有啲童話真係幾適合當犯罪小說睇。《魔笛：童話推理事件簿》

《魔笛：童話推理事件簿》收錄咗三個家傳戶曉嘅童話故事嘅改編版本，《傑克魔豆殺人事件》與《藍鬍子的密室》其實係作者陳浩基將以前寫落嘅舊作增補，而放喺最後亦係篇幅最長嘅《哈梅林魔笛兒童誘拐事件》就係新寫嘅故事。我明白有唔少讀者係從《13·67》或《遺忘·刑警》認識陳浩基，呢兩本都係用推理小說裏面常見嘅警探尋兇做框架，所以佢哋唔係好睇得慣陳寫呢種童話故事改編，但我個人係幾鍾意呢本《魔笛》嘅。另外如果睇埋陳嘅短篇小說合集《第歐根尼變奏曲》，就會睇到佢其實都嘗試過多種唔同既推理/科幻/奇幻小說寫法。

改編童話故事其實都唔係罕見嘅創作形式，連荷里活拍戲都會咁玩。究其原因係流傳到今日既童話故事往往都好短，又因為好多時都被編寫成兒童故事出版，有啲甚至濃縮到幾百字就可以講完，變相騰出大量空間畀創作人腦內補完，加啲副線劇情又得，幫啲角色之間增加啲恩怨愛恨又得。

喺呢本書裏面，陳浩基就塑造咗鍾意四圍遊歷寫作嘅主角同佢武功高強嘅侍從，用佢哋帶領讀者走訪三個唔同嘅歐洲地方，捲入與童話故事情節相仿嘅謎團，然後喺每個故事嘅結尾揭露種種撲朔迷離事件嘅真相。陳浩基筆下嘅故事情節當然有質素保證，並不時出現唔知同謎底有無關係嘅線索，會誘發讀者一路猜測一路追睇。特別要強調陳寫作《哈梅林魔笛兒童誘拐事件》時，係真係走咗去德國嘅哈梅林考察咗當地嘅地貎，再呈現喺故事當中，令小說嘅環境描述盡可能貼近真實，非常認真，呢部份所用嘅功夫都喺本書後記特別記錄咗。喺樓上書店付出唔使一百蚊就睇到呢幾個高質素嘅故事，個人覺得真係好抵睇。

順帶一提，原版《傑克與魔豆》故事裏面，傑克闖入巨人屋企偷走巨人嘅寶物幫自己屋企致富，而且食髓知味，偷完一次又一次，後來事敗畀巨人追就斬斷登天藤蔓跌死巨人，呢個傑克根本就係不折不扣嘅謀財害命之徒嘛！雖然聽講巨人會食小朋友，但話傑克為民除害就抬舉咗佢，因為佢本來只係一心偷取巨人財物，無諗住對所謂食小朋友嘅巨人做啲乜嘢，最後只係畀巨人發現並追趕先逼不得已斬藤（否則往後見手緊仲可以爬上巨人屋企偷多幾轉）。傑克同巨人兩個都唔算係咩好人，咁點解呢個故事會收錄喺多個現代出版嘅兒童故事叢書裏面？二百幾年前初版推出嗰時，社會道德觀同今日社會爭咁遠，就姑且不論，但究竟而家出版呢個故事嘅大人想透過呢個故事向小朋友傳達啲咩思想呢？真係令我疑惑不已。

突然諗到，好多童話故事，尤其是惡名昭彰嘅格林童話（《藍鬍子》同《花衣魔笛手》亦曾收錄在內），事實上係充斥咗好多以今日標準會視為犯罪嘅內容。既然係咁，將童話改編成犯罪小說、推理小說，的確幾順理成章嘅。

作者：陳浩基
出版：皇冠出版（香港）
出版日期：2020年8月
購自：旺角樂文書店
電子書：讀墨、Kobo、Bookwalker