國際合規新聞報道@規佬筆記 (2)

規佬鍾意睇波，但係都唔會特登將足球新聞帶嚟呢個 Page 嘅。今次趁週末，介紹返英超球星 Marcus Rashford (拉舒福特) 利用自己嘅影響力，推動一啲對社會及弱勢社群有意義嘅運動，講緊嘅其實係 social responsibility 。

社會責任，香港人舊時叫「發財立品」。即係，李嘉誠捐錢起間圖書館，四叔又贊助一幢大學教學大樓，然後信興或者何善衡又捐錢畀大學做呢樣嗰樣。

但係世代唔同咗，社交網絡嘅盛行，令到有錢、有權或者有影響力嘅人，可以身體力行，影響身處嘅社區、國家甚至世界。早前 Black Live Matters 運動，就有唔少 NBA 球星親身到示威現場聲援。

不過 Rashford 行得更前，佢積極利用自己喺社交網絡嘅影響力，促使政府作出改變，例如話喺疫情期間，延長學童免費膳食到暑假。佢嘅呼籲形成雪球效應， followers 群起向政府施壓，甚至獲得國會議員嘅支持，最後首相 Boris Johnson 亦要屈服。

出身寒微、來自單親家庭嘅 Rashford 年僅 22 歲，但已經用行動回饋社會。佢嘅以身作則，相信都會令唔少權貴以至企業領袖汗顏。

企業責任 (Corporate Social Responsibility, CSR) 近年成日都講，香港上市公司亦因應交易所要求而喺年報花更多篇幅講 ESG (環境、社會及管治) ，例如話一年慳咗幾多張紙，義工隊搞咗幾多活動，以至公司男女比例係點，之類。某程度上，都係整色整水嘅。

唔知要求香港嘅企業好似 Rashford 咁為公義發聲、真正肩負起「社會責任」，會唔會係一件難過登天嘅事呢？畢竟 do the right thing 同 don’t bite the hand that feeds you 有時候係自相矛盾嘅。 Rashford 踢好波、有高薪同贊助，只要唔好胡亂揮霍就基本上衣食無優。對於企業嚟講，事情似乎真係冇咁簡單。

FT friend link

除咗新加坡，亞洲時區內另一個大型金融中心就數到東京。

FT 報道，日本政府有意招攬對沖基金經理等人才去東京開檔，可以豁免簽證、提供稅務優惠以至免卻辦公室嘅租金。

Fidelity 早前揀咗東京作為 trading desk 嘅 business continuity site 。呢啲咪霸氣囉，我細細個做 bank 嗰陣，後備 office 喺屯門㗎咋，東京。

不過香港嘅朋友可以著返條褲、抹返乾塊地先。畢竟日本呢個國家嘅語言同文化都同香港有好大距離，工時長而且階級觀念極重，junior-middle level 嘅朋友想 relocate 去日本的話，首先都係入啱跨國行先，然後咩都唔使做。緣份到了，自然有 offer 畀你過去。

FT link:

呢篇堅係要同大家 share friend link 。 (按：配圖錯咗，睇留言，對唔治)

水深火熱嘅德國 FinTech 企業 Wirecard 上周被爆造假帳， 19 億歐元存款不翼而飛， CEO 黯然下台之後，情況繼續惡化：

- 首先，公司 miss 咗出業績嘅期限，超過廿億歐元嘅銀團貸款隨時被 cut

- 其次，公司聲稱存放消失的存款嘅兩菲律賓銀行 BDO 同 BPI 都表示冇見過呢嚿錢， Wirecard 或者傳說中嘅trustee 並非菲律賓銀行嘅客戶。

- BPI 行政總裁話，核數師 EY 攞住、由 Wirecard 提供嘅文件，一睇就知道係假嘅。

咁大家而家知道 bank confirmation 嘅重要性啦？

FT friend link:

