牛椆庄ê阿雪佇樹頭伯公hia吊脰死了後，個外月來，人人攏teh喊講逐工暝時，彼个時間，會有查某人走去彼欉松仔跤，kā家己吊起--lih，跤硬死踢，無偌久著雙跤直直直，tiàm hia tòng-tòng幌。遠遠看，袂輸樹椏頂phoa̍h一領白大蟒，風來，koh會iⁿ-oaiⁿ iⁿ-oaiⁿ kho̍k-kho̍k踅。幾若ê人半暝má-se了，對hia過，眼--著，驚kah滲尿。
「日時，hit-tah啥物都無！M̄-koh hit工盈暗，我是親目睭看--著-neh！」
武雄咒誓講阿雪變做鬼！
「敢有影？我看，是你啉siuⁿ茫--o͘h？」，人án-ne kā笑。
「無嘐潲--lah！閬日阿猴mā有看著！」「阿猴？」
「著著著！我mā有看過阿雪ê神魂佇hia，koh聽著伊teh háu。阮阿爸講彼款有冤情ê人，會死袂soah，尤其彼款自殺--ê...」
「阿雪在生是有啥物冤屈？」
武雄kap阿猴lóng搖頭講in毋知。
牛椆庄頭尾都無一个知阿雪到底是為乜死，m̄-koh驚--人ê鬼仔代通人知，連tòa佇隔壁庄ê江南仙也聽著人teh會！
江南仙是日本留學轉來ê醫學博士，伊當然毋信有chit號鬼仔代。聽逐家嘩嘩滾teh會，soah決心來面會chit-ê「鬼」。
隔轉工，江南仙來kā逐家講：「ná有啥物鬼？我châng半暝去hia一下看，樹椏頂懸都一塊破布，風吹伊著幌。」
伊ná講，手著扲一塊布出--來，「都che m̄。Hia-ê 人食酒食kah目睭花花，毋才會看chhoa̍h--去。」
這件江南仙認為ê迷信代原本著按呢soah鼓，2 庄ê人無人koh teh講chit號鬼仔古，武雄kap阿猴mā變做笑詼teh hông損。想袂到，kúi禮拜後，江南仙soah開始發燒兼畏寒 - 講是著Ma-lá-lí-á，武雄kap阿猴聽著這个消息，暢一下，「Soah毋知he是查某鬼綴轉去in兜teh kā纓纏！」
江南仙是醫生，家己開藥仔食，毋過猶原是規身軀艱苦，倒tī眠床頂哼哼呻，時常燒kah毋知人--去。
雄雄有人kā伊對陷眠內底搖精神，伊目睭peh金，iáu看袂清楚對方是啥物人，人著kā伊拖落眠床，歹聲嗽hiàm伊換衫穿鞋。
發燒到一个坎站，伊感覺四周圍花sà-sà。後來，伊頭殼眩眩，hō͘人拖teh lōng。聽著ná像放炮仔ê聲，身軀有淡薄仔疼，伊著koh陷眠--去-ah。
雄雄有人kā江南仙對陷眠內底搖精神，伊目睭peh金...
雄雄有人kā江南仙對陷眠內底搖精神，伊目睭peh金...
雄雄有人kā江南仙對陷眠內底搖精神，伊目睭peh金...
「Thài 會án-ne生？」
江南仙hông拖teh lōng。Chhoàn有phi-li-pha-la ê炮仔聲，chhoàn感覺身軀幾若个所在hō͘鑽仔鑽--過，真疼，koh陷眠--去，毋知人--ah。
雄雄有人kā江南仙對陷眠內底搖精神，伊目睭peh金...
「Thài 又閣是án-ne生？」
江南仙拍拚hō͘家己興奮起--來，認真看，有一寡提銃，歹沖沖ê人，kā伊硬插硬拖，giú出家門，sak伊去一台車仔頂。
無偌久，炮仔聲，陷眠。
雄雄有人kā江南仙對陷眠內底搖精神，伊目睭peh金...
發燒雖然真傷重，chit擺，江南仙賭硬氣m̄願koh陷眠，伊一定beh知影發生啥物代誌。
Tī聽著炮仔聲ê時陣，伊看著幾若枝銃，烏lang-lang sih火金星，銃子thàng過身軀，真疼。
「Ah！是án-chóaⁿ beh槍殺我？是án-chóaⁿ？我毋甘願...」
陷眠。目睭金金。
雄雄有人kā江南仙對陷眠內底搖精神...
施江南，醫學博士，228受難者。
伊ê死，通人知；伊ê冤屈沉落海。
