我的大漢小弟的厝內面，有幾若年的時間，一直有代誌，伊用各種的方法，查資料，問人，包括問鬼神。有一擺阮老母敲電話來予我，講：「伊講伊欲去問啥物人，我敲電話問伊問好未？伊講：『猶未，等我洗碗洗好才來問。』伊遐爾阿婆仔性……」
老母講家己的後生「阿婆仔性」，我毋知影欲按怎應？干焦聽伊講爾爾。查埔人洗碗就是「阿婆仔性」，意思是洗碗是查某人的代誌？
我有同學講，伊佮大家蹛做伙，伊有３个囡仔，嘛咧上班，伊講：「我婆婆不准我先生做家事，所以他不能幫忙做家事。」啥物？欲佮這个人同齊做伙一世人？查埔人做厝內面的工課就失去查埔人的威嚴，變做查某人囉？敢有遐嚴重？