星期一嘅報紙向來冇乜新聞，因為星期日大家都放假吖嘛。咁，自然就適合一啲冇乜時間性嘅專訪出街。

京基金融，上市編號 1468 ，舊年收益一億零，淨虧損 89 mil 左右。一、四牌叫有錢賺，三球。

其實 1468 呢隻殼本身叫「英裘」，做毛皮生意嘅。即係，皮草囉。股價喺毫零到三毫之間載浮載沉，係到京基入主先至叫做爆過下 seed 。公司市值十幾億，比較細。

講完背景。呢啲準備喺香港大展拳腳嘅中資行，當然要省靚招牌。 28 歲仔掌舵人，想申請埋 6 號牌沾手 IPO 、申請 virtual bank 同信託牌、搞 FinTech ，非常美麗。 Very rosy。

咁副稿話會主打財富管理，都係吼準大陸嘅有錢人，睇下點解「傳承」財富啦。不過時勢唔就，唯有連新加坡嘅 trustee 牌都要諗埋啦。

從合規角度睇，我欣賞公司管理層將 CRS 匯報嘅影響都攞埋出嚟講：「富豪要通報分佈全球的資產，將促使他們重新審視財務規劃，『唔再係以往主要海外升學、拎外國護照咁簡單』」。不過我唔肯定咁樣政策正唔正確喇，規佬格言係 #我討厭政治。

As a whole ，有人辭官歸故里，有人漏夜趕科場。今朝講完 Fidelity 謀定後路，而京基喺呢個時勢入場玩埋一份，都真係勇氣可嘉～

明報 links:

Virtual bank 真係一個講極都唔厭嘅話題，事關永遠只聞樓梯響，不見人下來。

《明報》今日就綜合咗啲數據，等大家知道 VB 呢壇嘢到底有幾燒錢。其中，中銀、京東同渣甸聯手嗰間Livi 係唯一一間連內部測試都未開始嘅 (據報道講啦) ，但人哋一揼就揼 25 億港銀出嚟，按呢個比例燒多十年都仲得。

但 Livi 都唔及 Mox 蝕得咁多：渣打、電盈同攜程一齊玩，仲喺沙盒 (sandbox) 入面就已經 incur 咗近三億開支，舊年蝕兩億六。

大有大燒，細嘅可以燒得更豪爽，我指比例上。平保旗下檔嘢股本得六億，舊年蝕一億有多。唔知會唔會有一日要注資呢？係嘅話都應該係開創先河。

不過你都咪話，騰訊、 ICBC Asia 、港交所同新世界鄭志剛合資嘅富融 (好明顯係富途個 friend) ，原來只係得五億港銀做本，舊年就燒咗三分一，如果仲唔快啲開門做生意⋯⋯

大家或者好眼力，會發現螞蟻開支半億都未到。咁人哋母公司螞蟻金服喺香港本身已經開咗檔， VB 嘅成本係咪完全 charge 落 VB 度，又唔係我哋呢啲外人可以知道嘅。

明報link:

SFC 近年重手罰款就見唔少，尤其是啲新股保薦人就億億聲咁罰。

不過，經紀行因為衰 AML 而受罰，通常都係七位數嘅事，舊年國信被罰 1,520 萬已經令人嘩嘩聲。

今日新聞真係特別多 (友版君子馬蘭頭 — Ivan Li 李聲揚話規佬好勤力，我話咁啱多嘢啱寫啫) ，傍晚老證出通函，重罰國泰君安香港 (1788 ，唔係 2611) 2,520 萬。

原因？都係 third party payments 啦。講緊嘅都係 2014 初至 2016 年中期間 (你諗下監管機構要查你到有判決係需時幾耐) ，間行處理咗超過 15,000 宗第三者存款/提款 (平均一日十零廿單) ，涉及 375 億港元，當中 11,000 宗聲稱係存/收款人係戶主嘅朋友 (果然至怕萬一，同埋「朋友」嘅概念早在陳冠希閃卡事件模糊到不得了) 。

咁國泰君安就被指未有盡責調查呢啲第三者交易，即使係無合理理由，或者款項同客戶身份唔夾 (聲稱家產少過兩球半嘅，戶口點解可以轉走幾億款項？) ，甚至存入方式迂迴曲折，經紀行都冇深究或者舉報。

