懷古念七字！

在blog上看到一篇報導文章，勾起童年回憶！寫作的背景是家鄉舊居的一個點，由這個點延伸及線，最後擴散出一個面。

埔里 茄苳腳 李家古厝 (毓蘭堂)

懷古念七字！

茄冬腳邊溪水往 土地公前樹王公 （埔里茄冬王公） 演習林內童年夢 上屆氣派毓蘭堂

義薄雲天天水嬸 番漢糾紛雙頭擒 大愛無私孫致蔭 族群和諧萬代吟

珠仔山頂阿祖地 清明掃墓就過溪 電力公司佇尾底 欲看電影叫齊齊

釣魚泅水藏水沬 七門閘水是泳池 溪溝田園無邊比 擗鳥水蛙激皮皮

南光國校講國語 下課都來趨滑梯 中晝食飯布袋戲 大大小小排路隊

公所舊址轉菜市 惡兵遊魂哭啼啼 防空壕底辦公夥 墓牌堆上爬牆圍

木裁囥佇相隔壁 食飽相招覕來遐 外口柴箍好軁射 一報二報拼性命

上驚注射衛生所 牙根咬絚目屎滴 磅空軁過南天院（南天戲院） 囡仔做賊看免錢

第一趁錢賣冰枝 阿兄奢颺騎噗機 小妹大箍惡更痴 有人吊頷人驚死 咒誓生理無了時

埔里街頭舊菜市 暗時宵夜切仔麵 外公因兜真次序 椪柑排甲滿滿是

高樂戲院上早死 天一鋼筆翕相機（天一戲院） 能高綠都徛對面（能高戲院，綠都戲院） 華國隔壁時錶親（華國戲院）

孔子宮內關帝君 文武合一真齊勻 外媽誦經來痛疼 查囝外孫一家全

東門二姑嫁阿舍 楊桃芭樂厝後壁 飛來飛去膨鼠姊 爬上爬落猴山兄

斜對面就車頭邊 舅公因兜對遮去 北門圓環外科院 盲腸發炎就揣伊 正爿斡過幼稚園 放學轉來揣家己

西門城隍上恐怖 十八地獄幽靈都 七爺八爺面艱苦 作孽善惡生死簿

過年行春醒靈寺 愛蘭橋下好釣魚 崎下阿公佇陷眠 逐年攏愛刜草枝

無煩無惱無主意 上屆快樂囡仔時 半冥眠夢在哪裡 滄海桑田人稀微