今仔日上大 ê 快樂是 kā 所有 ê「Nein」做七聲八調，上、下、平、仄 tī 阮翁 ê 面頭前「Nein」來「Nein」去。
「Nein」了，我問伊，需要德國 ê 聲調 bő？
「M̄ 免，遮 ê Nein 有才調擋一年」伊應。「這，我就 m̄ 知--looh，不過我知影，tsa̋ng 有一个人保持門風 tī 番薯行出烏暗 thenn tī 窗仔邊曝日頭隨講『gún 德國人透早時仔無 tī 食番薯』兼覕喙。」我順記持 ê 覕喙搬一斗 hōo 伊補數念，隨閣換面，畢竟彼款覕喙需要功夫，我功夫無夠額。
「恁 ê 食食文化我無研究，總是這份食譜是按恁百年𥴊仔店看來，你 bueh 寫一張封 kā 𪜶糾正講『咱德國人透早時仔無 tī 食番薯』無？」
「M̄ 免」翁應。
「專家你確定？」我問。
「確定」翁應。
「Hōo 家己人洗面，感覺按怎？」
「我是德國戰車，洗面無感覺」伊笑應。
按𥴊仔店成做連鎖超市 ê Aldi 是德國連鎖超市 ê 第一間，2017 猶未加入中國市場進前講華語 ê 人順伊 ê 音 kā 伊號做「阿爾迪」2017 加入中國市場定名做「奧樂齊」ê Aldi 無 REWE ê 冇手提供實體食譜冊交人客結緣，m̄-koh 有出網路食譜交人結緣。
這份食譜就是按 Aldi 來 mā 是我第一斗知影番薯除了會使得煮番薯湯、炕番薯掠外 ê 新食法。這久翻頭看彼久，我交翁 ê 心肝寶貝𪜶勥母 mā 無啥無相𫝛 ē 曉扞鼎 m̄-koh 較出 mā 彼幾項。不過，我猶是比𪜶勥母較好，我無才調田螺循舊逝，較行 mā 仝逝 m̄ 願改變，像 gún 德國人無人一透早就食番薯。
這个問題拆白講 mā m̄ 是 gún 翁一人有這个想法，總是伊較䆀字運搪著按亞洲來 ê 牽手無才調 hōo 伊準過，順伊 ê 喙斗行。
徙岫來德國進前，等依親簽證 ê 我踮日無聊甲掠蝨母相咬就經營有提供早起頓 ê Airbnb，凡勢有德文紹介所致來 gún 兜歇暝 ê 外國人有 80% 是德國人，遮 ê 德國人見我攢 ê 早起頓無麭隨做 gún 翁 ê 見本「你知影咱德國人無按呢食早起頓，著無？」
因為遮 ê 人交我無底代，我就一耳空入，一耳空出笑應「你知影遮是台灣，我是台灣人，著無？」雖罔按呢應，麭我猶是有攢 hōo 無法得入人門，順人意 ê 𪜶猶有得選擇。
講著麭，我做 ê 麭是倚歐洲人口味，意思就是水、麵粉、鹽、酵母賰 ê 齊無，這个簡單 ê 手路 hōo tsuē-tsuē 按歐洲來 ê 朋友離開 gún 兜進前齊問「遮 ê 麭敢會使得 bué」，我家己 mā 是出外人知影食食 tuì 旅者 ê 重要性交臨時臨曜經營 Airbnb 是 uī-tio̍h 解決「等待」ê 齷齪，錢 m̄ 是重點，齊講無料分張 hōo 我得著 tsuē-tsuē 迷人閣溫暖 ê 記持，特別是 uī-tio̍h 龍山寺飛來臺灣 ê 比利時翁仔姐，我法語 buē 通，𪜶德語交英語 mā buē 通，唯一有才調請 gún 翁交𪜶迒海溝通 ê 西班牙語又閣 m̄ 是 Castellano hōo 比利時太太傱去 bué 咱臺灣人食 ê 麭交我交換，這个畫面到今猶撏牢牢，起因我 mā 屬準做光景媠甲若天堂，腹肚飼無飽 m̄ 是無較縒 ê 旅行者。
這對比利時翁仔姐，翁是西班牙人，伊按西班牙人轉做比利時人 ê 背景交 Jean Reno bueh 相𫝛，齊是 uī-tio̍h 離開獨裁政權按自來轉做外來 ê 自本。
