他家的二二八

真濟冬以前，我有完成一篇散文叫做"我家的二二八"。嚴格來講，chit篇文章tī完成進前tō已經經過beh 10 冬，我ùi散掖tī序大人驚惶上深ê記池內底，沓沓仔hô͘出一角koh一角，猶澹澹、黏黏、濕濕，毋成ê形體，毋甘來組合；了後我koh用小說ê方式，再現我ê舅公，阿公佮阿媽。小說是虛，人生是真，這是gún兜ê 228。

X 讀著我ê物件了後，寫批來kā我罵：你烏白講，三塊厝，中街仔，hia我真熟，哪有你講‑‑ê彼款代誌？

我lóng無kā伊應。畢竟，chit-má chit ê 時代，開時間tī網路頂懸佮人冤家是加了工。

舊年尾，X koh寫批來‑‑ah。這擺伊講，伊beh離開台灣‑‑ah，毋過，in兜ê 228 ài藉我ê筆來講。伊講，這凡勢是無人愛信ê鬼仔古。

為著保留完整性，伊ê台文寫了無蓋順，我小kā伊修削‑‑一下（毋過盡量保留伊原底ê氣口），地名佮人名為著隱私mā kā伊掩歁，其餘照實，刊tī下跤：

「邱‑‑sèⁿ你好：

真歹勢，進前有寫批kā你烏白罵。彼陣我猶少年，真濟代誌毋知，我chit-má研究所畢業，真緊beh出國讀冊，離開台灣，以後lóng無beh koh轉來。Chit幾冬我知影ê代誌，對我有影衝擊大，你ê讀者khah濟，我寄chit張批予你，藉你來kā代誌公開。

是án-ne，阮家族仔真好額。我自細漢啥物lóng免煩惱，耍佮讀冊tō好。細漢時陣，美國31冰淇淋拄入來台灣ê時，我想beh食就有，阮兜邊仔，足有名、足貴ê冰店，我mā是像行灶跤仝款。礤冰是啥物滋味，我到讀大學，同學招去食khah知。老實講，到今我心內mā是有烏影，感覺彼無衛生，可能台灣人lóng án-ne。我佮人無仝款，細漢時我著知。

一直teh講食‑‑ê，真無聊， 正經‑‑ê lóng 猶袂寫‑‑著。

是án-ne，因為lóng免煩惱其他代誌，我大學mā是輕可考牢。Beh去讀大學著ài離開gún兜。大學，著，我ê大學生活。我佮別人無仝，我知影我佮in無仝款，人一年仔lóng蹛宿舍，gún兜買一間厝予我，我蹛hia，足爽，毋過蹛一冬niâ。是講，大學一年仔mā是有寡團體活動閃袂過。我袂記得交代我是去讀啥物貨？我都講過我lóng毋免煩惱生活，所以我去讀一个畢業揣無頭路會枵死ê藝術系，我想講逐工畫圖，koh會使看查某無穿衫，讀四冬輕可過，足爽。Ah！Koh袂記得講，爽爽仔蹛一冬ê所在mā是我ê工作室。

大學一年仔必修一門，啥物認捌○○ ê課，講是啥物認捌在地文史一定ài，聽講幾若間大學lóng有án-ne ê課。拜五下晡，有一擺，佮一陣規大陣來自無仝系，亦有臭味，亦有酸味ê台灣人做伙去一个叫做『××橋』ê所在。其他代誌我lóng袂記得‑‑ah，彼ê芳芳ê查某囡仔氣質無仝，我永遠會記得。哪會使放袂記？我chit-má會出國讀冊，永遠無beh koh轉來台灣mā是伊予我ê教示。我ê人生因為伊轉變neh！

Ùi『××橋』轉來以後，我逐暝都睏袂好。半暝喘氣喘袂過，目睭扒開，四肢袂振動，眼前敢若有人teh kā我相。你臆了無毋著，彼台灣人講‑‑ê：予鬼硩。我鐵齒，才無teh信這。但是半個月lóng án-ne，舞kah我連圖都畫袂好，心情鬱卒。最後我去揣學校ê健康中心，聽講心理輔導真有效。

我去○○樓，健康中心頭前ê走廊拄著彼个芳芳ê氣質仙女。我問伊beh去佗位，伊笑笑無應。我kā伊講我來健康中心，因為ùi『××橋』轉來一直無法度睏，半暝有人來kā我亂án-ne。伊聽了，kā我相‑‑一下，kā我講心理諮商無效‑‑lah，koh講檢采我需要koh轉去『××橋』遐。我聽了奇怪，規氣kā截‑‑leh毋予伊離開，講beh請伊食晝，beh聽伊kā話講予清楚。

