Tsuē 冬前翁 ê 上海機場搪著航空公司出箠又閣 m̄ 願處理，致使𪜶遮 ê buē 曉講北京話 ê 外國人有理煞無地揣人協助𪜶揣人談豈有此理
彼久當伊 uī-tio̍h 這个問題踅甲 phông-phông-ing，佮伊 mā 有相相𫝛困境 ê 英國先生行倚來 tuì 伊講「你 bueh 去臺灣我 mā 是 gún 女朋友 ē-tàng kā 咱鬥相共。」
伊 ê 人生小插曲成做我 ê 𤆬路雞，tuì 這个國家 kan-ta 捌散赤、獨裁、伊斯蘭國家 ê 好玄。「窮實我無正經行跤到，我 kan-ta tī 開放 ê 所在參觀這个規个建築齊是碉堡 ê 國家」英國朋友講。
Tsuē 冬後我 kā 伊湠 hōo 我 ê 好玄紮來這地土地，一看著 tsuē-tsuē 碉堡已經成做裝置藝術抑是當地人 ê 資源回收桶，我想著兩位猶 tī 德國做總舖師 ê 阿爾巴尼亞 ê 朋友「恁 ê 世界 ē 改變 gún-ê 世界 mā-ē 改變。」
想著朋友回答別人 tuì 家鄉 ê 印象，我笑家己 mā 是假仙假怪，剾洗翁紮別人 ê 跤手行踏阿爾巴尼亞，我家己 mā 是，正經是龜笑鱉無尾。
我 tuì 這个國家猶原無理解，M̄-koh gún 攏學著這件代誌用家己 ê 目睭佮喙尾感受這个國家。
講著 Gjirokastër 吉羅卡斯特大多數人攏 ē 想著甘願 hōo 人民枵腹肚 m̄ 願放一隻蠓入來 ê Enver Hoxha，tuì 阿爾巴尼亞人來講 Gjirokastër 是火燒島 mā 是 Osmanlı 鄂圖曼離開後 ê 各領(líng)主想 bueh 恢復自家扞權 ê 角勢。
Gjiroksatër mā 是凡勢 tuì tsuē-tsuē 臺灣人包括我家己屬生份 ê 阿爾巴尼亞詩人交小說家 Ismail Kadare 伊斯梅爾．卡達萊 ê 故鄉。
倚位 tī 阿爾巴尼亞南部 ê Gjirokastër 舊城是 gún 行踏阿爾巴尼亞 ê 第一个城市 mā 是阿爾巴尼亞第一个入選聯合國世界文化遺產 ê 城市。
Gjirokastër 吉羅卡斯特 2005
Berat 培拉特 - 2008
行踏阿爾巴尼亞進前，gún 跟綴來德國做廚子 ê 阿爾巴尼亞廚子 ê 分張，駛車若坐船，驚掠兔仔愛先 kā 眩車丹攢好勢 tsiah 出發。
按希臘 Mavromati 出境，阿爾巴尼亞 Knoispol 科尼斯波爾入境(ji̍p-kíng)，一路順倚地中海 ê 山勢上山落山交斡 m̄ 著方向翻頭繼續向前行，gún 從來 m̄ 捌搪著若坐船 ê 路上坱埃(ing-ia)，顛倒頭 hōo gún 感覺遮 ê 公路比德國較四序。
Gún 無款眩車丹，起因規車 kan-ta 我 ē 掠兔仔，我 tī 掠兔仔 ê 無四序 mā 已經學著按怎 hōo 兔仔較莫來相揣 ê 經驗，彼就是腹肚 m̄ 通貯麭佮卵。這个經驗是按坐 Bá-suh 是瑞士交人 tī 帛琉眩船得來 ê 經驗。Gún 行 ê 邊境公路敢有「誰的公路（上）：阿爾巴尼亞，柏油路上的邊陲民族」ê 報導，我無開時間揣資料，總是按入境到 Gjirokastër 這條公路我無掠過任何一隻兔仔過，甚至 uī-tio̍h Korça 拋近路走一段比誰的公路攝相閣較天然 ê 獨裁政府出喙，人民無料出力 ê 公路。Tī 這段公路我 mā m̄ 捌掠過半隻兔仔，m̄-koh 我一路祈禱世間眾神保庇 gún-ê 車 buē 敗馬。
