冊有一版二版三版，我 ê 部落格有一改，再改，閣再改。
自無料使用 Pixnet (300mb?貧惰請教...閬過)到決定撏錢 bué 15G 儉相片，這 4 冬 ê Blog 四常成做我訓練家己食老較莫老倒頹(thē)佮增加智識 ê 好角勢，特別是貧惰寫字做筆記 ê 我迵過寫 Blog 總算有法度好好仔 kā 好玄 m̄-koh 無才調 kā 鏨 tī 海馬鉼針(Hippocampus)隨揣隨有 ê 資訊成做家己 ê 通書。
《我在西伯利亞的監獄》讀煞，四月芒種雨，五月無燒土，六月火燒埔 ê 黃酸雨成做內山出水(Sturzfluten/Flash Flood) hōo 芒雨望豐年 ê 向望成做失望，跤踏佮臺灣 bueh 佮臺灣 bueh 平大細 ê BW(Baden-Württtemberg)，一个圓箍仔兩種心情，耳那聽 Ingo(Tagesthemen) ê 專題報導，海馬鉼針 mā 綴遮 ê 報導開始踅圓箍，Schorndorf ê Gottlieb Wilhelm Daimler ê 古宅敢 mā 受災，若受災需要偌久 ê 時間 tsiah 有法度恢復自本 ê 面肉，耳那聽 Ingo 佮記者 ê 連線，本底恬靜 ê 海馬 mā 綴電視聲、窗仔外 ê 鳥仔歌聲、徛踮肩仔頭 ê 阿 bueh 佮阿 buaih tī 我 ê 耳仔邊比賽啥人較𠢕呲(tshū)。「夏至到秋分，我搭胸坎保證你包穩 buē 讀伊一字」阿 buaih 翹跤撚喙鬚，那講那笑。
「你永遠 m̄ 知影，你 tī 當時 ē 閒甲掠蝨母來相咬 mā 無法度佮閒閒美代子好好做陣冇談」阿 bueh tshan-tshiūnn 永遠擘腹囡仔食無飽穿無燒 ê 阿母按呢溫暖。
耳繼續聽百萬千 ê 聲音，目繼續踅倒爿、正爿佮壁角，正爿 ê 冊讀煞，車日子轉來無庫存繼續讀，倒爿佮壁角 ê 冊 m̄ 驚無庫存，按黃越綏老師「EP464 黃越綏｜【名人專訪】什麼是迴光返照 Feat. 張明志」認捌 ê 張明志醫生《客家庄的醫師娘》佮踅博客來請聚珍臺灣 kā 我鬥相共 ê《越南現代小說選》攏是我想 bueh 先看 ê 冊，總是我家己 ê 歹癖 mā 愛照顧抑無情緒 ē 來叨撚。
我 ê 看冊慣勢是跟綴冊入厝 ê 時間 tsham 伊盤撋，不過這个順序 mā m̄ 是蜈蜞釘 buē-tàng 扳起來，總是這个變化 kan-ta 適合 tī 時間飽滇閣有冗 ê 日子，像 Auxo 佮 Carpo 交換手 ê 寒露(hân-lōo)，阿波羅若水沖 ê 金色頭鬃 mā 換做我囡仔豚 ê 豬哥亮頭時，無照起工來看冊 ê 情緒叨撚就 ē 自動去旅行。
猶有若意大利是 42號，德國是 38 號 ê 半日月時間，見讀見愛請教 Google 大眾廟賜我智慧甘耀明先生 ê minBunun《成為真正的人》tī 出發車日子進前應當有法度讀 hōo 煞...
「一隻渾圓的鉛色水鶇再度回到牠的地盤。」水ㄕㄨㄟˇ鶇ㄉㄨㄥ，德語 ê Amsel，英語 ê Common blackbird，2021 頇顢揣資料，直接按英語翻做烏鳥 ê 水ㄕㄨㄟˇ鶇ㄉㄨㄥ按怎講，另外臺灣有枵鬼假細膩 ê Amsel?
