喙咂一喙 Ka-pi 目借烏仁目鏡 ê 妝娗向窗仔外有淡薄仔黃、淡薄仔青、淡薄仔紅、淡薄仔烏 ê 街路金金相，阿章「我朦朧理解到這世界有些假惺惺的東西被裝飾得外表美麗➀」像一粒金含 tī 捎無摠 ê 金色 Blue 透甜蜜。
「這 m̄ 是妝娗悾闇(khong-am)交別人 ê 囡仔死 buē 了 ê 抾空。」
「那些朽木滔滔飄流，那些漩渦讓人頭暈，那些沙蟲瘋狂跳躍，無數蜉蝣和蟲子死得理所當然，屍體覆蓋在河岸邊一層白。它們不會煩惱道德，它們也不雄辯」阿章 ê 話 tshan-tshiūnn 鸕鶿(lôo-tsî)箍頷 kā 我捎無摠 ê 金色 Blue 伴彼暝你 ê m̄ 捌是我上好 ê 食聲齊送 hōo 無聲無說 mā 無照氣象報告來行 ê 頂晡。金甲若卵包卵仁 ê 天，換一个角度啉咖啡專工按臺灣紮來德國送我 ê 遇見幾乎換個角度看生活 ê Ka-pi 茶甌，查埔囡仔手插胳頭敧一邊，兩蕊比四跤仔閣較細 ê 目睭 m̄ 知 teh 看啥物，我 ê 頭 mā 開始跟綴伊斜(tshiâ)一邊，本底 ê 光炎炎成做軟晡日斜西。詩人交哲學家多數在田野(tiân-iá)，詩文滿喙邊者多數像玲搪著 ê 華僑➁世界 kan-na 一个角度 。
假仙假觸是妝娗甕肚交悾闇上好 ê 欺瞞，hōo 我嫌伊䆀 ê 白銀魚紫頭菜生菜盤是我硬 bueh 笑伊老猴穿花衫 ê 無四配 ê mā kan-ta ē 曉用一个角看世界。電腦拍開，資料匣子展開，三十外張 ê 相片 buē 閣目睭花花，瓠仔看做菜瓜，笑伊是老猴無粉頭 ê 圓仔花 m̄ 知䆀，大紅花䆀 m̄ 知，像某乜人 kā 家己 ê 自本，別人 ê 生份當做是 Hermann Hess Johann 交 Wolfgang von Goethe 來臭頭包頭巾，防蠅(風神)來看人無目的。講人尻川後話抑是嫌人䆀進前愛節家己 ê 斤兩 --- 翻草 1.。
朋友 uī-tio̍h 生份人 kā 揤「無佮意」規仙人氣掣掣，四界過家投這件代誌。我 m̄ 知別人按怎 kā 回應，腸仔直透尻川 tuì 踅花園(Durch die Blume，轉彎踅角) 無心適意 ê 我直接講「你 ē-tàng 一四界 ka̋ng 揤無佮意，是按怎別人 buē 使按怎做。」
「我揤進前逐字攏 mā 讀甲齊著兼翻草」朋友講。
交伊熟似 m̄ 是 tsa̋ng 暝 tsiah 開始，我想 bueh kā 黜臭講若是按呢生，馬真正 ē 生角，天 mā-ē 落紅雨，總是年歲無閣烏貓 hoo-lú-bóng mā 無閣興旺成做開喙蚶，六月蚶進前 ē 踏擋仔，來閃避春雺曬死鬼，夏雺做大水舞死家己。
「無定著伊無細膩揤著無佮意」我講。
「這款代誌呔有可能無細膩」朋友搝懸聲調 buē-su 挽著筋準備掠我出水。
「這件奇案需要烏面包青天來 kā 你挽瓜揫藤」我文文仔笑應 kā 話題轉到別搭，畢竟社群媒體大細事交我是頂世紀 ê 距離兼別人 ê 狗咬鐵釘 m̄ 願放 tī 我這个年歲是一件十指伸出，無平長 ê 四常。
送大舅上山頭，三十外冬 m̄ 捌見面 ê 外祧(thiāu)表兄見著我猶原若見著空氣，準做我交伊相供問，伊 ê 目尾 m̄ 捌使向我這爿，我知影伊猶原 teh 抾恨，抾彼件花缽仔種菜，無緣 faˊbadˋeˋzung coimoˇienˇ teh 怨恨，總是感情事本底就是緣一字，人 buaih 愛你，我呔有法度按怎，準做你愛 ê 對方是我朋友。
Uī-tio̍h 舊厝問題交十外冬 m̄ 捌見面 ê 旺叔旺嬸約好 tī 餐廳見面，旺叔致著肝病 ê 肚猶原一圈 m̄-koh 人無閣 tshan-tshiūnn 往過按死殗殗，旺嬸猶原烏焦瘦掛兩蕊 m̄ 捌放棄抾恨 ê 目神向我遮䀐一目隨越頭 hōo 我掠做家己紮病毒。