西元 1336 年 Gjirokastër 已經成做 Byzantium 拜占庭重要 ê 角勢之一，1417 Gjirokastër ê 扞權者按 Byzantium 轉做 Osmanlı 鄂圖曼，Gjirokastër ê 居民 mā 按基督教慢慢仔轉向伊斯蘭教。
Gjirokastër ê 名稱來源 mā 有兩種講法，一个是按希臘語 ê ἀργυρόν 銀色轉化，意思是銀色城堡。一个是按這座城市 ê 公主伊 ê 字名 Argjiro 轉化。
Gjirokastër mā 有另外兩種寫法，一个是官方寫法 Gjirokastra mā 寫做 Gjirokastër，一个是當地 Gheg 語 Gjinokastër，這兩个名稱齊按希臘語來，tī Osmanlı 年閣伊號做 Ergiri。
1432–36 Gjirokastër 是阿爾巴尼亞反抗 Osmanlı 重要 ê 基地。
1831 ~ 1912 Gjirokastër mā 是阿爾巴尼亞人民爭取按 Osmanlı 獨立重要 ê 城市。
阿爾巴尼亞交臺灣相𫝛，這个政權離開，彼个政權來。來來去去 ê 政權 mā 生湠若臺灣 ê 花蓮豐田村。
1914 蹛踮遮 ê 少數民族希臘人要求自治權佮獨立權。
1925 本底支持這項要求 ê 希臘放棄 tuì Gjirokastër 領土 ê 權利。
1939.4月 意大利 I-tá-lih Italia 義大利侵入 Gjirokastër，1940.12月 換希臘侵入 Gjirokastër 五月日，1941.4月換德國第三帝國侵入 Gjirokastër 並 kā 伊交 hōo 盟友 I-tá-lih，1943 I-tá-lih 投降，德國繼續侵佔到 1944，換阿爾巴尼亞人作主人。
Gjirokastër mā 因為德國第三帝國交伊 ê 盟友 I-tá-lih 扞權 hōo 伊必須跟綴遮 ê 外來者食同盟國送來 ê 無料炸彈。
二戰結束，Gjirokastër 成做阿爾巴尼亞重要 ê 商業交工業中心，並 tī 1961 宣佈伊成做阿爾巴尼亞 ê 博物館城市 Museums-Stadt，Museum town。
這个決定，徹底改變 Gjirokastër ê 城市面肉。
1991.8 最後一尊偉大 ê Enver Hoxha 雕像 mā tī 遮按徛懸監視人民 hōo 猶原定根遮 ê 希臘裔居民 kā 伊家己 ê 故鄉捒落去食塗，這个象徵 mā 成做阿爾巴尼亞結束獨裁共產年閣。
希臘裔阿爾巴尼亞人 tī 獨裁共產年閣受 ê 苦 mā 是話若 bueh 講透機，目屎掰 buē 離。
1991 獨裁共產結束，本底猶有黨 ê 支援 ê Gjirokastër 開始無法度運作，人民開始上街反對新政府，致使新政府 tī 1997 落台，𫝛時扞權 40 外冬 mā tī 遮出世 ê Enver Hoxha 徛家厝 mā hőng 破壞，押尾有閣修復轉來。
