30年前，我參加一个女性的社團，彼个社團佇電台負責一个節目，一禮拜一點鐘，理幹事輪流去主持。
有一擺，我熟似的理事招我去上節目開講，彼當陣仔咧欲過年，彼擺的主題就講「過年」。
我講著：「我阿兄兜……」講完call in，有一个聽起來是中年的查埔人call in入來講：「哪會是『阿兄兜』，是『老爸兜』……」，我毋捌想過這个問題，想講是我毋捌，雄雄順伊的話講：「是，是『老爸兜』……」
節目煞了後，我想，毋著矣！原本住的「老家」，才是「老爸兜」，我講的「阿兄兜」是阿兄家己買的厝，in規家伙佇蹛，老爸無蹛遐，哪會是「老爸兜」咧？敢講佮做皇帝人的想法仝款：「普天之下莫非王土」，後生的厝，攏是我的兜，其他的囡仔攏愛講彼是「老爸兜」，話敢是按呢講的？毋知影call in入來彼个查埔人伊家己是「老爸」，抑是「阿兄」？抑是人的小弟？