即使問咗，客戶鳩噏都可以當秘笈，行方並冇加以驗實。又即使公司有政策要求員工審視可疑交易，員工喺執行上都係甩甩漏漏，有既定嘅表格但根本冇人用，淪為裝飾品。

其他罪名仲包括 Compliance 冇積極偵查可疑交易，系統亦冇能力自動掃啲第三者存款出嚟，變相倚賴 Operations 人肉偵察，但 Ops 又唔同 Compliance 溝通⋯⋯如此類推。

連帶五宗配售交易出現第三者存款而行方痭仔細了解款項來源，冇調查呢啲交易背後嘅認購人同配售公司嘅關係，以及偵查唔到近 600 單 wash trades ，證監寫咗足足 12 版紙嘅 Statement Of Disciplinary Action ，足夠醫好大家嘅失眠（但係規佬睇完就瞓唔著) 。

整份早餐過你吃？

有冇諗過，點解美國啲經紀行 (Broker ，諧音「卜架」，而家啲報紙同財演興講「券商」) 可以玩零佣金收費？唔係學似香港某啲燒錢嘅卜架咁玩價格戰喎，美利堅嘅卜架可是有錢賺、有利可圖的。

是咁的，美國股票市場除咗有從客戶接單嘅卜架之外，仲有專門喺卜架手上接單嘅 market maker 。係，中文譯作「流通量提供者」，香港用語叫「莊家」。

唔好因為大家睇得多新聞就主觀投射咗「莊家必定邪惡必定係妖魔鬼怪」嘅概念先，莊家作為市場核心嘅內圍一份子，從核心嘅外圍接收卜架嘅落盤，坐咗個盤然後轉身嚟個反手龍蝦伊麵平返倉，其實係有助於收窄買賣差價，對投資者嚟講有著數嘅。

尤其是早前股市大幅波動，市場上買賣差價拉闊，莊家就可以一邊賺多啲，一邊幫買家同賣家各自提供個靚少少嘅個錢。

莊家向經紀行買單，行內叫做 Payment for Order Flow (PFOF) 經紀行唔收客戶佣金，背後透過賣單畀莊家，就已經賺返夠本。標榜令股票及期權買賣「民主化」嘅 Robinhood (係，劫富濟貧羅賓漢) ，第一季透過賣單就賺咗 91 球美金，當中有 39 球收入來自最大莊家 Citadel 。

PFOF 有佢嘅爭議性，因為經紀行可以為咗賺賣單收入，而犧牲客戶利益。邊個擔保莊家真係幫手收窄差價同埋促成交易？監管美國卜架嘅 FINRA ，舊年就曾經罰咗 Robinhood 125 萬美元，懲罰佢哋違反「最佳執行」 (Best Execution) 嘅原則。

乜嘢係 Best Execution ？套用個生活化例子：你老媽子要搵人幫手買餸，你屋企三兄弟，大哥夠快，二個夠細心，細佬又快又細心仲精打細算。咁你老媽子衡量過，認為細佬呢個中介人符合最佳執行嘅條件，就畀晒成張買餸紙細佬幫手張羅，細佬可以收返少少車馬費。

返返嚟卜架嘅例子，由於卜架朋客戶錢財，自然有責任為客戶提供快(成交)靚(價位)正(服務質素)嘅服務，唔可以因為自己背後賺莊家錢而盲目將啲盤隊晒畀最肯出錢嗰個莊，最低限度都要做返 due diligence 同 ongoing monitoring 。係咪面門嘢？ Maybe 。但如果連面嗰浸都唔做，就唔好怪監管機構罰你啦。

FT link:

唔好停。唔好畀佢停。

陷入假數危機嘅德國 FinTech 企業 Wirecard 股價三日內蒸發八成，管理層承認核數師查證唔到嘅 19 億歐元存款，好可能其實並唔存在。

FT 有評論文章，認為 Wirecard 到今時今日先爆大鑊，同德國監管機構 BaFin 嘅包庇有關。

文章引述返 FT 呢幾年 on and off 吹過雞 (whistle-blowing) ，對於 Wirecard 嘅帳目同業務作出過質疑。但係德國當局認定英國傳媒不懷好意、別有用心、指指點點⋯⋯ (下刪三百字)