我愛讀傳記 m̄ 管素人抑是出名人像裁者，總是我 tuì 親自行踏歷史事件，像人已經行到 Kraków，我 mā buē 專門去 Konzentrationslager Auschwitz-Birkenau 感受歷史，tī 遮 mā 𫝛款。
有做陣露營 ê 朋友招 gún 去看 Enver Hoxha ê 徛家厝，gún 隨幌頭說多謝，gún 有家己 ê 按算 --- 行踏舊城外 ê 街仔路，gún mā 因為這个推辭 hōo 我發見世界各國 m̄ 是 kan-ta 臺灣愛耍仝音。
因為車日子 gún-ê 糜飯有 99% 是家己扞鼎。按希臘猶未入境阿爾巴尼亞 gún 翁仔姐 mā 巧巧仔認定山鷹之國猶原農業社會 Gjirokastër 又閣是往過 ê 工商中心，菜蔬米糧應當 buē 僫揣就隨決定 kā 菜錢儉到山鷹之國 bué Dopple，tsiâ 知這个巧巧認定成做險險枵死家己 ê 戇。
Gjirokastër ê 菜蔬米糧無比希臘俗價，邀請推辭揣著 ê Aldi mā m̄ 是德國百年超市 Aldi(1913~)是 Albania discount = ALDI，而且暫時無營業。
Gjirokastër 入選聯合國文化遺產主要是舊城猶原保留完整 ê 鄂圖曼殕石建築交按 12 世紀就開始起造 ê Kalaja e Gjirokastrës/Burg von Gjirokastra/Gjirokastër Fortress = Gjirokastër 堡塞。
Gjirokastër 堡塞 mā 是 hōo 一座無名山頭轉做出名城市 ê 主要因端，起因伊 hōo 人類有法度徛懸山，看馬相踢。
Gún tuì 堡寨無興趣，總是阿爾巴尼亞 m̄ 知底時有法度閣來行踏加上 Gjirokastër 有法度按斷離倒壁沓沓仔恢復本底 ê 生張，拆兩張票行踏這个阿爾巴尼亞 ê 火燒島是褲袋袋磅子 ê gún 有法度鬥相共 ê 力量。
Gjirokastër 堡塞 tī 20 世紀初期就 hōo 扞權者轉做監獄使用，這久 ê 伊猶原保留這部份 hōo 觀光客參觀，不過需要掠外拆票。
Gún tuì 生份人 hőng 剝皮袋粗糠 ê 歷史感同身受，sóo-tí gún 無特別拆票入去參觀，準做工作人員講遮 ê 門票收入 ē 轉做受難者扶助基金，gún 猶是說多謝無拆票。
阿爾巴尼亞有 tsuē-tsuē 鄂圖曼交拜占庭建築，總是家己 tuì 遮 ê 歷史影跤 mā 敢若未食硞硞綴，食了嫌白汫無素𫝛款，我 tuì 阿爾巴尼亞近代 40 冬建築較有興趣。
自一入境阿爾巴尼亞我 ê 雙目 m̄ 捌揣過鄂圖曼抑是拜占庭 ê 影跡，我 ê 雙目專心一致 tī 揣游擊隊員出身 ê Enver Hoxha 伊要求整修抑是起造 ê 碉堡 Bunker。
聽講遮 ê 碉堡有 17 萬外个，tī 我猶未行踏這个國家進前，我一直掠做這 17 萬外个碉堡齊徛位 tī 海岸交鄰國邊界遐，當我行踏這个國家我發見代誌 m̄ 是戇人我想 ê 簡單。
伊有可能出現 tī 恁兜 ê 對面交你相對看，簡單一句伊是 Enver Hoxha ê 人工監視器。
阿爾巴尼亞倚地中海 hōo 伊 ê 五穀米糧菜蔬種植交其他地中海國家 bueh 相𫝛，有大片 ê 橄欖樹園交葡萄園。