「鉛色水鶇，臺灣特有亞種」原來臺灣 mā 有逐日徛 tī 窗仔門佮我對哭呻呔無飼料 ê Amsel。四常一日有法度讀 20 ~ 30 頁 ê 冊，自讀 minBunun《成為真正的人》一日讀無到五頁，不過我佮意這个過程，起因我按這本冊認捌著咱臺灣有 Amsel 佮按怎講「鶇/Tong」這字。
Amsel ê 台語號名 Google 大眾廟猶原無 hōo 我一个答案，不過伊 hōo 我這个寶庫《還我台灣鳥仔名》hōo 捌一个呼(honn) ê 我正經有一个呼通呼。
「鉛色水鶇」石青仔
「構樹」鹿仔樹 --- 後回轉去臺灣 buē 閣相見 Wer bist du
「綠繡眼」青苔(tî)仔
「花嘴鴨」花喙鴨仔，按這个智慧又閣湠出「候鳥」ê 講法過境鳥、渡烏、過冬鳥閣生湠出這支影片【帶路蟲講生態｜Tō͘ chiáu 渡鳥 aka 候鳥】。
「褐鷽ㄒㄩㄝˊ」alias「山鵲」本底掠做伊是望冬，押尾對照英語學名，伊 m̄ 是望冬(褐頭鷦ㄐㄧㄠ鶯) mā 揣無資料，就順客鳥另外 ê 講法 kā 號做山鵲(tshik)，日後有拄著別 ê 較完整 ê 講法 tsiah 來調整。
自寫台文捷捷成做貓，自寫台文認捌 tsuē-tsuē 新世界，準做這个新世界 tī 台語辭庫猶揣無定案 hōo 小面神 buē 堪得 hőng 講，你是博士博，博甲戴紙橐 m̄ 敢烏白主意，總是這个驚惶 mā 引𤆬我成做愖題人，像 Mozzarella tī Wikipedia 猶未出現，Blog 已經出現，彼陣有人 kā 伊號做「義大利水牛起司」mā 有人照倚音 kā 伊號做「莫茲瑞拉起司」，這久因為演算法 m̄ 管拍 Mozzarella、莫茲瑞拉、馬蘇里拉奶酪攏齊出現「莫札瑞拉起司」，除非你拍「義大利水牛起司」tsiah 揣有義大利餐桌上會牽絲的cheese-馬自拉乳酪Mozzarella，這當然 mā 是我笨跤笨手 buē 曉使用網路 ê 結果，總是遮 ê 變化 tuì 我來講就是 Evolution，Mozzarella tī Italia 已經定案，tī 華語世界 mā 定案，tī 台語猶未，這 hōo 我想著生物學者發現新物種抑是搪著舊物種演化做新物種 ê 快樂佮激頭殼。
Tī 我猶未成做坱埃(ing-ia)我 ê 部落格 tī 大環境已經成做烌，準做按呢我敢 bueh 放捒家己 ê 演化？
當然 mā buaih，Kreis von Kreisen，一个大圓是按算 buē 清 ê 圓生湠，準做我个圓 buē 成做一个大圓，我猶是這个世界一个圓。
德語 ê Kopfsalat(DE) = Häuptelsalat(AT)，英語 ê Butter lettuce = Bibb Lettuce，華語 ê 波士頓奶油萵苣、玫瑰萵苣、奶油波士頓 tī 台語會使得按怎形容？
英語 ê Butter lettuce 是按伊 ê 是喉韻(âu-ūn)形容，Bibb Lettuce 是按引進者 John Bibb➀定名，這个 tī 古埃及交古希臘就出現 ê 菜蔬，我 bueh 趁美國版本抑是歐洲版本？
趁歐洲版本，畢竟伊按歐洲生湠到美洲。
