●人無爽快，就莫去補習
我國中二年的時，阮的英語老師叫阮幾仔个同學去伊教的補習班做助教。教室誠大間，阮一个人坐佇一排桌仔的邊仔，老師佇頭前教一个字母，說明欲按怎寫，佇鳥枋頂懸寫一遍，一个字母寫了，叫學生家己學寫，阮就徛起來一个一个巡，看in有寫著無？
阮的報酬是，老師予阮免費去補習英文。
上一站仔，我感冒，人無爽快。彼工去阿舅兜，阿妗聽我講人無爽快，叫我莫去補習，身體較重要。我就共老師講，我無愛去補習矣！
誠濟年了後，我才知影我的英語學無好，想著，彼當陣仔若繼續補落去，英語是毋是會較好？嘛才想著，感冒是會好的，若真艱苦，請假一、二擺，好了後，會使繼續去補，哪會規个放棄，無閣去補。
嘛閣有一個原因，阮兜蹛庄跤，龍潭村，騎跤踏車過宜蘭橋了後，有一段暗路，邊仔是田，暗時仔轉去的時，愛阮阿兄，抑是阮老母央厝邊仔的阿兄來宜蘭橋邊仔等我，陪我同齊騎彼段路，遮麻煩。毋是我毋敢行暗路，是驚拄著歹人。
高一的時嘛袂使參加樂隊，樂隊咧放學了後練習，練煞天就暗矣！所以放棄，無，加會曉一項樂器，嘛是誠好的代誌。我高二轉學去新竹女中，音樂課的考試毋但是唱歌爾爾，閣有「聽音」，老師佇鋼琴頂懸彈二、三小節的音，阮愛佇紙頂共伊彈的音寫落來，我根本聽袂出來伊彈的是啥物音？
因為蹛庄跤，因為是查某囡仔，有誠濟的限制，有的資源用袂著。抑閣，若是阮阿兄，抑是小弟，阿妗聽著in感冒，無爽快，敢會叫in莫去補？閣是免錢的，我臆無可能，查某囡仔的讀冊無重要，查埔囡仔愛讀冊。
●考牢就去讀，後面的時間猶誠長
有一年，有一个學妹高考分發來報到，佮我做同事，伊彼年嘛考牢研究所，欲那上班，那讀研究所。伊已經訂婚，未婚夫佇新竹，伊講伊誠無想欲讀這个冊。
有一工伊自外面轉來，講伊頭拄仔佇校園內底拄著ＸＸ老師，是我嘛熟似的查某老師，伊共老師講伊拄來上班，嘛考牢研究所，毋過真無想愛讀冊，老師共伊講：「考上了就去唸，以後的日子還很長。」
伊就去讀。二、三年讀煞，頭路換去新竹，結婚，聽講誠緊就升主管，當年有讀研究所的猶少人。
拄著無仝的人，講出來的意見就無仝款。我真佩服彼个老師鼓勵伊去讀，我聽著彼句話誠感動。若有的頂輩是毋是講出來的話是：「查某囡仔家庭較重要，伊緊咧去新竹陪恁翁，結婚，生囡仔、𤆬囡仔較重要，查某人毋免讀遐濟冊。」
做頂輩的人，莫隨便予人意見，彼个意見影響人誠大。
●師院補學分
我佮阮翁的共同朋友，某是小學老師，師專畢業。落尾師專攏改做師院，逐家轉去補學分，用幾仔个歇熱歇寒的時間讀完，提著學位。伊算誠慢才去讀，同事逐家攏讀煞。
歇熱的時，伊予２个囡仔上安親班，伊去讀冊，嘛捌來我的圖書館揣資料，寫報告。有一擺，in翁𤆬囡仔來阮兜耍，共我哀：「去唸什麼書，都沒照顧家庭。」
我講：「她有壓力啊！大家都唸完了，只有她還沒唸。」閣講伊哪有無照顧家庭？伊５點下課，就轉去厝內煮飯，所有的厝內面工課暗時仔做完，精差日時仔無家己𤆬囡仔爾爾。伊的翁嘛是老師，大學的老師，歇熱的時毋免上課，伊嘛會使𤆬囡仔。
這款翁，一點仔攏無想著伊的狀況。
●讀博士班
阮樓上的厝邊仔，先生是阮翁的高中同學。In翁仔某大學畢業了後，同齊去美國留學，翁博士讀了，某干焦讀到碩士。
轉來台灣，翁佇台大教書，某佇私立大學教書，２个攏教化工。
In的囡仔倩人育，才倩３工，老母無課的時間伊家己𤆬。伊講：「晚上10點，小孩睡了，我將屋內收一收，才開始準備明天要上的課。」
坐車坐足遠去上課，「一天８節課上下來，累得想吐。」
幾仔年了後，伊講：「每次學校要招聘新老師，就有一百多位博士來應徵，我只有碩士學歷，壓力很大。」
伊有想過換工課，毋過，其他的工課逐工愛上班，一工愛上八、九點鐘，伊教書，一禮拜去３工，一直無換工課，落尾去讀博士班。
伊去中壢讀博士班，去山頂教書，閣愛𤆬２个囡仔，無知影伊的日子是按怎過的？
有一擺，我拄著伊的翁，伊嘛共我講：「唸什麼博士班？」
我講：「她的工作有需要啊！」
這款人，當初同齊去美國，共厝內面的資源讓予伊讀博士班，你無感謝，這馬恁某佇國內讀，較省錢，閣那賺錢，講這款話。
（2024.9.7.）
