孤盲?高毛?

１．「孤盲」罵人過分、賤、壞、無好死；毋過成時係帶有阿惱noˋ人”慶”个意思。有「還孤盲」「當孤盲」「恁孤盲」….

「還孤盲」....

*實在還孤盲，喊佢來做事，貼貼到臨晝正到來！

*這兜山猴仔！牛眼拗下來，又無拿來食，擲到滿地泥，還孤盲！

*還孤盲！逐日換恁多衫，洗毋得忒（徹底的徹）。

*還孤盲噢！該事頭別人愛兩日添來做，佢一日就做煞！

「當孤盲」....

*阿綢伯姆討着个心臼(新婦），會”撚人个喉嗹”(擎飯匙堵貓)，當孤盲。

「恁孤盲」....

*這細鬼仔恁孤盲！吂好食个柑仔，也摎人摘摘下來，愛投厥爸，無投厥爸仰做得？

２．……「到孤盲」----倒裝用法，意思係「非常」……

*認真到孤盲、刀仔鈍到孤盲、菜淡到孤盲、驚到孤盲、冷到孤盲、硬殼到孤盲、癢到孤盲

３．「死孤盲」----「該死」咧

*今就死孤盲哩！車仔壞在這大山頂，仰結煞正好！

*這死孤盲！長透欺負人，毋使插漦佢！

*有錢親阿哥，無錢死孤盲。

４．「孤盲頭」「孤盲子」「孤盲嫲」「孤盲猴」「孤盲狗」----罵人當頑皮、當賤、當壞

*這孤盲頭，專門在暗晡頭，蛇聲鬼叫來嚇大嚇細。

*喊佢轉來！這孤盲頭，無打屎朏還做得係無？

*這孤盲頭！你愛賺皮痛係無？也敢去偷人个東西，暗晡夜你就該絕。

*孤盲子正好！自家發閼去撞壁毋就好哩，一桌个飯菜摎人覂淨淨。（覂，乏竭也）

*這孤盲子欠推。擳佢！毋使摎佢細義。

*毋好分該孤盲嫲知，係講分佢知着，惹起來就無結煞哦！

５．「孤盲絕代」----罵人夭壽絕、短命絕、絕子絕孫----當沉毒个罵法

*這孤盲絕代个！餔娘子女也敢拂(fidˋ)拂忒，走去同福佬嫲。(甩掉）

*這孤盲絕代！無漦用！打死並棍拂忒佢。

*該孤盲絕代！無麼个原由就摎人揕(zemˊ)到血流血濯(cod)，這無好好來教示仰做得？