反送中運動已上升至對政府、香港警隊、中共政權的全面開戰，日子越久和理非和勇武各自來到了樽頸位置，勇武被黑警卧底滲透，前線淪為捉鬼遊戲，網上有不少圖片指出射丫叉的是警方卧底，袋住螢光棒，但大家記得當日見到抗爭升級後的反應嗎？是雀躍、是稱讚、是體諒，某稱度上依班「卧底示威者」帶領過大家衝破心理枷鎖，將整個行動升級，可惜政府一個部署又帶返大家墮入捉鬼遊戲，紛紛將前線做法推向警方。
和理非既遊行被政府漠視，一度轉向支援勇武，大大力做文宣，當最近勇武受挫，大家發表出「機場係和理非橋頭堡」既講法，令大家覺得搞好機場就一定掂，當有人既行動不合期望，就開始出現「有鬼」、「搞散運動」、「中計」既講法，但當你面對既極權會派卧底、使用不成正比既非法武力、同黑社會合作、有解放軍公安配合，前線手足拋頭顱灑熱血，跟失控怪物作戰，後援朋友卻不斷增加道德枷鎖、行動規範於抗爭者身上，樂於散播失敗譴責中計言論，成為解散軍既一員，是大家都需要反思。
當你想譴責前線衝動既時候，不妨睇返有抗爭者俾人打到頭破血流、永久失明、門牙甩左沉在血泊之中既片段；當你想指罵和理非既時候，不妨又睇睇過去制作既文宣圖片影片，包容是需要是必要的，但不是對軍政府，而是對同路人。
有朋友說為什麼香港人咁慘，但大家諗清楚，香港人好慘咩？我地無付出代價就享受了數十年既自由、經濟成果，人地韓國也好、台灣都好為左爭取自由民主犧牲左幾多人命坐左幾多政治獄，我地係跳左步，世上有幾多人仲爭取緊而被屠殺⋯⋯
除非大家想專心返去搞區選，覺得選舉可以改變現況，否則沒有割蓆分化的理由；除非你覺得對得住殉道、被捕、被打既手足，否則沒有散水的藉口！
如果唔係既話，請克服恐懼，一日未達到五大訴求，就一日仍然街頭見。