這久翻頭看彼段 Airbnb 日子，我 buē 講伊是好 ê 經驗 m̄-koh 伊 hōo 我有一大堵北港石壁通厚畫(話)。
我愛食番薯，認捌 ê 番薯 mā kan-ta 頂懸彼兩手路，請教「楊桃美食網」m̄ 是「番薯球」就是「番薯餅」遮 ê 出門揣鹹酥雞攤較快 ê 味素，人一徙岫到德國番薯成做我 ê 拒絕往來戶，起因 uī-tio̍h 炕一粒番薯，gún 翁有法度成做 Mǹg-sǹg kā 我想 bueh 做盲腸走腹來避邪。不過我較想 bueh 離緣，畢竟準做徙岫到德國我 m̄ 捌倚靠伊食穿，除了飯頓錢。
這久翻頭看彼陣 ê 查某囝教老母轉臍猶是規腹肚火，當做我塑膠一日到晏白白米飼一隻隱痀雞。總是天公有目喙，事實贏過五錢豬仔，掛一支喙，tsiâ 是隱痀雞，一本數簿明明明。
無興交伊盤喙錦了時間講恁兜勥母一世人無做功課，自在成做雞痀雞 hōo 恁飼白白米，恁無意見，我這个 kan-ta hōo 你開飯頓錢 ê 人 hōo 你嫌討債兼 buē 曉扞家，我就一筆一筆帳記 hōo 明 hōo 伊看我敢遮爾仔杜猴損五穀 mā hōo 我家己有一个實體巡冤家量債。
彼本 hōo gún 翁總算願意 kā 惜命命 ê 三斑放水流 ê 數簿到今猶收藏 tī 屜底，向望剪蟲莫來相揣。是講剪蟲來相揣我 mā 無伊法 ê 愛認命 ê Das Schicksal wollte es so 運命愛伊按呢生。
Aldi ê 番薯一寢開始是按西班牙來，西班牙交美國相比並，凡勢地理徛較倚所致價數比總是進口美國番薯 ê Lidl 閣較迷人。
Aldi 交 Lidi 齊相仝，無提供實體食譜冊 m̄-koh 線頂食譜，Aldi 交 Lidl ê 線頂食譜因為攝相技巧 hōo 我較愛行踏 Lidl 揣食譜，不過自 Lidl 要求使用者愛登入 E-mail 我就罕得行𪜶兜 ê 灶跤，另外 mā 凡勢這幾冬扞鼎扞出心得，看圖大約仔有才調掠「味素」，像這味 tī Google 拍 Süßkartoffeln mit Eier 隨出現 ê 食譜無揤入去讀 mā 薄略仔知影基本味素就綴圖出菜。
白色醬料有可能是優格醬抑是 Ma-ioh-ne-tsuh，彼一葉一葉圓圓 ê 生菜是兔仔耳，掠著大方向手䘼隨撆，有樣趁樣跟綴總舖出菜到今一目𥍉 mā 峇峇過 4 冬，伊猶原規欉好好 m̄ 捌按部落格剉掉，不過白色 ê 優格醬交 Ma-ioh-ne-tsuh uī-tio̍h hōo 家己有才調食閣較 tsuē 物 kā 伊轉做這幾年上捷敆 ê Lê-bóng 芥辣醬：Lê-bóng、芥辣醬、蜂蜜、橄欖油、鹽、胡椒，生菜順季節交價數做變化。
「這番薯卵沙拉正港好味素」翁那食翁褒嗦，我那聽嚨喉愈擽想 bueh kā 譬相，見著對面 ê 美國厝邊抱紅嬰仔轉來，想著這斗抾番薯 ê 變化「我 mā 是按呢感覺，簡單做，好味素。」
料理是一面鏡，伊照出我認為 ê 入人門，順人意窮真是實頭實腦 ê m̄ 知變竅交愛出家又帶枷無事揣事舞死家己。
過了代 ê 齷齪有進步過了代猶原田螺巡舊路，較行 mā 仝逝好幾仔百倍，番薯順自然這久大彼久細，捌食比捌伊大細閣較重要。
是，這斗 ê 番薯無美國抑是西班牙番薯 ê 大龐 m̄-koh 𫝛款好味素，我總算行出這个龜怪 ê 綿豉，番薯 m̄ 管時就愛若大象 tsiah-ē 挃。
