我進前咧帶領女性寫作班的時陣
有一寡代誌感覺誠好笑，嘛予我想無：
●我無要求逐家攏愛交文章予我看，我邀請逐家來寫。每一擺下課進前，出宿題的時，頭一條是：「寫你想寫的」，若家己想無，我寫幾个主題予in參考，會使選一、二个主題寫，題目家己號。
有的人攏無寫，理由一大堆，其中一條是：「若寫出來，怕給別人看到。」我提供幾若个辧法，比喻：共簿仔藏好；共電腦的檔案用密碼鎖起來，別人就看袂著；寫佇email頂懸，寄予家己；若是用筆寫佇紙面頂，寫完共紙拆碎，挕捒，抑是燒掉……
方法幾若種，無寫的人就是無寫，３個月，12擺的時間一篇攏無交。我嘛無要緊，彼是伊的代誌，毋是我的。
●一開始，in來報名，添個人的資料的時，有一項是email口座。我有當時仔會用email通知代誌。幾若擺了後，發覺有人毋知，我共伊講：「我有用email通知。」
伊講：「我很少用email，沒在用。」
「請妳們填email是要通知用的，你如果沒有email，專員會用別的方法通知你，像：打電話等。你若有email，就用email通知。如果妳有填email，但是沒看的話，我們就不知道妳不知道了。」寫email是寫好看的？人叫你寫，你就寫？無咧用嘛寫，是寫什麼意思？
●有一年，我家己嘛去上課，學諮詢，我共老師講，我咧帶領女性寫作班，老師隨講：「上課的時候問很多問題的人，她不會寫。」是喔？我毋知這件代誌。
「她的問題不要一直回答她，她沒有要聽，妳在回答的時候，她在想下一个問題。」
果然，有一个人下課的時，一直問我問題，足足３个月的時間，伊一篇攏無交。
毋但按呢，有一擺下課的時，我欲去便所，行過伊的身軀邊，伊共我講：「我想請同學喝飲料。」
我急共伊講：「這裏是圖書室，不能吃東西。」
伊是來創啥？
●頭一擺上課的時，我頭一个問逐家的問題是：「這個課程的招生簡章，有看到的人請舉手。」
約量仔一半閣加一點點仔的人攑手。
「有仔細看的人請舉手。」幾若个攑手。
我問一个沒看著簡章的：「妳怎麼知道這個課程的呢？」
她指邊仔一个人：「她叫我來的。」
這个課是免錢的，來一寡毋知欲創啥的人。我對查某人的寫作是有期待的，帶幾若年了後，就決定後擺攏無愛帶這款免錢的課，加了我的氣力佮時間。
你可能也想看