德語 ê Kopf 交 Häuptel 形容頭 mā 形容根頭。Kopfsalat 發穎了後 buē 跟綴竹仔抑是杉葉蔓石松(Bärlappe, Ground pine)順枝湠葉 m̄-koh 順根頭生葉，按頭目一葉一葉湠，湠做一仲圓，若頭「Die Sprossachse ist stark gestaucht, so dass die Blätter einen dichten, rundlichen „Kopf“ bilden.(Wikipedia)」，「頭目萵仔菜」就是你。
感謝愛料理(Icook) hōo 我有機會閣一擺成做 Le Penseur 愖問題 m̄ 是堅持搪著台語就 Kopflos ê 人。
頭目萵仔菜自埃及行到希臘，按希臘行到羅馬，又閣按羅馬行到中世紀，伊 hőng 分類做花園生菜 ê 萵仔菜，這个分類按怎來目今揣無資料通稽考，不過 tī 16 世紀 ê 文藝復興年閣，德國 ê 藥學者 Leonhart Fuchs tī 藥草分類 kā 生菜分做三類，頭目萵仔菜就是其中一个。紲來因為法國太陽王 Louis XIV 路易十四 hōo 伊按野生萵仔菜成做一年迵天攏有法得食 ê 菜蔬，包括溫室栽種。
1866 德國醫生兼植物學專家 ê Friedrich Alefeld kā 萵仔菜分類做 65 種，其中有 44 種是頭目萵仔菜，圓形。羅馬萵仔菜屬長形萵仔菜類。
心情拗鬱一軀殕色 ê 穹蒼(kiong-tshong)總算願意換新衫，拜五軟晡順地下鐵龍骨向北爿行向 BW 銀行 ê 出口，順 BW ê 出口行向 Marktkauf，順 Marktkauf 斡倒手爿聊聊仔巡田園。
看起來若野草 ê 青埔地是未來 ê 金黃麥仔田，一蕊閣一蕊 ê 萵仔菜栽是未來 ê「飯頓」。啊，猶未六點信任菜蔬店猶關門，踅翻頭三伐做一伐交日鬚做陣行。
「塗肉林檎」、「紅菜頭」、「洋蔥」厝內齊有，翁愛食 ê 生菜有佗幾款，越頭看正手爿。
莫怪阿羅講，今年是歹年冬，二月 tsiah 搪出門玫瑰草花已經起甲 2€ 500g，一向圓輾輾若籃球 ê 頭目萵仔菜 mā 消風做棒球閣漲懸價。
德國政府一直講能源壓力沓沓仔解除，若是按呢生呔討無交人比並食穿 ê 我猶是趁無夠飼腹肚？
葉仔紅 ê 頭目萵仔菜 tī 美國號做 Boston lettuce，青 ling-ling 頭目萵仔菜 tī 美國號做 Bibb lettuce，𪜶 tī 德國齊號做「頭目萵仔菜，紅」，「頭目萵仔菜」，紅色比青色較鞏金，食起來有啥無相𫝛，m̄ 知機，總是真好配色。
目那繩頭目萵仔菜，頭那愖這篇按算改版 ê 圖，花缽仔種菜，無緣，後回 tsiah 來相揣。
倚 gún 兜車幫 bueh 40 分鐘 ê Kaufland 𪜶這禮拜 ê 菜價媠甲 hōo 我無專工 kā 𪜶交觀一下 ē 得內傷。
菜頭(Rettich)一支 1.49€，原價 1.99€ ~ 2.49€
櫻桃菜頭(Radieschen)一把 0.49€，原價 0.89€
米蘭草花(Wirsing)一公斤 1.49€，原價 1.99€
塗肉林檎(Kartoffeln)一公斤 0.7€，原價 1.7€
沙拉瓜仔哖(Gurken)一支 0.59€，原價 0.99€
兔仔耳(Feldsalat)150g 0.99€，原價 1.49€
玫瑰萵仔菜(Kopfsalat)一蕊 0.99€，原價 1.49€
遮儉落來 ê 菜價比一逝油錢抑是車錢閣較俗 ê 俗物一屑仔攏 buē bué 破家，隨招交我𫝛款免出門 ê 翁出門鬥扞家。
