Gún 翁愛食包餡 ê 麵皮，像水餃。拄徙岫到德國猶原 teh 揣喙斗 ê 我 mā 確實捌包過幾斗我論真講無遐迷 ê 水餃。
近來凡勢受伊參加社團 ê 影響，伊問「你敢 bueh 包水餃？我會使得 kā 你鬥煠水餃。」
伊 tī Telegram 參加偌 tsuē 社團我 m̄ 知機，總是無事不登三寶殿我真知機隨微微仔笑講「恁歐洲 mā 有水餃，咱去超市款一包轉來煠比家己動手做 ê 省時間、省水電錢 ê 一兼二顧摸蜊仔兼洗褲。」伊知影牽手日本剾刀攑懸懸，倒剾伊 ê 一个錢拍 24 个結，不過 uī-tio̍h 虛華張面皮準做臭頭仔免包布伊 mā bueh 包布，防蠅(風神)，伊繼續喙抹蜜甜粅粅講「你包 ê 水餃無人通比並。」
我清楚知影家己 ê 斤兩 mā 無幻想世界，文文仔笑講「是你過謙 m̄ 甘嫌，我無遮爾仔厲害啦」斡頭伐向廚房準備伊隔轉日 ê 飯包，伊 mā 知影迷湯閣灌 mā 無較縒 ê 放伊自由莫綿死綿爛。
本底按算攢𪜶兜傳統 ê sa̋n-tóo-it-tsih 兩塊麭抹厚甲若壁 ê Bá-tah，中間敆一塊 Tshì-sù 佮 Há-muh，因為伊 ê 迷湯 hōo 我想著交 Crêpe 法國薄餅煎無宛 2 體 ê 唯一精差 tī 糖並以兩个德國做比如，西德講 Pfannkuchen，東德講 Eierkuchen，勥母講伊 kan-ta 會使得做下晡點心 ê 德國卵煎餅。
餅煎好那包餡 Hape Kerkeling Ich bin dann mal weg ê 這段話宛然藏水艦(tshàng-tsuí-lām)踮沬船(tiàm-bī-tsûn)浮出海面 hōo 我鼻酸酸目眶紅....
Mein Oma Bertha hat es schon immer gewusst: Wenn wir nicht aufpassen, fliegt unser Hans Peter eines Tages noch weg!
我 ê 阿媽 Bertha 一直攏知影這件代誌「咱若是無注意，有一日咱 ê Hans Peter ē hōo 伊走無去。」
向時慣勢 ê 討厭成做今仔日 ê 數念，行過 kā 草仔薅來食 ê 芋仔爸，轉轉斡斡落南上北到金門紲落來向東來到臺灣，伊慣勢 tī 冰箱囥一大包水餃講「這有水有柴就通煠來食」ê 水餃成做我交伊短短二十五冬緣份上深 ê 記持之一，總是這个記持 m̄ 捌 tshan-tshiūnn 這久遮爾仔深遮爾仔明。
上要意 ê 記持，果真上好放 buē 記。
餅煎好，餡包好我 tuì gún 翁講「我一直攏知影這件代誌，準做我注意，有一日你猶是 ē 走無去，不過這久 ê 你會使得上社團展風神，只要你佮意我 uī 你設計 ê 早起頓。 」
清楚知機牽手 teh 講佗一位出名人 ê 句，伊隨應講「我是 Hans Peter ê 阿公阿媽 uī-tio̍h 伊，下性命達成政府 ê 要求 buaih hōo 伊走無去。 」
事實敢是按呢生？我無確定，總是我清楚知影捎無摠 ê 計畫 ē 因為一段話搝著摠頭並見著久年不見 ê 踮沬船。
二戰後 ê 德國拆做東德交西德。先祖拍拚 ê 領土手牽手因為後嗣立場無相𫝛致到人民生活用語 mā 愛起交繃成做無仝面肉，像這煎卵，我慣勢跟綴東德年間大漢 ê 朋友講「Eierkuchen」，西德朋友一聽隨糾正講「Pfannkuchen」hōo 我捷感覺家己頇顢甲有賰學 buē 曉尊存別人 ê 語文慣勢。後來沓沓仔理解 m̄ 是我頇顢交 m̄ 捌尊存別人 ê 文化，是糾正我 ê 人𪜶 ê 世界 kan-ta 一塊義美傳統豆腐 ê 大細。起因平平 mā 是講德語 ê 奧地利伊號做「Palatschicken」。
- Die Weltgeschichte ist der Fortschritt im Bewusstein der Freiheit
世界歷史是自由意識 ê 進步
Georg Wilhelm Friedrich Hegel
順一塊煎餅翻頭看按我 tuì 一塊煎餅語辭 ê 變化交包餡 ê 妝娗，我愛 kā 家己拍噗仔，起因順這个跤跡我看著家己 ê 意識是偌爾仔自由自在交尊存別人 ê 文化底蒂。雖罔我無法度百分百講出正確 ê 語辭，不而過我 m̄ 捌 tuì 人按呢講「透世人 m̄ 捌聽過人按呢講。」
這斗 ê 煎餅造形 mā hōo 我想著向時 tī 咖啡廳縖 ê 皮包仔。人 ê 記持正經是一無細膩就 ē 走甲無見人去。
寫著 Pfannkuchen 我又閣成做一隻貓華語 ê「平底鍋」按怎講？
這斗 ê 新辭請教 hōo 我 Surprise，起因我掠伊 ē 出現 tī 公視台語台台語新辭庫，結果無，伊無出現 tī 公視台語台，伊出現 tī 教育部台語辭典實在有夠 Überraschung。
華語 台語
平底鍋 平鼎仔
淺仔鼎
番鼎仔
