁可愛嘅樣，就算唔係太好食嘅泡菜鍋，霎時間都好似好食咗。

食完之後，初雪都仍然滿面笑容，好似好開心咁。冬日和暖嘅太陽照到佢素顏嘅面上，相比起琴晚夜店同埋酒店房裏面嘅暗燈，今日，我終於可以睇清楚佢嘅樣貌。

洗盡鉛華之後，初雪嘅面上帶有一種純真嘅稚氣。如果唔知佢嘅身份的話，我會估佢係個高中學生。

「初雪呀，」我開始搵話題同佢傾偈。「你今年幾歲呀？」

「啱啱二十；」佢豎起兩隻手指。「我出世嗰日，啱啱係初雪，所以爸爸改我個名『初雪』。」二十歲，我足足大佢九年。

「你家鄉喺邊㗎？」我問佢。

「惠山市（ 혜산시 ）附近；」初雪答我。「大約距離惠山一個鐘車程。你知唔知惠山喺邊呀？」

「聽過，邊境城市，過咗鴨綠江就係中國。」佢聽到之後，點點頭。「咁點解你會嚟中國做嘢嘅？」

呢個時候，初雪面上嘅笑容消失，一直好實在嘅眼神突然變得好虛無。佢望住窗外嘅景物，冇答我。

「對唔住呀，我唔應該咁問……」我發覺自己講錯嘢之後，隨即道歉。「你唔需要答我嘅問題。」

「唔緊要，我冇事；」佢望住我。「不過，成件事……原本唔係咁㗎……」

我唔敢再追問，於是我冇講嘢，等佢自己隨心，想講就講。

「大半年前，首都有一班人嚟咗惠山市；」靜默咗一陣之後，初雪開口。「佢哋逐條村咁開招聘會，話要請女服務員去中國工作。佢哋嘅要求好高，所有應徵嘅女仔都要度身高體重。招聘會完結之後大約一個月，我收到取錄嘅通知。當時，全家人都好開心，因為，屋企嘅環境會因為咁好起嚟。」

「佢哋嘅條件好好？」我插口。

初雪點頭，然後繼續：「我每個月有六百蚊人民幣，係我屋企總收入嘅四倍！」佢講完後，停咗一停。「取錄之後，我同其他七個女仔，一齊去惠山接受培訓。每日，我哋都要接受中國語同舞蹈嘅訓練；一個星期只有半日休息。」

「完成咗一個月嘅訓練之後，佢哋幫我哋安排好證件，然後就帶咗我哋嚟中國。」初雪嘅語氣開始有啲忐忑。「第一晚工作，我哋跳完舞之後，被安排去陪唔同嘅客人飲酒。以前喺農村，我飲酒嘅機會唔多，所以飲唔到幾多杯，我就醉咗。點知，我醒返之後，就發現自己喺酒店房……」

初雪終於忍唔住眼淚，喊起上嚟。我過咗去佢隔籬坐，遞咗張紙巾俾佢。佢抹完眼淚之後，伏咗喺我膊頭，冇再講落去。

初雪嘅經歷，喺香港，叫「迷姦」。

「嗰晚之後，你同其他女仔，有冇同你哋社長反映？」我問佢。

「有，佢話呢個係工作範圍之一。」初雪答我。「同時，佢叫我哋唔好反抗、唔好出走，否則……我哋家人會有事……我好驚佢哋會好似……消失咗以後都見唔到……」初雪再一次忍唔住喊。

我唔想佢再繼續諗啲唔開心嘅嘢，於是我轉話題：「初雪妹妹，點解你咁鍾意食嘢嘅？」

「哈哈！係呀，我真係好鍾意食嘢㗎！」佢破涕為笑。「呢度咁多好味嘅嘢食，我要日日食，食到返家鄉為止！」

「咁你幾時返家鄉呀？」我再問佢。

「四月！」佢好似完全唔記得一分鐘前講緊嘅傷心事，笑得好燦爛。「所以走之前，我要食好多好多好味嘅嘢！朝鮮菜中國菜都要食！」

「你咁食法，你家鄉成條村都俾你食晒啦！」我笑佢。

「媽媽都話我大食㗎！不過，我哋唔係日日都有機會咁食；」佢若無其事咁講。「一日有兩餐食已經好好，大部份時候都係得一餐。幾年前，試過幾日先有一次嘢食，都係野菜。除咗太陽節（金日成忌辰）之外，唔係日日都一定有嘢食㗎！所以，有得食我一定食好多㗎！」

初雪呢番說話，以一個完全唔傷感嘅語氣講出嚟。但係，聽完之後，我個心好唔舒服。我哋由細到大，都聽唔少埃塞俄比亞之類地方嘅飢荒新聞，但係第一次有一個經歷過飢荒嘅人，坐喺我身邊同我講飢荒嘅經歷。越平淡嘅語氣、震撼越深。

「咁點解你咁鍾意嚟大學餐廳嘅？」我再轉話題。「你經常嚟食嘢㗎？」

「係呀，我經常嚟㗎！」佢講得好興奮。「我喺家鄉，聽過同鄉嘅叔叔講過讀大學嘅嘢，我好想讀大學呀！但係我哋條村，好少人讀過大學；冇得讀，咁嚟坐吓都好開心㗎！不過，今日之前，我未試過喺呢度食嘢，太貴喇，我每個月得一百蚊零用錢，食咗就冇㗎喇。」

可能，我哋喺香港嘅生活，實在太幸福喇；可能，我呢世都唔會明白，初雪坐喺延邊大學飯堂嗰陣、嗰種短暫擁有所帶嚟嘅滿足心態。

我哋的確活得比初雪好，但係，我哋有珍惜過嘛？

（待續）

本故事人物及情節如有雷同，實屬巧合。