當首爾仍是叫漢城的那些年（拾）

對於香港人嚟講，一個日本，一個韓國，去到一個點，個個都係旅遊專家，甚麼新村梨大盆唐（一山都有人當熱點先叫折墮），個個都有一兩個懶另類嘅旅遊點。再加上嗰鋪「你話 A 好，佢話 A out 咗喇，我去 B 仲正呀」嘅包拗頸性格，我實在冇必要喺度講甚麼韓國旅遊熱點打卡地圖之類嘅垃圾。

對於我自己，兩年幾三年嘅漢城生活，解決衣食問題嘅地方，一定係東大門。係呀，係咁行貨㗎！行街食飯打機扑嘢夠行貨咯，咪做吖笨！

去玩，你可以越 fancy 越多花臣越好，但係講到同生活相關，方便先係最大著眼點；兩門完全唔同嘅哲學。

我鍾意東大門嘅原因，係佢乜都有，你諗到以至諗唔到嘅佢都有。例如：二手市場、寵物市場（我知賣寵物唔人道，我講緊廿年前嘅事）、濕貨市場（新堂洞嗰邊何止濕貨，連狗肉市場都有）。喺 Doota（Doosan Tower）嘅地庫第一層，當年係一個好似百利/利時/金百利咁嘅地方，有好多年輕嘅時裝設計師，或者走水貨精品（水貨，唔係假貨）嘅年青人會喺嗰度開啲好有特色嘅 boutique 賣嘢，仲通常開到凌晨三四點。瞓唔著的話，東大門係個打發時間嘅好地方。

但係以上一切都唔係我當日喺東大門盪咗足足三粒鐘嘅原因。

我為咗希望撞返一個我只有一面之緣嘅女仔，我喺東大門戇鳩鳩咁盪咗三粒鐘。而我對呢個女仔，除咗外表同撞人好痛之外，其餘一無所知。但係我為咗佢，竟然喺度行來行去，希望有緣再見。

人都係犯賤嘅動物。

結果當然係撞唔到啦，真係咁多童話故事咩。漢城大大話話成千萬人口，咁撞法同買六合彩冇咩分別。

晚飯後，又係 ICQ 調情時間。我諗我真係幾冇心機吓，連隔住個 mon 嘅 Colette 都感覺得到。佢以為我係因為搞唔到簽證而唔開心，仲𠱁咗我一陣。鬼妹嚟講，佢算係好 sweet 嘅一個。

而我就一邊個心諗住第二個，一邊同個 past continuous tense 嘅女朋友喺 ICQ 打情罵俏；我咁樣算唔算一腳踏兩船？

如果唔算，點解我會有啲內疚嘅感覺？

如果算，我個問題係，上述兩個女人，一個儘管口是心非，但確實地、經常地提醒我「我哋已經分咗手」；另外一個我連佢叫乜名都未知。我呢啲最多算係水上飄，連船都冇隻又點一腳踏兩船呀？

呢個時候，我最希望嘅，就係 Colette 能夠喺我身邊，咁樣我嘅思緒唔會咁凌亂；應該係話，有佢喺度，我唔會有時間去亂諗嘢。講到尾，我哋 physically 分開都只不過係個零月，冇咗一個六年嘅生活 partner 喺身邊，我真係好唔慣。

嗰晚，我同 Colette 結果傾到凌晨三點，其間我一邊食杯麵佢一邊食 pizza，佢話都算係 date night。

星期六，約咗 Ricky 同 George 晨早打籃球。漢城夏天早上嘅氣溫升得好快，未夠九點我就已經感受到一股熾熱嘅氣息。唔夠瞓再加上熱，我根本完全不在狀態（賴得就賴啦你），打到十一點左右，我就已經又冇心機又冇氣，於是提早退場。

為咗填補冇 Colette 喺身邊嘅心靈空虛，我自己一個人走咗去 Pizza Hut 自隊咗個大嘅 Hawaiian 厚批。

飯後，飽到捧住個肚返咗學校，為下星期嘅堂備吓課。我唔係一個入到課室就可以自由發揮嘅教師，我一定要備課先唔會口窒窒。返到教員室，我見到我檯面有封信。

邊個會寄信俾我呢？

我一睇，回郵地址係馬利蘭州我自己屋企，封信係 Colette 個幾星期前寄俾我嘅。

我拆開嚟睇，係張有兩隻 Forever Friends 啤啤熊喺面嘅卡，卡裡面除咗上下款之外，佢就只寫咗一句：

下款係一個唇印同 initial。唔記得講，Mademoiselle Colette 係半個法國妹，法國出世，3 歲先移居美國。

無論我同 Colette 嘅關係，係情侶定朋友，有佢喺我身邊，除咗係緣份之外，仲係種福份。

（待續）