我昨昏下晡３點左右，佇跑馬古道產業道路，咧欲到入口的所在，看著正手爿的護牆頂懸坐幾若隻猴山仔（猴子），有七、八隻，大細隻攏有，誠古錐，有一隻予猴抱著，逐家攏會臆是伊的老母抱著伊。
我頭一擺佇遮看著猴山仔，進頭捌佇行較內底的路邊看著。我行佇路的倒手爿，想欲提手機仔出來翕相，毋過看in看我的目睭，敢若知影我的舉動，我驚in會對我走過來，攻擊我，我毋敢振動，用原本的速度行過去。
頭殼頂有細粒石頭仔落落來，我想講落雨了後，山土較鬆，石頭落落來，閣有一粒落落來，奇怪，無像石頭家己落落來的情形，我攑頭看頂懸的樹仔頂，無看著猴山仔。我想欲趕緊行過去，跤步毋敢停落來。等我行過了後，越頭看後壁，彼陣猴山仔跳落來路面，走去對面，就是頭拄仔石頭仔落落來的山頂，我臆，石頭仔是猴山仔擲落來的。
（2024.10.6.寫。風颱了後的第２工去行）