原來伊是歷史系ê學生。我hòⁿ，『××橋』ê歷史啥物，轉來就lóng袂記得了了，橫直毋是我ê代誌。結果芳‑‑ê，彼个氣質仙女，正名是★★★，逐項伊lóng知，逐項都了解，毋過我到今mā是干焦會記得伊講：遐tī 228發生ê時，有袂少死人予人ùi橋頂擲‑‑落去。伊講應該是有『人』綴我轉‑‑來，所以ài koh去遐佮『伊』講清楚。我是鐵齒ê人，汰可能相信這？毋過，佮hiah媠hiah有氣質ê姑娘食飯袂䆀，我當做約會聽講古。

後來我才知，芳‑‑ê彼霎mā是beh去健康中心做心理諮商。

Koh經過一月日，我猶原無法度睏。Chit-má眼前ê面模仔變kah清楚‑‑起來，蓋成是30外歲ê查埔人面，我mā開始聽會著伊teh講話ê款式，耳空oⁿ-oⁿ吼，日‑‑時mā án-ne。實在是擋袂牢，心內koh驚惶，我去揣芳‑‑ê，央伊佮我做伙來去『××橋』。伊講伊無愛，伊講伊彼工轉來mā睏袂好，我講伊mā是hông綴，ài來去會，伊講毋是án-ne。到上尾，我講，我足驚，陪我去，好‑‑無？我chit世人第一擺落軟，tī我佮意ê查某囡仔面頭前。

最後，伊陪我去『××橋』。半暝，耳空邊ê聲音真明，目睭扒開，彼个面容mā有夠清楚。我kā伊問，為啥物是我？

伊開喙講：『恁阿公叫人kā我縛‑‑leh，身軀殘5 6 空，活活掔落橋跤，水有偌冷你敢知？』

雖然伊án-ne講，我mā是koh kā伊問，為啥物是我？是gún阿公佮你有冤仇，關我啥值代？

Gún阿公是🁡🁠🁑，你一定聽過伊ê名，八年抗戰ê勇士。Gún兜hiah好額，佮台灣人無仝，mā是án-ne來‑‑ê。到今，我知影家己負罪，毋過我猶是相信gún阿公無毋著。阿公上疼我，阿公是好人。

橋跤彼ê「伊」，離開‑‑ah。隔工，我睏kah倚晝，課無去上，毋過約會khah要緊，中晝緊走去約好ê高級餐廳。芳‑‑ê先到。

我kā伊講我會得睏去‑‑lah，伊soah講伊koh睏袂去‑‑ah。我趕緊問伊到底是按怎？

芳‑‑ê才kā我講in家族tī 228 ê遭遇；in阿媽ê兄弟去予人擲落去『××橋』跤。

伊講：小學ê時，有一工，陳水扁tī電視新聞出現，kā 228紀念碑開幕，無偌久，碑文去予人敲掉，in阿媽看著這新聞soah流目屎。芳‑‑ê講：彼ê無緣ê舅公沈落水ê時才 10 thóng歲。芳‑‑ê koh講，原本伊足愛食海產，知影chia ê代誌以後就無法度koh食魚仔…。

雄雄，彼時，我感覺tī這間海產上出名ê餐廳約會是真大ê錯誤。我ê面紅kah。

2 年仔ê時我mā轉系過去歷史系，佮芳‑‑ê做伙。開始了解台灣人佮台灣。

我知影我佮台灣人無仝款，毋過為著芳‑‑ê，為著清楚我teh踳踏ê土地，為著真濟予我滿腹憤火ê為啥物，我開始學台灣話，我佮家族變面。

『Lán ê歷史是果汁機，血肉絞做伙，恁是予機器起磅koh啉落彼甌鮮甜血肉ê人。』我佮芳‑‑ê ê最後一工，伊講ê最後一句話是án-ne。我完全同意。

但是我必需相信gún阿公in無做毋著代誌。我需要相信‑‑ê佮我知影ê歷史， 予我痛苦kah beh起痟，chhé-chhé‑‑leh khah規氣。離開芳‑‑ê，提我家己拍拚趁‑‑ê，離開台灣。

我袂koh轉來‑‑lah。所以寫批予你，希望你替我公開chia‑‑ê。向望台灣人毋通原諒阮。

柷 平安 ℵℵℵ敬上

」

批ê內容就是án-ne。

總算有人願意講出聲；著算伊毋是當初時動手ê人，伊mā無代替in阿公kā台灣人會失禮，毋過伊ê自白予lán知影，228，毋是台灣人家己跋倒撮傷，是有人kā lán捒落山崁，害lán骿仔骨斷幾若枝，空喙ê庀仔到今koh有血水teh滲。

Lán已經有記錄、調查真濟受害者後代、遺族，毋過一直揣無加害者。Chit封批，拍算是一粒良心？

希望會使有koh khah濟ê加害者勇敢講出恁ê 228。