菜款好轉來到厝一項一項分類，暗頭仔 ê 下昏飯交跳工 ê 早起頓 mā tī 頭殼踅。馬鈴薯一斗 5 公斤，一頓 800g 左右，天氣沓沓仔燒烙，馬鈴薯僫囥先來出珠仔豆馬鈴薯。手那秤重量，頭那踅隔工 ê 早起頓，交翁品好，早起頓食歐洲，下昏飯食亞洲，櫻桃菜頭、兔仔耳、大瓜仔哖、頭目生菜...著，頭目萵仔菜，部落格有一篇想 bueh 改圖 ê 頭目萵仔生菜盤，頭目萵仔菜就是你。
頭目萵仔菜 gún 翁仔姐明仔載 ê 早起頓就勞煩你 kā gún 鬥相共，Danke。
餾菜色進前，照慣勢田螺循舊逝，看敢 bueh 繼續行仝逝。2022 ê 菜色是順減肥計畫所出 ê 菜色，伊窮真一屑仔攏無敆我喙斗。
頇顢想菜色，就請 Google 眾廟賜我智慧生 Kopfsalat mit Radischen, Röstkartoffeln mit Kopfsalat，這兩項菜色敆做一盤合該是好味素。馬鈴薯按籠仔捾出來繼續秤重，排 tī 生菜區 ê 頭目萵仔菜徙位到早頓區。
合該是燒熱，這斗 ê 頭目萵仔菜看起來有像薔薇公主猶未出世 ê 薔薇形，頭那閃這个畫面，喙 mā 那唸 muî-kuì、tshiûnn-bî...小等一下 tshiûnn-bî 敢是按呢講？巧手機仔隨請出來，請教教典，教典無收，m̄-koh 學著新智識「薔薇科木瓜屬」，請教揣台語揣著已經擲 tī 後擴 ê 綢春花，繼續請教有所不知 ê Google 玫瑰、薔薇、山茶花有啥物無相𫝛，Google 賜我智慧 mā 引𤆬我行轉去囡仔時去田尾姑婆遐，聽姑婆講 ê 玫瑰 m̄ 是玫瑰 mā 是玫瑰 ê 霧嘎嘎記持。
順 Google 無料分張繩姑婆 ê 聲音，玫瑰 m̄ 是玫瑰 mā 是玫瑰，我猶是霧嘎嘎行 buē 出罩雺，向頭請 Google 指引明燈「原本在漢朝時，「玫瑰」是指一種有斑紋的紅色玉石，後來也用來稱呼一種薔薇屬的植物。此植物產於華北、東北、朝鮮半島和日本等地，枝條柔弱且多密刺，每年僅於春末夏初開花，花多為紫紅色、白色；而月季不僅四季開花，花色也繁多，並且枝幹直立、刺較少。由此可知，兩者並非同一物種。......有趣的是，古代中國對薔薇屬植物的分別較明確，所以中文有「薔薇」、「月季」、「玫瑰」等稱呼，各指不同物種；至於歐洲諸語言則將薔薇屬植物統稱為「rosa」（拉丁文、西班牙文等）、「rose」（法文、英文等）或其他近似的拼寫。所以當西方的「rosa」、「rose」對譯中文時，或許是覺得「玫瑰」一名似乎比較好聽，便無論它原始中文名稱是什麼，一概就以「玫瑰」相稱。」➀
Kopfsalat 按埃及行到希臘，按希臘行到羅馬，紲落來分類做 Kopfsalat 表示伊是按根頭生葉 ê 物種。Kopfsalat tī 美國生湠做 Boston lettuce 佮 Bibb lettuce，華文 kā 伊分類做波士頓奶油萵苣、玫瑰萵苣、奶油波士頓，我 mā 會使得 kā 伊順這斗 ê 發見按頭目萵仔菜湠枝做薔薇萵仔菜交玫瑰萵仔菜，像硨磲貝有人 kā 伊號做五爪貝、牛車貝 ê 隨人感受講世界。
「這是熱人 ê 色緻」按床頂塗肉林檎成做 Yoga 一尾龍 ê 翁，見著昨日 ê 四跤一屑仔攏無了本，喙笑目笑 tuì 牽手褒嗦 buē 離。
➀ 資料來源「行天宮五大志業」
Kopfsalat