Gún 這回 ê 車日子就因為阿爾巴尼亞 ALDI 暫時無營業踅入一間講西班牙語 ê 烘肉餐廳 mā 因為這間餐廳 hōo gún 發見，阿爾巴尼亞 ê 橄欖油正港好味素，紲落一路款橄欖油轉來囤 mā 一路拚勢食葡萄。
Tī 臺灣葡萄無敆我 ê 脾土，tī 阿爾巴尼亞 hőng 請食葡萄隨四界 bué 來做四秀仔。
行踏 Gjirokastër 這个有世界文化遺產光環卻無承著光環帶來 ê 繁華 hōo 我成做一隻貓想 bueh 理解因端，請教華文資料 m̄ 知是文字面肉限制我 ê 眼界抑是阿爾巴尼亞 tuì 咱臺灣人較生份，tī Google大眾廟我 kan-ta 揣著誰的公路這篇臺灣人分張 ê 資料，賰 ê 齊佮我想 bueh 解雺霧 ê 分張較無相干。
換 gún 翁 ê 語言，這个語言引𤆬我按雺霧行出來。
申請世界文化遺產無勇甲若大象 ê 金銀財寶來維持遺產 ê 完整，註冊一時間到這个光環 mā 隨 hőng 收去。阿爾巴尼亞政府看著這點 mā 清楚知影無一條 buē hőng 眩車 ê 路，佮意家己駛車抑是騎鐵馬行跤花 ê 觀光客 buē 來阿爾巴尼亞觀光消費，就開始鋪橋造路並維護古蹟。
自 hōo 人駛車若駛船 ê 公路開始變化， 阿爾巴尼亞 ê 經濟 mā 開始起了變化，至少 tī Gjirokastër 這个重要 ê 城市。
因為一入境就搪著遮爾仔讚 ê 路況 hōo gún 掠做阿爾巴尼亞現今 ê 道路建設攏真好。
總是，代誌 m̄ 是戇人想 ê 按呢，按 Gjirokastër 駛向 Korçë 科赤這逝路 hōo 我真正感受早前看 MFS 車駛 tī 非洲紅土大路 ê 眩，不過這久想彼久煞數念伊萬分，起因伊 hōo 我看著上真 ê 阿爾巴尼亞，世間萬物猶原停跤 tī 工商革命猶未行跤到 ê 年閣 --- 恬靜。
這逝將近 4 點鐘 ê 路途除了鳥隻交聽聲無見影 ê 動物 ē 出聲就賰 gún 翁仔姐交一路綴車輪跳舞 ê 石頭。
按 Gjirokastër 向 Korçë 出發窮實 m̄ 免行這段路，總是這久想彼久猶原數念彼久 ê 光景。
因為這段拋近路 hōo gún 有機會享受工商主義猶未相借問 ê 大自然，因為這段拋近路 hōo gún 有機會停跤 tī Helmës 這个向 Google 跋桮，Google kan-ta ē 賜 gún 笑桮 ê Leider konnten wir keine Sehenswürdigkeiten in der Nähe von Helmes finden/無資料 ê 田庄。
我足數念停跤 ê 彼暝，跟綴阿波羅落山，跟綴黛安娜妝娗天河 mā 享受食物鏈 ê 保護。
出發阿爾巴尼亞進前聽廚子分張，阿爾巴尼亞山區 ê 狼群數量無算少，若是有法度揣著人家厝借歇一暝就莫儉彼寡錢。
這段拋近路凡勢受著 Korçë ê 致蔭，sóo-tí 有空地 mā 猶原定根 tī 家鄉 ê 人家厝 ē kā 空地整理做露營地 hōo 旅者停跤，gún 停跤 ê 露營地就是這款經營方式。
Gún-ê 露營地主人家是少年離開家鄉拍拚，半老老轉來故鄉生湠 ê 廚子，伊有都市人 ê 保持距離 mā 有阿爾巴尼亞人 ê 含蓄(hâm-thiok) hōo 我規仙人放輕鬆甲想 bueh 加停歇兩暝，總是時間 buē 逐人，gún 卻愛逐伊，kā 這个想法收藏踮心肝穎，聽候未來 ê 按算。