「佗一个囡仔 buē 做寡屁窒仔代，你 mā 莫遐爾仔𠢕抾恨」旺叔 tuì 牽手講，牽手無應話旺叔 mā 無閣針對這件代誌詬唸落去，行過龜叨鱉趖搪過厚甲若蠓 ê 生毛帶角，我 tuì 旺嬸心肝穎彼本天公 ê 數簿 mā 無興反，起因歹肉無割，好肉未生，準做囡仔時 ê 我做過真孽 ê 代誌，彼 mā 是十外冬前 ê 過了代。
天 bueh 變，一時間，人 bueh 變，一秒鐘。搪著外祧表兄交厝邊旺嬸這款態度，我無飄撇 ê 雅量有法度 tī 彼个時間交空間表現甲自在，總是我 mā buē 交𪜶鬚聳目降互相安電線，甚至到今猶 teh 揣線穿針鼻縫，我無彼个閒甲掠蝨母 ê 美國時間。不過我 ē-tàng 按遮 ê 事件翻草問題並提醒家己，水按圳行，無啥物代誌 buē 成做過了代 ê 繼續向行前 --- 翻草 2.。
本底按算 kā 伊牛郎約織女，後會有期，重餾一斗。那食越南米粉那看窗仔外 hōo 人類跤跡按白染甲烏 ê 雪，歹食是歹食，閣是米粉底成做猴齊天按石頭磅出來 hōo 我徛起身划向客廳揣烏仁目鏡換一个角度看世界，本底嫌伊垃圾烏 ê 雪步頻成做家鄉金黃 ê 檨仔雪花冰。
換一个角度看世界，喙捷講媠䆀無要意 mā 比阿章理解這个世界 m̄ 是有一寡仔水雞生尾，假龜假鬼假怪假仙假觸，是按怎這久 ê 我猶原迒 buē 過「它們不會煩惱道德，它們也不雄辯？」
原來，我猶原手攑刀，心內 m̄ 捌閒囉囉 ê 喙飽目睭枵 m̄ 捌知足兼 m̄ 捌一箍芋仔番薯硬風神展家己是真捌真茶無色，真人無激 ê 道理。
換一个角度看世界，人比人氣死人，跤腿比煙筒。我攝相是 uī-tio̍h 虛華抑是利便家己揣食譜？「我朦朧理解到這世界有些假惺惺的東西被裝飾得外表美麗」媠--ê tī 肢骨，㾀勢裝 buē 出，天公伯賜 hōo 我 ê 美學天份就是這个額，我需要學習放下逐 buē 著 ê 美感交接受日晝三時久，有 ê 咧食有 ê 咧煮 ê 無相𫝛。
德國 ê 白銀魚號做 Hering mā 號做 Matjes。
Matjes 這个辭是按荷蘭語來，意思是查某囡仔。德文 ê Hering 英文 ê Herring 荷蘭語 ê Matjes 呔討無跟綴ニシン這个講法？
# 記錄往時寫 tī 面冊 ê 文字
德文「Hering」、英文「Herring」、華文「鯡魚」，tī 教典揣無這个辭，tī 台華字典揣著「ni-sín」。
我 tī 愖，我 bueh 延續日文「ニシン」 ê 講法抑是延續這尾魚 tuì 歐洲人 ê 重要性佮德國 tuì 伊有屑屑仔看無啥 ē 起 ê 緣故來做台語辭 ê 號名。
愖來愖去，想著鄭安住老師 tī 公視台語台《話山話水話玲瓏》有針對「灶跤」佮「廚房」ê 用法，提出伊 ê 想法 hōo 逐家做參考。
「語言」是活-ê，伊 ē 綴時代行
所致 tī 這站仔猶原揣無「鯡魚」ê 台語辭，m̄-koh 有通仔沿用日文「ニシン」之間，我想 bueh 使用咱家己 ê 語法，我 ē-tàng 用啥物來表達？想著 tī 歐洲，伊有「海洋 ê 白銀」mā 有「散赤人 ê 物食」ê 稱號。這兩个，我個人是較意愛「海洋 ê 白銀」，所以我家己 kā 「ニシン」號做「白銀魚」(pe̍h-gûn-hî)。起因 tī 古早時代，伊 tuì 艱苦人來講，正經是白爍爍 ê 白銀。
「散赤人 ê 物食」是德國人古早時 tuì「Hering」 ê 稱呼。較早聽出世 tī 歐戰 ê 序大分享𪜶 ê 歷史佮德國百姓 tī 二戰進前是無食肉 ê 故事 hōo 我想著阿母交阿媽𪜶彼輩聽著糜 ê 無四序。
彼久翻身看這久想著目今 ê 時行「Das Fleisch ist Frühstück und Gemüse」肉是我 ê 早起頓交菜蔬是 uì 1960年彼站開始。寫到遮，我 tī 愖這个問題，近來時行 ê Vegetarisch variante kā 魚肉算 lueh「素食」敢受「古早四常」ê 影響。
巡田園翻田塗接新枝，寫 Blog 正經是一件好議量。
➀➁ 越南現代小說選 - 水神的女兒、一個下午
2024.11.22
