老師都係學生，學生都係老師——《孤島教室》
首先恭喜柏菲思憑《孤島教室》奪得香港閱讀城第18屆「十本好讀」嘅中學生最愛書籍名單第4位。呢次係我第一次拜讀呢位年輕香港作家嘅作品，佢之前嘅幾本著作都係犯罪小說、推理小說，亦曾經獲頒「金車．島田莊司推理小說獎」特優獎，呢一本筆鋒一轉，寫嘅係一對早有齟齬嘅師生因船難流落荒島嘅故事 。故事情節唔複雜，集中圍繞住兩人落難前與後嘅互動，節奏都好暢順明快，所以呢本書順理成章咁被分類為「校園輕小說」。
大專及成人學校嘅學生都已經係成年人，所以相對嚟講老師嘅責任就輕好多，只須要專心教好啲書。反觀中小學幼稚園老師嘅職業性質，係必須長時間照料一班尚未成熟又未有自主能力嘅未成年人，老師嘅作為及不作為，對呢班社會嘅幼苗嘅往後幾十年人生有舉足輕重嘅影響。我認為要有呢一份自覺同責任感，先對得起老師呢個尊稱。
書中嘅洪偉康喺大環境催化之下，不知不覺將學生嘅學業成績視為自己所有行動嘅準則，好似工廠嘅品質控制員咁，成績好就pass，成績唔好就提升「貨品」嘅成績，忘記咗一個人有好多個面向，學生亦唔係一件放喺貨架上待沽嘅貨。學生雖然年少，但唔係傻嘅，同洪偉康一齊流落荒島嘅所謂「問題學生」藍汛賢就能夠深深感受到自己被洪偉康及其他老師「物化」，亦做出若干被視為反叛嘅行為。喺學校階級嘅框架之下，兩人嘅矛盾無法解開，直到佢哋喺荒島被逼合作求生，洪偉康老師就同時成為學生，喺呢個「孤島教室」裏面重新學習做一個老師。另一方面，藍汛賢與人生經驗較豐富嘅洪偉康真誠交流之後，亦化解咗一啲自己嘅執念。呢度再一次證明，一個願意去陪伴同聆聽學生嘅老師，堪稱學生嘅人生燈塔，非常值得敬重。
喺故事入面，洪藍（註）兩人嘅心結解開，關係得以修好，令人欣慰；但現實世界中嘅師生關係，喺社會、學校、家長等多重壓力嘅輾壓之下，就尚有漫漫長路要走。《孤島教室》喺本文首提到嘅「十本好讀」活動中被學生選入「中學生最愛書籍」名單，但並無入選同一個活動嘅「教師推薦好讀」名單，唔知算唔算反映咗一啲令人傷感嘅現實呢。
註：咦！唔寫出嚟都留意唔到兩人嘅姓氏都有巧思。
留言0
查看全部