於是，即使 Wirecard 連喺新加坡嘅辦公室都被監管機構突擊搜查過， BaFin 都係視若無睹，甚至以為外國投資者想藉機沽空 Wirecard 股份牟利，因而禁止 沽空 Wirecard 嘅股份，並且起訴作出負面報道嘅英國記者。

事實證明，紙係包唔住火嘅。當 Wirecard 嘅醜聞越揭越醜陋嘅時候， BaFin 終於承認呢單嘢係一個災難，終於肯面對現實。

但係蒙受損失嘅，由散戶到日本 Softbank 都有，後者喺 FT 舊年對 Wirecard 進行偵查報道之後，仍然對公司投以信用一票，斥資九億歐元買入公司嘅可換股債券。呢條數，我都唔識計。

FT link:

噚日證監重罰國泰君安 25 球，今日又有另一單同反洗錢不力有關嘅個案見街：舊年被罰 15 球嘅國信，時任 Head of Dealing 暨 Director 兼 RO 被釘牌一年。

新聞就好少可講太深入嘅。好事之徒如規佬就會睇返老證份 circular 入面條 link ，成份紀律行動聲明任睇。

今次份嘢得三版紙 (okay 我睇英文就四版啦) ，簡單講都係第九點所講，當事人對於 AML 同 CFT 嘅風險視而不見 (had turned a blind eye) ，違反咗作為經紀行高層嘅責任。

證監會用字又真係好精準嘅，當事人喺公司其他同事向佢反映公司喺反洗錢方面嘅流弊，佢都只係覺得唔關自己事，冇同上級報告。後勤 cc 一堆 third party payment records 畀佢，佢不明所以，淨係諗住 Legal & Compliance 會睇，而其實根本冇人做嘢。

所以話，掛得 RO 牌就要搞清楚自己權責，唔好諗住駝鳥政策，睇唔到、聽唔到，緣份到了，自然就會被阿官問候。

噚日講完美國嗰邊有莊家 (market maker) 專門買其他經紀行嘅客戶交易 (Payment for Order Flow) ，今日就睇到另一篇不盡相同，但係有啲類似嘅新聞。

話說喺香港大展拳腳咗好一段時間嘅富途加入暗盤市場戰團，同輝立及耀才一較高下。咁《蘋果》就引述數據，話富途嘅暗盤價特別靚仔，而富途嘅解釋，就話係客戶 risk appetite 唔同。

Again ，規佬唔係富途肚入面嗰條蟲，佢哋啲客人點玩暗盤，我唔識講。但係值得同大家分享嘅，係暗盤交易市場本身需要攞 SFC 七號牌，系統要經過全面而徹底嘅測試先至可以啟用。其他冇七號牌嘅卜架可以連接暗盤市場，畀客戶將抽到嘅新股喺暗盤賣出，或者畀有錢嘅客戶喺暗盤交易時段高追。

由於暗盤市場唔係正式交易所，參與嘅玩家固然少啲，股份流通同資金流動都冇日頭開市時段咁 liquid 。所以，的而且確係比較容易被少撮人操控嘅。

如果換轉係規佬，就點都會針對啲交易特別進取或者對收市價影響特別顯著嘅客戶了解一下。唔係話佢哋一定有唔妥，但係睇下個 trading pattern 都好。 Compliance 嘅嘢，唔一定有啱同錯，但至少要 seen to be done 。

早兩日講起美國股票市場零佣金嘅卜架越來越多，其中一個叫 Robinhood 。
咁有讀者提起，羅賓漢最近舐咗鑊甘嘅，話佢哋 unlimited leverage 咁借咗七十幾萬美金畀個大學生，結果呢位哥哥仔炒爆煲然後自殺死咗。

我睇返報道，事情應該就唔係咁樣樣嘅。冇錯，係有位 20 歲大學生因為見到佢喺羅賓漢嘅戶口出現負七十幾萬 balance 而以為自己負債累累，因而自尋短見，但其實呢粒數只係暫時性，喺衍生工具 (懷疑係一個 bull put spread) 結算之後就會消失。