彼暝 m̄ 知是主人家吩咐抑是狼群來徛倚 tī gún 整理床枋做眠床，兩隻半仿狗一前一後徛踮 gún 跤兜 tuì 山崙方向大聲警告，鈍目兼鈍鼻 ê gún 看 buē 著 mā 鼻 buē 著狼 ê 氣味，隨軁入車底展 ió-gà kā 床枋、舒被齊處理好勢，半暝夜緊輕輕仔 kā 車門拍開見著這兩隻半仿狗猶原守 tī 車邊，gún 非常確定狼群 tī 附近。
不過，我 tuì 這兩隻半仿狗上大 ê 數念是𪜶無私成做我 ê 潘桶 kā 我 buaih 食 ê 加工香腸齊食甲清氣啖啖 hōo 我隔壁 ê 同學無機會成做茶鈷呻。
讀《獨裁者的廚師》阿爾巴尼亞廚師講著，只要伊發覺 Enver Hoxha 氣持ち無媠，伊就隨款 Gjirokastër ê 菜色 kā 伊安搭，特別是 Enver Hoxha 自囡仔就愛 ê Gjirokastër Tshì-sù 烘。
當 gún tī Gjirokastër gún 並 m̄ 知影 gún 有食著這項料理，這久整理相片 tsiah 發見 Enver Hoxha 果然是 Gourmet 美食家。
無愛食 Tshì-sù ê 我 tuì 伊 ê 數念 mā 是交保加利亞食著 ê Tshì-sù 𫝛款深無見底。
獨裁者的廚師紹介 Enver Hoxha 意愛傳統 ê 做法淋寡蜂蜜抑是果仔醬，gún 食著 ê Tshì-sù 烘聽少年頭家講較偏希臘人 ê 食法，敆橄欖油做伙食。
這久翻頭看彼久，翁認真提出想法「咱 ē-tàng uī-tio̍h 這味閣去 Gjirokastër 一斗，順紲 kā ALDI 交觀。」
我 mā 認真回答「Uī-tio̍h 好食 ê 珍珠菜蔬丸仔，我願意閣一斗盤山過嶺到 Gjirokastër」正經，這珍珠丸仔好食甲免看相片 kan-ta 想喙瀾隨㴙㴙落。
Gún 第一暝 tī Gjirokastër ê 糜飯本底就按算 tī 這間餐廳食，總是規个餐廳無見半個人 mā 無見電火 kan-ta 一个大門開開開 m̄ 驚著賊偷，gún 就翻頭轉去無興趣 m̄-koh 至少知影彼是伊斯蘭傳統料理之一 ê 烘羊肉。
第二暝按舊城轉來新城，gún tuì 行踏 ê 角勢食食齊是 kiōng-bueh 無宛 2 體 ê 美國 hām-bah-kah 交 tuì 阿爾巴尼亞近代料理影響真大 ê I-tá-lih 料理無興趣，我閣一斗划入這間看無半个人 ê 餐廳 mā kā 頭伸入門看。
「Welcome」一聲無看人 ê 來坐 hōo 我掣甲叫阿母，規个暗趖趖 ê 餐廳總算有一葩火按櫃檯點著，一个面肉白甲若香草霜淇淋色 ê 少年家微微仔講「歹勢，省電錢。」
1234 驚甲無代誌，我那摸家己耳珠那問「這个時間敢有通仔食頓？」
少年家隨 tìm 頭講「透早 9 點到 10 點攏通食頓佮食茶，你 bueh 坐內底抑是外口？」
「外口」驚某應講內底 ê gún 翁隨紲喙。
「這間 kā 我驚甲半條命 kiōng-bueh phàng-kìnn ê 餐廳交伊 ê 勻勻仔出料理已經深深蹛 tī 我 ê 心肝穎。」
「我 mā 是」翁應。
獨裁者的廚師
