敢干焦「年紀」爾爾？

一、少年的助人工作者

昨暗，我看我有訂閱的一个心理師，去年寫的，伊出版的書的紹介，講著伊2019年碩士論文寫煞，2020年佮出版社講好這本冊，2021年寫完，伊28歲，因為疫情，2023年才出版。

算起來，伊今年31歲，遐少年！我前一站仔揣伊諮商，講十多擺，予我誠大的幫助。雖然諮商師這途誠食經驗、年資，毋過嘛毋按定，看人，逐个攏無仝款。人講看病的醫生，會曉看佮袂曉看的差真濟；教書的老師嘛仝款，會曉教佮袂曉教的差真濟。

我想著，幾若年前，我佇PTT看著一篇貼文，文章後面有寫伊會曉啥物，有「催眠師」，我約伊做催眠。頭一擺去，是一間佮美容師同齊用的工作室，我問開始偌久？聽起來拄拄開，伊人嘛誠少年，我袂因為伊是少年人，閣新手，認為伊的能力是按怎？

第２擺去，催眠了後，閣做掠龍。後來因為疫情，改做視訊，閣做一、二擺，予我的幫助真濟。

想著我佮遮仔人「同齊做代誌」，因為毋管是諮商，抑是催眠，毋是去聽伊講啥，教我啥物，我嘛愛做功課，愛出力，效果才會有。我毋是「學生」，嘛毋是「消費者」，是「伙伴」，所以講是２个人「合作」，有人會講是咱「共同工作」、「一起工作」。

以諮商來講，是因為愛去講，我家己會準備我這禮拜欲講啥？去諮商所遐坐落來，對伊一直講，是我家己咧整理，按呢就會想透問題的所在，紲落來欲按怎做？嘛會自然流出來。

催眠嘛是，催眠師予我的功課、建議我有做，有一項我家己想出來，會使調整按怎做的方法，繼續做一年，共一項問題變做較輕較少，是誠大的收成。

二、「我會使做伊的老母矣！」

我拄好拄著遮仔少年人做遮仔代誌，耳空邊霆起來往過有查某人講的話：「我會使做伊的老母矣！」奇怪，啥人欲予你做伊的老母！遐愛做人的老母，干焦看年紀就用這个比喻，是誠好笑的代誌。這馬有人閣會按呢講無？我毋知。

查某人（查埔人）進前較懸的身分干焦有一種：老母，大家，抑是阿媽，無其他的身分佮職務，干焦會曉用用老母、阿媽、、老爸、阿公來做比喻。

彼个心理師比我第３个囡仔閣較少年，我嘛毋按呢想，我看著的是伊的專業。

三、年紀差不多，想法就仝款？

幾若年前，我佇社區大學上課。有一擺下課歇睏的時，逐家講著這馬的高中生的一件代誌，咧高中教書的同學講伊毋知影，我講：「我都知道，你在高中教書你不知道？」伊講：「我只管他們的功課。」

無偌久了後，伊咧讀高中的查某囝交男朋友，伊一直揣人講這件代誌。我看伊佮幾若个同學講煞，行來我的面頭前，目睭從我的頭殼頂看到跤底，用手比我佮你２个，講：「我們的年紀差不多，想法一樣。」

我馬上應伊：「我和妳的想法不一樣。」伊行離開去，無佮我講。我才貧惰聽伊講矣！

伊對伊的高中學生，干焦管in的功課，其他的啥物攏毋知，這馬伊家己的查某囝交男朋友，伊應該嘛啥物攏毋知，才趕緊欲揣人講，袂赴矣啦！看我的年紀佮伊差不多，想講我的想法佮伊仝款，這款講法我是欲笑，抑是欲哭？

（2024.10.15.）