重點係， Robinhood 平台犯咗兩個錯誤， which 喺香港嘅經紀行都可能面對嘅。

首先， Robinhood 同其他行一樣，要求用戶先回答問卷，證明對於衍生工具有認識，先至可以涉足 options / futures 等市場。但係 Robinhood 被指介面太過 fancy ，令投資/投機變咗好似打機咁，用戶可能掉以輕心。

其次， Robinhood 好明顯令用戶誤會咗佢輸咗五球港紙。咁理論上佢冇錯嘅， unsettled amount 都係一個數值，有數得計。但係點樣 present 出嚟或者妥善地解釋，就睇版面表達同埋有咩補充資料。

根據最新嘅報道呢， Robinhood 已經承認系統介面嘅不足，嚟緊會喺 options 嘅交收流程、版面設計 (尤其是關於 buying power 嘅說明) 同投資者教育等方面著手，希望避免悲劇重演。

講到尾，要投資，先求知。唔了解一隻產品特色同風險嘅話，就唔好掂。香港嘅 SFC 近期都因為 suitability 嘅問題而罰咗好幾間行，郁啲都幾球港紙。但係 FinTech 、手機 App 嘅嘢，縱使冇銷售成份，由得用戶自決，但係美國呢單 case 亦都值得卜架們好好深知。

詳情可以睇返 Forbes 以下呢篇報道，文章對於 bull put spread 嘅玩法有相當簡而精嘅解說。

Wirecard 篤數醜聞進入第 N 日，日前辭任 CEO 嘅 Markus Braun 被警方拘捕，然後獲准以五球歐羅保釋。

隨住 Markus Braun 淪為過街老鼠 (okay 疑點歸於被告) ，佢老哥之前吹噓嘅嘢仲有幾成真、幾成假，已經十分令人懷疑。

例如話，佢曾經指出 Wirecard 正採用人工智能去審查客戶嘅資料，但係 FT 見過啲文件，話其實 Wirecard 內部都係人手揼 Excel 再將啲嘢炒埋一碟。

究竟呢啲講就誇啦啦，做就丟那媽嘅所謂 FinTech 公司，仲有幾多未穿崩呢？

//

警方正繼續調查公司其他高層，包括剛剛被炒魷嘅 COO Jan Marsalek 。據報佢人在馬尼拉。

德國監管機構已經介入事件，並且對同系嘅 Wirecard Bank 嘅實施資金管制及派員監察銀行高層嘅決策。

另一邊廂，新加坡金管局就下令 Wirecard 將當地客戶嘅資金留返喺新加坡，唔准調動。

FT link:

Wirecard 爆出假數醜聞之後，觸發大家質疑德國監管機構 BaFin 究竟有冇失職。

一方面， BaFin 過往致力維護 Wirecard ，當傳出不利傳聞嘅時候， BaFin 認為係外國投資者想借勢狙擊，因而禁止沽空 Wirecard 股份，繼而向發表相關報道嘅記者提出起訴。

另一方面， BaFin 只規管 Wirecard Bank ，因為佢哋定義 Wirecard 為科技公司，而官僚僵化嘅 BaFin (以及由律師出身組成嘅濕鳩高層) 就認為科技公司，關佢叉事。

再講， BaFin 並無刑事檢控及調查虛假帳目嘅權力。呢方面，香港嘅 SFC 算係比較健全。

當 Wirecard 股價跌咗八成之後，大家亦不禁思考：究竟 BaFin 係保障上市公司，還是投資者嘅利益？

又或者，因為 Wirecard 係德國 FinTech 奇葩，所以得到特別照顧及厚待？

德國經濟部長 Peter Altmaier 已經拍撚晒枱，要求徹查事件，避免動搖外界對德國銀行體系嘅信心。財政部長 Olaf Scholz 亦都話，事件令人極度憂慮，監管成效令人質疑。

下星期三， BaFin 主席 Felix Hufeld 將要到國會作供。祝佢好運。

FT link:

