糖尿病回診。頂擺想欲講台語，落尾嘛無講，閣下一擺決心，今仔日來講。
納掛號費，抽血，量體重……，是無講啥物話，毋過嘛無講華語。
血壓、體重、身懸量好，伊講：「等著看診。」
我鞋仔穿好，閣問一擺較放心：「借問一下，今仔日愛量inbody無？」（身體組成分析）
「今天不用。」
逐擺攏有量，今仔日是按怎毋免量咧？伊咧量２个人的血壓，我毋閣問。
我坐佇遐等，這擺才看著，大部份的人攏講台語，我哪會攏無知？以前無注意著。診所佇宜蘭縣的羅東。
等到叫我的名，我入去，坐落來，醫生講：「數字一樣，平穩。」我看電腦螢幕頂面，醣化血色素佮頂擺仝款，6.4，我講：「你講６以下就會使減藥仔，６以下是正常，愛停藥仔。這馬會使減藥仔無？」
「我不主張減藥，妳聽得懂，我解釋給妳聽……」醫生繼續講華語。
我干焦問問題，無講啥物話，攏是醫生咧講，至少我應的時陣講台語。
去藥房領藥仔，買一罐試紙，嘛用台語講。
火車愛等誠久，去摩斯點一杯咖啡佮薟的糋雞肉，伊問我：「你要辣醬嗎？」手提一个細盒仔的醬問我，我講毋免，伊敢但聽無，閣問一擺，加說明：「雞肉沒有辣喔！」我講毋免，閣加擛手，伊可能知影意思，無閣問。
轉來到礁溪，10:45彼幫市內公車無，愛等半點鐘，我去超級市場買菜，結數的時，伊仝款問：「有沒有會員？」「無。」
「要不要袋子？」「毋免」
「要ＸＸ、ＹＹ嗎？」「毋免」
這馬的店員真歹做，每一个人客攏要問幾若个問題，誠辛苦。
（2024.7.10.）