遠在歐洲嘅 BaFin 受累於 Wirecard 醜聞而 under the spotlight ，今日出年報嘅 SFC ，當然就希望 no news is good news 。

睇返全長近 180 頁嘅年報，一半係財務報表，一半係證監嘅報告。咁規管唔識睇數，就淨係短評下證監嗰部份啦。

首先， CEO Ashley Alder 留任至 2023 年，原本上位大熱嘅梁鳳儀任期仲早過佢屆滿。已屆耳順之年嘅珠姐只係較 Ashley 細一年，唔知舖咗好耐嘅坐正之路仲有冇得行落去。

其次，證監提供咗近三年來嘅一啲數據變化。最矚目嘅，應該係三年來，人工開支上升咗 18% 。咁你唔好講咩 compound interest ，亦唔好考慮係咪請多咗好多人 (事實上唔係， keep 住九百幾人) ，每年人均薪酬都應該有 5% 左右嘅增長。呢啲法定機構，薪酬待遇係相當唔錯嘅。

持牌機構多咗，但係截至今年 3 月 31 日嘅持牌代表 (唔計 RO) 人數少咗，尤其是交易所參與者屬下嘅，夾埋少咗三、四百人。點解？應該同疫情有關啦，我估。但係其他行 (主要係九號牌啲基金公司啦) 持牌人數就繼續有增長嘅。 RO 都冇少到，證明⋯⋯肥上瘦下，原是定理。

至於 inspection 方面，維持一年三百零次，但持牌機構已經有三千一百間。究竟江湖傳聞嘅「七年之約」 (最多七年就要例行巡查一次) 仲 hold 唔 hold 呢？我唔清楚～

最後，可圈可點嘅係巡查發現嘅違規個案增長兩成，當中同 AML 有關嘅比舊年多咗 65% ，證明阿官真係好緊張。

放假都唔畀規佬抖下⋯⋯

係，陷入造假帳醜聞嘅德國 FinTech 企業 Wirecard 宣布破產，係德國 DAX 指數 32 年來首家破產嘅成份股。

集團旗下嘅 Wirebank 前途未卜，監管當局已經派員進駐並且凍結銀行嘅資產。 Wirecard 話仲研究緊啲子公司使唔使破埋一份。

Wirecard 倒下嘅連續劇都做咗接近一個星期，由 19 億歐羅嘅存款據報不翼而飛，到被揭發係子虛烏有，公司 130 億歐羅嘅市值喺一星期內唔見咗九成。

Wirecard 爭落 20 億歐羅銀行貸款傾唔掂數，債主除咗歐美嘅銀行之外，仲包括中國銀行同農行。

KPMG 今年四月對 Wirecard 進行嘅調查發現，集團 2018 年公布嘅 20 億歐羅收入裡面，有一半係編造出嚟嘅 (fabricated 呢個英文字真係幾好用) ，至於其他業務呢，其實就應該係蝕錢嘅。

FT link:

一不做，二不休，一於講埋 overnight 一單幾爆嘅 FinTech 新聞： WhatsApp 喺巴西提供支付服務僅僅一個星期就被巴士當局叫停。

唔講唔知，原來巴西係 WhatsApp 第二大市場，有 1.2 億用戶。 WhatsApp 原本想畀用戶將信用卡或扣帳卡 (Debit Card) 掛落 WhatsApp account 度，咁用戶 send 個 message 就畀到錢喇。

巴西當局話， Visa 同 Master 都暫時唔准幫 WhatsApp 處理錢銀過數嘅交易住，直至調查完畢再另行同知。 Cielo 亦都被指違反競爭法而被禁止同 WhatsApp 合作。

WhatsApp 對於巴西當局出手表示詫異，又質疑當局係咪驚 WhatsApp 飲咗頭啖湯，影響到巴西央行自家開發嘅 PIX 支付系統。

呢次都唔係 WhatsApp 第一次搞 FinTech 而碰釘。佢哋喺印度想搞手機支付，一樣烘咗兩年都未過到監管機構嗰關。相比之下， WeChat Pay 同 AliPay 喺香港嘅發展算相當之順利。

FT link: